Македонија
Никола Ристановски: Признанието за заслужен граѓанин го посветувам на сите здравствени работници
„Секогаш постојат херои кои никогаш нема да ги дознаеме. Тоа се хероите од болниците. Со целиот мој габарит и искуство, моето признание за заслужен граѓанин на општина Карпош за 2019 година го посветувам на сите здравствени работници во земјата. На оние кои се на фронтот во борбата против вирусот Ковид-19“, истакна актерот Никола Ристановски, кој ја прими наградата за заслужен граѓанин на општина Карпош за 2019 година, која му ја врачи градоначалникот Стефан Богоев.
Ристановски го изрази своето задоволство, бидејќи локалната самоуправа ја прогласува медицинска сестра од ЈЗУ Универзитетска клиника за инфективни болести и фебрилни состојби, Јорда Манасиеска, за заслужен граѓанин на Карпош за 2020 година.
„Овие дискретни херои, но и воспитувачките во градинките, наставниците, фармацевтите, продавачите по маркети, пекарите и хигиеничарите ја заслужуваат најголемата почит на заедницата“, истакна Ристановски.
Градоначалникот Богоев изрази благодарност кон реномираниот македонски актер, кој минатата година прифати да добие вакво признание од Општината. Во текот на денешната средба Богоев и Ристановски разговараа и за чувствителната ситуација во која се наоѓаат сите граѓани. Културните работници се особено погодени од оваа криза, но дури и во вакви времиња дел од нив создаваат нови дела, а наша обврска е да ги почитуваме домашните артисти.
Општина Карпош, во рамки на одбележување на својот роденден, традиционално го доделува признанието за заслужен граѓанин. Истото не подразбира никаква финансиска поддршка, туку еден вид благодарност и признание за личности, коишто се важни за заедницата поради својот придонес во различни општествени сфери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во израелски напади во Газа убиени 17 лица, меѓу нив шест деца
Во израелски напади на северот и југот на Појасот Газа убиени се најмалку 17 Палестинци, меѓу кои и шест деца, соопштија локалните болници, пренесе Би-Би-Си.
Израелската војска наведува дека нападите уследиле откако, според нив, „терористи отвориле оган и тешко раниле еден војник“ на северот на Појасот Газа, во близина на таканаречената Жолта линија, која според договорот за прекин на огнот со Хамас означува територија под контрола на Израел. Како одговор, биле изведени прецизни удари од копнени и воздушни сили, поради, како што наведуваат, „очигледно кршење“ на примирјето.
Болницата Ал-Шифа во Газа соопшти дека примила тела на 13 лица, меѓу кои пет деца, по напади врз шатори и домови во источните квартови Зеитун и Туфа. Во болницата Насер во Хан Јунис биле донесени тела на уште четири жртви, меѓу кои и едно дете.
Од стапувањето во сила на примирјето на 10 октомври, Израел и Хамас речиси секојдневно меѓусебно се обвинуваат за негово кршење. Министерството за здравство во Газа, под контрола на Хамас, наведува дека од тогаш во израелска ватра загинале најмалку 529 луѓе, додека Израел соопштува дека во палестински напади загинале четворица нивни војници.
Македонија
СДСМ му оддаде почит на македонскиот великан Гоце Делчев
Делегација на СДСМ предводена од генералниот секретар Александар Саша Димитријевиќ, заедно со членовите на Извршниот одбор, Наташа Поповиќ и Петар Огњеновиќ, денеска оддаде почит и се поклони пред ликот и делото на македонскиот великан Гоце Делчев.
„Идеалите на Гоце Делчев за слободна, праведна и напредна Македонија и денес се силен потсетник дека иднината се гради со храброст, знаење и единство. Наша должност е да ги чуваме и живееме тие вредности, секој ден.
Нека е вечен споменот на македонскиот великан Гоце Делчев“.
Македонија
Мицкоски: Очекувам раководството на ССМ да излезе од партиската прегратка и да се договори со Владата во интерес на административците
Претседателот на Владата, Христијан Мицкоски, изјави дека очекува неколкумина од раководството на Сојузот на синдикати да излезат од, како што рече, партиската прегратка и да постигнат договор со Владата во интерес на работниците, односно на административните службеници.
Одговарајќи на новинарско прашање во врска со утрешната средба со УПОЗ и очекувањата, Мицкоски нагласи дека дел од вработените во јавната администрација сè уште немаат договорен Колективен договор со Владата.
„Очекувам да излезат од партиската прегратка тие неколкумина во раководството на Сојузот на синдикати и да се договорат со Владата во интерес на работниците, односно во интерес на административните службеници, бидејќи уште тие, како што многу пати кажав во минатото, уште тие 7.700–7.800 наши колеги немаат со Владата договорен Колективен договор, сите останати имаат“, изјави премиерот.
Тој додаде дека со ваквиот договор Владата, како работодавач, ќе ги заокружи односите со сите вработени до истекот на мандатот.
„Со ова, Владата како работодавач ги заокружува односите до истекот на мандатот на оваа Влада, до 2028 година, со сите оние на чии работодавач директен или индиректен е Владата“, рече Мицкоски.

