Инклузивен пристап и мотивирање на поголемо младинското учество во сите изборни циклуси е целта на првиот „Прирачник за млади гласачи“ кој го издаде Државната изборна комисија во соработка мисијата на ОБСЕ. Прирачникот претставува иницијатива за воспоставување на понепосредна и поголема двонасочна комуникација помеѓу ДИК и младите луѓе, со цел на лицата кои за прв пат гласаат да им се обезбеди полесен пристап во рамки на изборните процеси, како и соодветно информирање за нивните права, можности и законски обврски.

„Главна цел на ДИК е да ги вклучи сите гласачи во изборниот процес и да ја зголеми свесноста за учеството во општествените активности“, истакна потпретседателката на ДИК, Дитмире Шеху.

„ Голем акцент ставаме на младите луѓе и ќе бидеме особено среќни доколку секој од нив се вклучи во изборните и другите процеси на одлучување во земјата. Како институција веќе правиме напори овој Прирачник да го издадеме и во други форми кои се полесно достапни за младите луѓе. Исто така, во соработка со нашите партнери од мисијата на ОБСЕ веќе организираме различни иницијални обуки базирани на Прирачникот со кои дополнително очекуваме да го покренеме интересот и знаењата поврзани со потребата од учество на избори, особено на младите генерации“, посочи Шеху.

„На младите би им порачал, вашиот глас е важен. На вас е да ги внесете своите идеи, вашите грижи и приоритети и вашата енергија во политиката во оваа земја. Иако постојат и други начини да се чуе вашиот глас, како на пример на социјалните мрежи, гласањето е најефективниот начин да се направат политички промени. Особено на локално ниво имате моќ да направите вистинска разлика во управувањето со вашите заедници“, рече шефот на мисијата на ОБСЕ во Скопје, амбасадорот Клеменс Која.

Директорот на Агенцијата за млади и спорт, Наумче Мојсоски посочи дека младите точно знаат во каков свет и држава сакаат да живеат, што им е потребно, каде сакаат да работат, но и колку сакаат и сметаат дека треба да заработуваат.

„Токму затоа е важно младите да се вклучат и да учествуваат во носењето на одлуки, почнувајќи од користењето на своето право на глас во рамки на изборните процеси. Гласот на младите ќе биде јасна насока какви политики ќе се креираат во однос на нив и нивната иднина. На нашето општество му се потребни младите и тоа е клучното што треба да им го кажеме, потребни сте ни вклучени, активни и влијателни“, додаде Мојсовски.

Последните акции што ги презеде Министерството за внатрешни работи за разбивање на организирана група која незаконски издавала патни исправи, како и заплената на огромна количина на дрога се доказ за бескомпромисната борба против организираниот криминал и корупцијата, изјави Миле Талевски пратеник од редовите на СДСМ.

Според него двете акции каде се уапсени и вработени во МВР се потврда како што рече на професионалниот, ефикасен и неселективен пристап на полицијата во спречувањето незаконско дејствување.

„Наместо како целата јавност да го поздрави постапувањето на полицијата, од ВМРО-ДПМНЕ повторно видовме обиди за одбрана на криминалот и криминалците. Додека траеше сложена полициска операција „Двојник“ ВМРО-ДПМНЕ и Христијан Мицкоски се обидоа да ја саботираат акцијата преку пласирање на информации во јавноста додека таа се уште траеше. Откако не им успеа обидот за саботажа, од белиот дворец продолжија да шират лажни вести и дезинформации за акцијата со што свесно и неодговорно ја загрозуваат натамошната истрага“, вели Талевски.

Според него, ВМРО-ДПМНЕ и Мицкоски идентично се однесувале и за време на акцијата каде беше запленета голема количина марихуана.

„Очигледно е дека за ВМРО-ДПМНЕ е неприфатливо тоа што законите денес важат за сите подеднакво, тоа што денес никој не е над правдата и секој одговара за сторените криминали. Тоа, не беше случај во времето на режимот на ВМРО-ДПМНЕ. Јавноста памети како во 2014 година, ВМРО-ДПМНЕ и тогашната министерка за внатрешни работи Гордана Јанкуловска ја заташкаа аферата во која пасоши се печатеа во приватни домови. Јавноста многу добро памети и како синот на Трајко Вељановски беше ослободен откако беше фатен со дрога на границата со Грција“, истакна Талевски.

Тој додаде дека денес, институциите се посветени на неселективна и бескомпромисна борба против секаков вид криминал и корупција.

Основниот кривичен суд Скопје му го продолжи притворот за дополнителни 30 дена на бизнисменот Јордан Камчев.

„Кривичниот совет при Основниот кривичен суд Скопје, постапувајќи по предлогот на Основното јавно обвинителство за гонење организиран криминал и корупција за продолжување на мерката притвор за Ј. К., донесе решение со кое сѐ уште постојат околностите од член 165 ст. 1 т. 1 од ЗКП и го прифати предлогот на Обвинителството, со што ја породолжи мерката притвор за 30 дена“, се наведува во соопштението од судот.

Камчев се наоѓа во притвор од 14 март како еден од осомничените во предметот „Плацови на Водно“.

Претходно денеска, неговата одбрана соопшти дека судската одлука за притворот е незаконска бидејќи доказите врз кои се темели таа биле прибавени на нелегален начин.

Адвокатот на Камчев, Тони Менкиновски, рече дека одбраната ќе поведе постапка за незаконитост на докази, кои се поднесени од Агенцијата за национална безбендост, со што ќе бараат тој да се брани од слобода. Според адвокатот, единствениот доказ врз основа на кој се темели решението за определување мерка притвор никогаш не бил доставен до одбраната.