Од петокот воопшто нема канал за комуникација на којшто се соопштуваат позициите за изборите, бидејќи ситуацијата е алармантна, оттогаш наваму имаме неколку десетици луѓе кои ги загубија животите, неколку стотици кои се инфицирани, неколку илјади кои се во карантин и навистина не се чувствувам пријатно да зборувам за евентуален датум за избори кога се случуваат овие работи, изјави лидерот на ВМРО-ДПМНЕ, Христијан Мицкоски, на новинарско прашање дали е точна изјавата на Заев дека партиите се блиску до датум за избори.

Мицкоски кажа дека пред новонастаната ситуација, практично до петокот од кога има зголемен број заболени, имало канал за комуникација и се разговарало за можни сценарија за одржувањето на предвремените парламентарни избори.

„Повторно ќе кажам,  подготвени сме за компромис, да ја следиме ситуацијата, ќе гледаме како ќе се движи интензитетот на новиот бран или, би рекол, продолжениот бран на Ковид-19 вирусот, па дури потоа да зборуваме. Ќе кажам две суштински работи, првата е дека нè убедуваат да научиме да живееме со пандемијата. Да, сите сме свесни, одговорни луѓе сме, дека треба да научиме да живееме со тоа, дека таа ќе биде присутна додека не се изнајде вакцина, но не можам да живеам со пандемијата кога имаме 80 или 90 или, пак, 40-50 луѓе кои се новозаболени и по 5-6 или 7 луѓе кои го губат животот“, кажа Мицкоски.