Македонија
Над 1 000 деца годишно поминуваат низ судските лавиринти

1 583 деца биле повикани во полициските станици во 2017 година поради разни причини.Од нив, 38% (или 596) деца го искористиле правото на бранител, ова го покажува извештајот на Сојузот за превенција на престапништво и малолетничка деликвенција. Секоја година, околу 1000 деца се во контакт со правосудниот систем како осомничени, сторители, сведоци и жртви на насилство и криминал.
Со цел да се унапредат знаењата и вештините на адвокатите кои постапуваат со деца кои се во контакт со законот, министерката за правда Рената Десковска, Бенџамин Перкс, претставник на Уницеф, Љубомир Михајловски, претседател на Адвокатската комора, и Лазар Нанев, претседател на невладината организација Сојуз за превенција на престапништво и малолетничка деликвенција денеска потпишаа меморандум за соработка за да се унапредат знаењата и вештините на адвокатите кои постапуваат со деца кои се во контакт со законот.
„Со овој меморандум за соработка ја потврдуваме нашата подготвеност за целосно почитување на најдобриот интерес на сите деца во контакт со законот и наша посветеност да се обезбеди нивна заштита низ целиот процес, особено за децата жртви на насилство, злоупотреба и запоставеност”, рече Дескоска.
Преку овој договор адвокатите кои работат со деца во контакт со законот ќе добијат специјализирани обуки, ќе се воспостави координација помеѓу сите вклучени институции и унифициран систем за прибирање податоци со меѓуресорска соработка.
„Кога ја гледаме состојбата на децата кои влегуваат во контакт со законот како жртви, сведоци или сторители, мора да се земат предвид два аспекти. Првиот е да се заштитат децата од секундарна виктимизација во текот на законската постапка бидејќи тие се веќе трауматизирани; и вториот аспект на кој работиме е да се спречи циклусот на криминално живеење кај децата кои се во судир со законот. Затоа е важно систем на правда во земјата да се усогласи со меѓународните и ЕУ-стандарди за правда за децата, и најдобриот интерес на децатада биде заштитен во секоја фаза од постапката”, рече Бенџамин Перкс, претставник на Уницеф.
Според Законот за правда за деца, адвокатите кои ги застапуваат децата кои се во контакт со законот се обврзани еднаш годишно да посетуваат пет дена специјализирана обука за правда за деца.
Секоја година, околу 1000 деца се во контакт со правосудниот систем како осомничени, сторители, сведоци и жртви на насилство и криминал. Поради тоа, постои суштинска потреба од специјално обучени адвокати кои знаат како да работат со деца не само во случаите кога децата се сторители на кривични дела, туку и кога децата се жртви и сведоци.
„Соработката помеѓу Уницеф, Министерството за правда, Адвокатската комора и Советот за превенција на малолетничка деликвенција ќе овозможи секое дете да добие правна заштита во правосудниот систем. Законите постојат, имаме прирачници и стандардизирани процедури кои даваат практични насоки за јакнење на примената на Законот за правда за деца, Законот за кривична постапка и Законот за граѓанска постапка, меѓутоа знаењата и вештините на сите практичари кои работат со деца мора постојано да се надградуваат”, рече Лазар Нанев, судија и претседател на невладината организација Сојуз за превенција на престапништво и малолетничка деликвенција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Независниот синдикат на полицијата најави протест: Основната плата на полицијата не може да биде под минималната плата во државата

Независниот синдикат на полицијата денеска со почеток од 12.00 часот на раскрсницата Мавровка кај судовите ќе одржи полициски протест.
„Полициската плата е составена од основна плата и зголемување од 30%. Основната плата на полицијата не може да биде под минималната плата во државата. Бараме воедначување на судската пракса на апелациониот суд Скопје со Апелационите судови од Битола и Гостивар кој го потврдуваат нашето барање. Протестот ќе започне пред судовите, ќе се одржат кратки говори и ќе се упатиме пеш кон судскиот совет“, велат од Независниот синдикат на полицијата.
Од таму најавија и прес-конференција исто така на раскрсницата кај Мавровка во 12.15 часот.
Македонија
Ѓорче Петров и Аеродром денеска без струја

Од ЕВН Македонија АД известуваат дека поради технички зафати во електродистрибутивната мрежа денеска без електрична енергија ќе останат:
· Во периодот од 09:00 – 10:00 часот дел од корисниците од село Кучково кон Манастир, општина Ѓорче Петров;
· Во периодот од 09:00 – 12:00 часот дел од корисниците на улицата Гаврил Констатиновиќ (околу бр.57), општина Аеродром;
· Во периодот од 09:00 – 10:00 часот корисниците од улицата Алексо Демниевски 17, 11 и други куќи во близина, општина Ѓорче Петров.
Македонија
Променливо облачно со сончеви периоди, попладне нестабилно со пороен дожд

Времето денеска ќе биде променливо облачно со сончеви периоди. Попладне наместа ќе биде нестабилно со пороен дожд и грмежи, локално во форма на невреме. Ќе дува слаб до умерен ветер од северен правец. Минималната температура ќе биде во интервал од 5 до 12, а максималната ќе достигне од 17 до 25 степени.
Во Скопје, променливо облачно со сончеви периоди. Попладне во делови од котлината ќе биде нестабилно со пороен дожд и грмежи. Ќе дува слаб до умерен северен ветер. Минималната температура ќе се спушти до 9, а максималната ќе достигне до 25 степени.
Времето во наредните денови
Во следните денови времето ќе биде променливо облачно и посвежо со повремен локален дожд.