Владата информира дека Управниот суд донел пресуда дека едностраното раскинување на договорот за изградба на рудникот „Казандол“ од страната на Владата е законито.

„Владата на Република Северна Македонија информира дека Управниот суд, одлучувајќи по тужбата на тужителот Друштво за експлоатација, преработка, и производство САРДИЧ МЦ ДОО, увоз-извоз, Скопје против Одлуката на Владата од 27.3.2018 година, за едностран раскин на Договорот за изградба на рудник во локалитетот ‘Казандол’, донесе пресуда одбивајќи ја тужбата како неоснована“, информираат од Владата.

Пресудата на Судот станала правосилна на 14 мај. Во неа се вели дека Владата правилно го применила материјалното право, кога на тужителот „САРДИЧ МЦ“ еднострано му го раскинала Договорот за концесија.

„Причините кои се сметаат за основани, се додава во пресудата, е тоа што концесионерот во рокот од две години до денот на доделувањето на концесијата во смисла на членот 13, став 1 од договорот, не ги исполнил обврските да изгради постројка за експлоатација на катоден бакар со капацитет да процесира најмалку 50 проценти од експлоатираната руда и после две години од почнување со експлоатација на вториот рудник да изгради фабрика за производство на финални производи од катоден бакар со капацитет најмалку еднаков на годишниот капацитет на постројката за експлоатација на катоден бакар“, соопштија од Владата.

Владата на Република Северна Македонија, се додава во соопштението, останува на својот став дека ги поддржува инвестициите во земјата и создава клима за економски просперитет и квалитет, но исклучиво согласно утврдените законски норми и прописи.

Владата во март минатата година еднострано го укина договорот. Претходно жителите на повеќе градови во југоистокот со месеци протестираа и предупредуваа на опасноста од отворањето на „Казандол“ и „Иловица“ нарекувајќи ги „рудници на смртта“.

Министерството за труд и социјална политика соопшти дека со социјалната реформа се воведува траен надоместок за невработен родител којшто се грижел за дете со попреченост.

„Биолошките семејства кои имаат деца со попреченост,  како поддршка веќе имаат зголемен износот на утврдената висина на правото на посебен додаток за 15%. Воведуваме и траен надоместок за родител, кој се грижел за детето со попреченост до неговата 26 годишна возраст без да го смести во институција. Право на овој надоместок ќе имаат родителите коишто се невработени и не користат право на пензија. Надоместокот ќе може да го користат, по наполнување на 62 години за жена, односно 64 години за маж“, велат од Министерството.

Со новиот закон, додаваат од таму, ја развиваме и услугата за одмена на семејна грижа која ќе обезбедува краткотрајно згрижување на зависни членови од семејството заради одмор, лични и професионални потреби на членови на семејството кои се грижат за нив.

Користењето на правото за попреченост, со новиот закон се проширува и за лицата со интелектуална попреченост, додека додатокот за надоместок за плата за скратено работно време за родител кој чува дете со попреченост се зголемува до 50% од просечна нето плата.

Се воведуваат две целосно нови услуги за лицата со попреченост – Лична асистенција и услугата Домашна нега.

Од Министерството посочуваат дека активно продолжува да тече и процесот на деинституционализација. Владата лани ја усвои Националната стратегија за деинституционализација 2018-2027 „Тимјаник“, кој предвидува 66 милиони евра за 10 годишна реформана системот за социјална заштита.

Сообраќајот на државните патишта се одвива по наместа влажни коловози, информира АМСМ.

Интензитетот на сообраќај на патните правци надвор од градските средини е зголемен. На граничните премини, од македонска страна, нема подолги задржувања за влез и излез од државата.

Автопатот Миладиновци – Штип, секција Миладиновци – Кадрифаково и Кадрифаково – Миладиновци не е пуштен за сообраќај. На автопатот се вршат проверки од безбедносен карактер. АМСМ апелира до сите возачи да не го користат автопатот.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.