На Инфективната клиника во моментот се хоспитализирани 19 возрасни и 18 деца со морбили, односно вкупно 37 пациенти со морбили. Еден пациент се наоѓа во потешка состојба на одделот за интензивно лекување, соопшти Министерството за здравство.

Во текот на вчерашниот ден биле прегледани тројца пациенти со симптоми на морбили, од кои двајца возрасни пациенти се амбулантски прегледани и пуштени на домашно лекување, а една пациентка е хоспитализирана на Клиниката. Станува збор за 29-годишна пациентка од Скопје, без податок за вакцинален статус.

Во согласност со податоци од Институт за јавно здравје, во периодот од 2 март до 8 март 2019 година пријавени се 83 сомнителни случаи на мали сипаници, а од почетокот на епидемијата во Скопје вкупно се регистрирани 493 случаи на мали сипаници.

Од почетокот на епидемијата вкупниот број на вакцинирани лица во Скопје е речиси 10 илјади лица, а вкупен број на вакцинирани лица на возраст до 14 години со МРП-вакцина од почетокот на епидемијата во државата изнесува 15.151 лице. Високиот одѕив на вакцинацијата, велат од Министерството, ќе придонесе за кревање на колективниот имунитет.

Во текот на минатата недела во Институтот за јавно здравје се пријавени 2.678 случаи со симптоми на грип, што е 16,5 отсто намалување во споредба со една недела пред тоа. Вкупниот број на заболени од грип оваа сезона изнесува 15.201 лица.