Што треба повеќе да се случи за ова обвинителство да почне да гледа докази за криминал кај власта, праша лидерот на ВМРО-ДПМНЕ, Христијан Мицкоски, во објава на „Фејсбук“, по наводниот скандал за поткуп на гласачи во Струмица.

Според Мицкоски, Заев се бори за закон кој ќе го амнестира криминалот, а обвинителството ја зеде улогата на заштитник на криминалот на власта.

„Случајот за поткуп на гласачи во 2014 година ‘сосема случајно’ бил отворен во 2018 година и затворен поради немање  докази. И сега ние треба да ѝ веруваме на Русковска дека Заев е невин во целиот случај, кога јавна тајна е како СДСМ и Заев обезбедуваат поддршка во Струмица и не само таа во 2014 туку и за изборите претходно, но и времето потоа. За таквиот феудален систем со робовладетелски карактеристики сум говорел во повеќе наврати каде ‘вождот’ ги уценува немоќните , а останатите ги рекетира“, пишува Мицкоски.

Според него, овој случај со поткуп на гласови е отворен и затворен во 2018 затоа што тоа Вилма Русковска била обвинител, а Заев бил премиер и само така можел да се спаси од одговорност.

„Го отворила за да го затвори, далеку од очите на јавноста. Впрочем, сега е јасно дека обвинителството е чуварот на криминалите на актуелната власт“, додава Мицкоски истакнувајќи дека слепилото пред криминалот на сегашното обвинителство може да се отстрани единствено со квалитетен закон за обвинителство.