Македонија
Мицкоски: СДС и ДУИ работат на епски криминал од околу 150 милиони евра во РЕК Битола

Енергетиката е геостратешко прашање, не е само локално или регионално и јас ќе зборувам за електроенергетиката. Ќе започнам со производниот дел, во Македонија еден од државотворните сегменти и најзначајните атрибути се наоѓа токму во регионот на Битола, а тоа е Термоелектраните Битола или Рударско енергетскиот комбинат Битола, бидејќи и рудникот е дел од таа целина, од каде додека не дојде владата на СДС и ДУИ се копаше јаглен и се произведуваше електрична енергија за електроенергетска стабилност на Македонија. Откако тие дојдоа, се помалку вистински се копа, а се повеќе се троши за копање на јаглен, но истовремено почнаа и да увезуваат јаглен со сомнителен квалитет, изјави претседателот на ВМРО-ДПМНЕ, Христијан Мицкоски на денешната дебата „Енергетска платформа за иднина“ на тема „Концепт за инвестиции во енергетиката“ во Битола.
Мицкоски истакна дека еден таков тендер деновиве беше објавен, а тоа е набавка на увозен јаглен за една година од близу 100 милиони евра или попрецизно 5 милијарди и 950 милиони денари и таа сума треба да ја добијат неколку фирми кои ни се познати за увоз на јаглен со сомнителен квалитет, а од информациите кои се добиваат е полн со сулфур и тој сулфур ќе ги труе Битола и битолчани и граѓаните од регионот како општините Новаци и Могила.
– Покрај овој голем тендер има уште еден рекорден епски, кој трае 18 месеци и тоа е од околу 2 милијарди и 400 милиони денари односно околу 40 милиони евра плус ДДВ што значи околу 46-47 милиони евра кои ги доби позната компанија а ние како партија имавме многу прес конференции за овој епски криминал. Веќе има 150 милиони евра тендери кои треба да бидат завршени пред изборите за кои постои сомнение дека се исплаќаат авансни провизии во вредност од 20% и постои основано сомнение и информации кои стигаат дека првите 10% ќе се исплатата сега, а вторите мај-јуни кога оваа влада на СДС и ДУИ ќе замине, за да се подготват убаво со куферите и мислат на тој начин ќе се спасат и ќе заминат и мислат дека никој нема да сноси одговорност, нагласи Мицкоски.
Мицкоски им порача дека за точно 38 дена започнува кампања за претседателски, за 52 кампањата за парламентарни, а за отприлика помалку од 4 месеци е новата влада на ВМРО-ДПМНЕ и дека директорчиња кои одлучија да им слугуваат на малкумина политичарчиња кои сега се дел од раководството на СДС, дека ќе одговараат од прв до последен за ова што го прават.
– Ако мислат дека ќе ги наполнат куферите и ќе избегаат, им ветувам дека лично ќе се занимавам со нив, ќе нема каде да бегаат. Затоа мојата порака до нив е да се вразумат да ги откажат овие набавки, да се обидат уште овие 3 и половина месеци пристојно и достојно да го водат РЕК Битола и мирно да се повлечат без дополнително да ги пљачкаат граѓаните мислејќи дека тоа ќе помине неказнето. ВМРО-ДПМНЕ за разлика од владата на СДС и ДУИ која планира да го опљачка и затвори РЕК Битола, ние имаме план да го модерниззираме и да продолжи да работи се додека има ресурс за производство на електрична енергија, изјави Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Царинaта спречи опасен шверц на илјадници лекови, против лице од Косово поднесена кривична пријава

Царинските службеници на граничниот премин Богородица открија и спречија обид за криумчарење на 4.577 парчиња небезбедни лекови, скриени во багажниот простор на изнајмено возило. Против едно лице, државјанин на Косово, Одделението за истраги во Секторот за контрола и истраги поднесе кривична пријава за сторено кривично дело „криумчарење“.
Станува збор за аналгетици, анестетици и антиалергиски раствори во стаклени вијали, кои биле во рефузна состојба, односно без оригиналното пакување, како и без соодветни дозволи и сертификати од надлежни институции. За да избегне царинска контрола, сторителот лековите ги наредил во редови и ги скрил меѓу патнички перничиња за врат, сместени во три картонски кутии.
Со ваквиот начин на транспорт се загрозува безбедноста на граѓаните, бидејќи лекови кои не се соодветно декларирани, складирани, транспортирани и без соодветни дозволи и сертификати можат да претставуваат сериозен ризик по здравјето.
По брзата реакција на инспекторите, кои работеа на случајот во текот на изминатото деноноќие, поднесена е кривична пријава до ОЈО Гевгелија, од каде што е изречена мерка за одземање на лековите.
Царинската управа ќе продолжи со засилени контроли на граничните премини со цел спречување на шверц на лекови и заштита на јавното здравје.
Македонија
Јавен увид во Избирачкиот список од сабота до 11 септември

Од сабота, 23 август, до 11 септември граѓаните може да го проверат Избирачкиот список и да поднесат барања за запишување, дополнување или бришење податоци. Барањата се поднесуваат писмено до ДИК, по електронска пошта или преку месните канцеларии, а решенијата се носат во рок од 24 часа.
Заклучениот Избирачки список ќе биде готов најдоцна на 3 октомври, а политичките партии ќе може да го проверат списокот и да поднесат свои барања до 19 септември. Податоците за граѓаните што поднеле барање за лична карта ќе се впишат по службена должност, како и податоците за лицата во затвор или установи за вонсемејно згрижување.
Македонија
УЈП: Истече рокот за плаќање на месечните обврски за јули – повик за подмирување на долговите

По истекот на законскиот рок за плаќање на месечните аконтации за данок на добивка и исплатата на јулските плати со придонеси, Управата за јавни приходи утврди значителен број на неплатени обврски.
„Од 2.129 даночни обврзници не е извршено плаќањето на месечната аконтација за данок на добивка за јули 2025 година, а кај 11.555 обврзници не е евидентирана исплата на бруто плати и социјални придонеси за истиот месец. Дел од неплатените аконтации може да бидат подмирени преку пребивање со даночни побарувања, но тоа не ги исклучува законските обврски и потребата тие да се сервисираат во рок“, се наведува во соопштението.
Управата за јавни приходи во текот на вчерашниот ден достави персонализирани известувања до сите обврзници со неплатени обврски и апелира веднаш да го извршат плаќањето.
Овие средства се дел од јавните приходи кои припаѓаат на граѓаните и обезбедуваат редовно финансирање на буџетските потреби, здравството, образованието и социјалната сигурност.
УЈП остро потсетува дека во следните денови ќе се преземат законските мерки за присилна наплата.