Македонија
Монтажен паркинг во Капиштец и нова градинка во Пролет меѓу проектите на кои ќе се работи во Центар

Советниците на Општина Центар на вчерашното продолжение на втората седница на Советот го изгласаа Планот за програми за развој на општината за периодот од 2022 до 2024 година, со 12 гласа за, осум воздржани и три против.
„Со донесениот план за програми за развој се планира развитокот на општината и создавањето подобри и похумани услови за живот во Центар за сите граѓани“, велат од општина Центар.
Планот за програми за развој на Општина Центар за периодот 2022-2024 предвидува реконструкција и подобрување на енергетската ефикасност на основните училишта и детските градинки, реконструкција на постоечка и изградба на нова инфраструктура, реконструкција и модернизација на јавното осветлување, изградба на монтажен паркинг во функција на објекти и модернизација на ИТ-системите во општината.
Меѓу поважните проекти за претстојните две години се наоѓа и изградбата на градинката во населба „Пролет“, прва од ваков тип, најавена од претходниот градоначалник, Саша Богдановиќ, заедно со министерката за труд и социјална политика, Јагода Шахпаска.
„Градинката ќе има вкупна површина од 3.230 метри квадратни и ќе чини 152.520.000 денари (без ДДВ), односно 47.000 денари по метар квадратен. Истата ќе биде изработена со современи и квалитетни материјали, со антибактериски подови, ќе има прозорци со нано филтри и енергетски ефикасна структурална фасада. Греењето во градинката ќе биде еколошко, односно дел на централно греење (градско парно), а дел на топлински пумпи“, соопштуваат од општина Центар.
Друга активност е изведбата на монтажниот паркинг во Капиштец, со 294 паркинг-места.
„За системот на паметно паркирање, кој е револуционерен и за прв пат ќе биде изведен, веќе се изготвени анализата за техничките барања и финалното техничко решение за имплементација на истиот. Се работи за современ систем за мониторинг кој ќе функционира по цела должина на улицата Орце Николов. Системот ќе обезбеди постојано следење на паркинг-местата на ‘Орце Николов’, мониторинг на местата во зоните за посебни намени и ќе врши мониторирање на сообраќајот на улицата“, информираат од општината.
Што се однесува на реконструкцијата на улицата Ленинова (делот од бул. Партизански одреди до ул. Митрополит Теодосиј Гологанов), од општина Центар појаснуваат дека станува збор за реконструктивен зафат на дел од улицата, кој се изведува на барање на жителите и вкупната површина која ќе биде опфатена со реконструкцијата изнесува 6.720 метри квадратни, односно 6.320 денари по метар квадратен.
„Покрај овие активности, предвидени се и реконструкции на основни училишта и детски градинки, набавка на специјални возила за одржување на хигиената на улиците и јавните површини на територијата на општината, како и изведба и одржување на современиот ЛЕД систем на улично осветлување“, велат од општината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Вечерва зградата на Владата свети во сино во знак за подигање на свеста за аутизмот

Вечерва зградата на Владата свети во сино, во знак на 2 април Светски ден за подигање на свеста за аутизмот. Ова на социјалните медиуми го објави премиерот на Македонија Димитар Ковачевски.
„Давам неизмерна поддршка и почит кон лицата со аутизам, нивните родители, семејства, пријатели, наставници, соученици. Како Влада се залагаме да обезбедиме системски решенија за грижа за децата и возрасните со аутизам. Не сме сите исти, ниту по физички изглед, ниту по карактер, но сите во оваа држава имаат исти права“, напиша Ковачевски.
Како што вели тој, да ги прифаќаме различностите, бидејќи секој е различен и посебен на свој начин.
Македонија
Од понеделник пороен дожд

УХМР соопшти дека во понеделник, под влијание на нов влажен и постуден бран, ќе има врнежи од дожд кои попладне на повеќе места ќе бидат пообилни, над 30 литри на метар квадратен. На планините и на некои повисоки места врнежите ќе бидат од снег.
Следните три дена, ќе преовладува студено и ветровито време со повремени локални врнежи, претежно во западните делови.
Времето утре ќе биде променливо облачно со сончеви периоди, а попладне со повремен локален дожд. Ќе дува слаб до умерен ветер од променлив правец.
Македонија
Левица: ДУП-от во Карпош ДПМНЕ го поддржа уште 2017 година

Со гласањето на Деталниот урбанистички план за блок ССЗ 01.10 кој се наоѓа во Злокуќани. се исправа неправдата која е нанесена на жителите во овој дел од општина Карпош, поголем дел Ромско население, поради тоа што со децении не е усвоен ДУП, а со самото тоа не може да управуваат со нивните имоти и да ги уживаат правата кои ги имаат останатите жители на Општина Карпош, велат од политичката партија Левица.
Со овој план, од партијата посочуваат дека конечно ќе може да се легализираат куќите во ова населено место.
Дополнително, со нивната легализација ќе може голем дел од домаќинствата да се инкорпорираат во јавниот комунален систем и да добијат квалитетна услуга, се вели во соопштението.
Од Левица потенцираат дека ова е еден од ретките ДУП-ови што нема елементи на бетонизација, а зачудени се од одлуката на советничката група на ВМРО-ДПМНЕ која не го поддржа овој ДУП.
„Земајќи го во предвид ова како и придобивките за жителите на овој дел од Општина Карпош, за очекување беше истиот да го поддржат сите советнички групи. Изразуваме зачуденост од одлуката овој ДУП да не го поддржат советничката група на ДПМНЕ. Токму советничката група на оваа политичка партија во март 2017 година го изгласаа овој ДУП во оваа форма“, посочуваат од партијата.
Велат дека нивната хистерична реакција е веќе видена во Советот на Општина Карпош, особено по „замрсените“ односи меѓу лидерот на партијата Христијан Мицковски и градоначалникот Стевчо Јакимовски.
„Сакаме да напоменеме дека во овие политички игри ДПМНЕ ги вовлече и советничките од Независни кои без соодветно образложение гласаа против жителите на Злокуќани. Нападите кон локалниот огранок на Левица во Општина Карпош се за очекување и претставува прелсикување на политиката која ДПМНЕ ја води на централно ниво, па за секој нивни неуспех, за секое национално велепредавство криви се Левица, а не нивните функционери кои во Собранието на Република Македонија за многу штетни закони гласаа заедно со СДС и ДУИ“, истакнаа од Левица.