Македонија
Мицкоски пред лидерската: Ковачевски лаже дека изборот е интеграција или изолација

Ковачевски кога ќе каже интеграција всушност мисли уставни измени и прифаќање на бугарските диктати кои оваа држава и народ ги отфрла како понижувачки, изјави лидерот на ВМРО-ДПМНЕ, Христијан Мицкоски во пресрет на лидерската средба на која со премиерот Димитар Ковачевски ќе разговараат за измените во Уставот, со цел внесување на Бугарите и почеток на преговорите со ЕУ.
Мицкоски од Прилеп порача дека измама претставува тезата на Ковачевски оти изборот е помеѓу интеграција или изолација. Вели дека ниту еден фактор во оваа држава не посакува изолација која веќе ја имаме и не може да се донесе нешто што веќе го живееме.
Ја обвини власта дека покажува сервилност пред светот, и наместо да ја кодошат опозицијата и да се молат да им прават притисоци кои се неприфатливи, треба да бараат од светот да добиеме подобри услови и фер шанса.
„Ковачевски како премиер да побара од истата Европска унија, Бугарија да примени барем неколку од над десетината правосилни пресуди од судот за човекови права кој нотира кршење на правата на Македонците во Бугарија“, кажа Мицкоски.
Според него, голема грешка овие години е тоа што крупните одлуки во земјата беа носени без единство и целосна согласност на опозицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сообраќајна несреќа на патниот правец Кавадарци – Прилеп, сообраќајот во прекин

АМСМ информира дека сообраќајот на патниот правец Кавадарци – Прилеп е во прекин.
Од таму велат дека прекинот е поради сообраќајна незгода.
Прекинот ќе трае до завршување на увидот.
Македонија
СВР Битола апелира до граѓаните да не палат стрништа и земјоделски површини

Битолската полиција апелира до граѓаните на подрачјето Битола да не се пали оган на отворен простор откако деновиве настанаа неколку пожари како последица од намерно запалени стрништа.
-Апелираме да не се пали оган на отворен простор, да не се палат стрништа, земјоделски површини, отпад и друг горлив материјал и да не се фрлаат отпушоци од цигари и догорчиња. Доколку граѓаните забележат пожар на отворен простор најбрзо што може да го пријават во надлежните институции, апелираат од СВР Битола.
Македонија
Претседателот Пендаровски во Њујорк оствари средба со Јури Ким и Џим O’Брајан од американскиот Стејт Департмент

Претседателот Стево Пендаровски во Њујорк, на маргините на 78. Генерално собрание на Обединетите нации, оствари средба со Јури Ким, заменик помошник државен секретар за Европа и Евроазија и Џим O’Брајан, раководител на канцеларијата за координација на санкции при американскиот Стејт Департмент.
На средбата се разговараше за текот и за актуелните состојби поврзани со европските интеграции на нашата држава, за реформскиот напредок, како и за политичките состојби во земјава и во регионот. Соговорниците се согласија дека е потребно да се одржи фокусот на реформите, како и подготвеноста за водење на преговорите со Европската Унија.
На средбата беа потврдени одличните билатерални односи меѓу Соединетите Американски Држави и Република Северна Македонија, при што претседателот Пендаровски се заблагодари на американската поддршка за членството на Северна Македонија во ЕУ како стратешка определба на македонското општество.