Македонија
МТСП: Левица ја злоупотребува судбината на стечајците од „Треска“ и ја лаже и манипулира јавноста
Политичката партија Левица, ја злоупотребува судбината на поранешните вработени во АД „Треска“ и во обид да добие ситни политички поени манипулира со јавноста и шири лажни информации, реагира Министерството за труд и социјална политика.
Денешното соопштение на партијата Левица, велат од Министерството, претставува целосно искривување на вистината во однос на исходот од вчерашната средба на министерката Јагода Шахпаска со претставници од поранешните вработени во АД „Треска“.
„Иако не беше најавен протестот на поранешните вработени од АД „Треска“ пред просториите на Министерството за труд и социјална политика, ниту пак некој од нив побара состанок, министерката Шахпаска се сретна со нивните претставници. Министерката Шахпаска ги ислуша и најави дека нивното барање во делот на исплата на заостанатите плати и придонеси ќе го презентира во Владата“, велат од МТСП.
Таа побарала од претставниците на поранешните вработени во АД „Треска“ да и’ достават список на лица кои не се опфатени со Законот за стечајци, за да се најде модел за сите што не се на ниту еден начин дел од системот на социјална заштита, да добијат соодветна финансиска поддршка.
„За жал, претставникот од Левица, претставувајќи се како правен застапник на поранешните вработени во АД „Треска“ присуствуваше на состанокот и наместо да работи во нивен интерес, неговото присуство на состанокот преку манипулации и ширење лажни информации да го злоупотреби во политички цели“, додаваат од МТСП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бесплатни уролошки прегледи денес во амбулантата на Специјализираната болница за геријатриска и палијативна медицина
По повод Месецот на машкото здравје – Мовембер, во амбулантата на Специјализираната болница за геријатриска и палијативна медицина „13 Ноември” – Скопје денеска со почеток во 10 часот ќе се вршат бесплатни уролошки прегледи, како и ехо прегледи на бубрези и простата.
Целта е подигнување на свесноста за значењето на навремената грижа за машкото здравје. Ова е одлична можност за навремена проверка, превенција и грижа за здравјето, информира болницата „13 Ноември” – Скопје.
Уролошки прегледи ќе врши Дарко Марковски, уролог од ГОБ „8-ми Септември“, а ехо на бубрези и простата докторките Марика Филипова и Марија Сековска – специјалисти интернисти во Специјализирана болница за геријатриска и палијативна медицина „13 Ноември“ .
Македонија
Поради сообраќајка се пренасочува сообраќајот на магистралниот пат Куманово-Крива Паланка
Сообраќајот на магистралниот пат Куманово-Крива Паланка од 9:15 часот се одвива со наизменично пропуштање на возилата, информира АМСМ.
Петходно од АМСМ соопштија дека поради случена сообраќајна незгода од 8:30 часот во целосен прекин е сообраќајот на магистралниот пат Куманово-Крива Паланка.
Македонија
Студено утро, во Маврово снег и температури под нулата
Најмногу дожд 40 литри на квадратен метар во изминатите 24 часа наврна во Демир Капија, по што следат Радовиш и Пожар со 37, Гевгелија со 35 и Штип со 28. Деветнаесет литри на квадратен метар наврнаа во Струмица, 16 во Виница, 15 во Куманово, 13 во Кавадарци и Крива Паланка, 12 во Попова Шапка, 11 во Претор, 10 во Маврови Анови и Скопје-Петровец, 8 во Берово, 7 во Лазарополе, 6 во Велес, 5 во Пожаране, 4 во Битола, Тетово, Крушево и Прилеп и по еден во Скопје – Зајчев Рид и Тополчани.
Утринава најстудено беше во Маврови Анови, Лазарополе и Пожар каде е измерена температура од -1 степен Целзиусов, во Пожаране и Крушево, 1 во Крива Паланка, 2 во Претор, Охрид, Тополчани, Куманово и Виница, 3 во Тетово, Штип, Прилеп, Берово и Скопје – Зајчев Рид, 4 во Битола, Велес, Кавадарци, Струмица, Демир Капија и Скопје-Петровец, а најтопло беше во Гевгелија каде се измерени 5 степени Целзиусови.
Времето денеска ќе биде променливо облачно со сончеви периоди. На планините и на повисоките места ќе провејува слаб снег. Ќе дува слаб до умерен ветер од северозападен правец. Максималната температура ќе биде во интервал од 5 до 11 степени Целзиусови.
И во Скопје ќе биде променливо облачно со сончеви периоди. Ќе дува умерен северен ветер. Максималната температура ќе достигне до 8 степени Цезлиусови.

