Лидерот на ВМРО-ДПМНЕ, Христијан Мицкоски, говорејќи на денешниот протест против поскапувањето на електричната енергија, упати три барања до Владата, на кои рече дека треба да одговорат во наредните денови.

„Прво барање – враќање на старата цена на стујатата преку намалување на тарифата на универзалниот снабдувач;

Второ барање – викенд без ДДВ во септември како што беше ветено пред изборите;

Tрето барање – професионализација на Регулаторната комисија за енергетика со натпартиски кадри“, посочи Мицкоски.

Тој во говорот одговори и за прозивките од портпаролите на СДСМ за тоа кој ги плаќа овие протести.

„Ова е честит народ кој веќе не може да ги трпи неправдите и затоа излезе на улица“, објасни Мицкоски.

Партискиот лидер го посочи претседателот на Регулаторната комисија за енергетика, Марко Бислимовски, како директно одговорен за покачувањето на цената на струјата и обвини дека тој ѝ слугува на мафијата на власт.

Мицкоски порача дека отпорот и протестите ќе продолжат сè додека мафијата на власт не биде детронизирана зашто, како што рече, на власт дошла преку поткупени избори.

„Ќе нè има насекаде во цела Македонија, нема назад, нема повлекување. Народот е заситен и не може веќе да трпи, затоа излегува на улица“, порача Мицкоски, на првиот од серијата најавени протести на ВМРО-ДПМНЕ додавајќи: „Кога неправдата станува закон, протестот е наша обврска“.