Македонија
Обвинителството поднесе жалба за условната казна за сообраќајната несреќа кај Млечен ресторан

Основното јавно обвинителство Скопје до Апелациониот суд поднесе жалба на пресудата за условна казна за сообраќајната несреќа што пред две годинии се случи кај Млечен, а во која загина едно лице. Обвинителството бара затворска казна за обвинетиот и смета дека првостепениот суд ставил акцент на олеснителните наспроти отежителните околности при носење на пресудата.
Обвинетиот беше прогласен за виновен за кривичното дело тешки дела против безбедноста на луѓето и имотот во сообраќајот и му беше изречена алтернативна мерка – условна осуда, односно казна затвор од 2 години, која нема да се изврши доколку обвинетиот во рок од 5 години од правосилноста на пресудата не стори ново кривично дело.
Во несреќата загина 32-годишен маж, а неговата бремена сопруга го изгуби бебето и беше тешко повредена.
Надлежниот јавен обвинител оценил дека при одредувањето на санкцијата првостепениот суд ставил акцент на олеснителните наспроти отежителните околности, што казната основно и објективно ја прави блага и неадекватна во конкретниот случај.
„Судот како олеснителна околност ја ценел слободната волја на изразено признание на вина за предметното кривично дело од страна на обвинетиот, кое придонело за брзо и ефикасно завршување на кривичната постапка, а воедно било и израз на подготвеност на обвинетиот да се соочи со последиците од своето дело. Но, јавниот обвинител смета дека признанието вина во услови кога обвинетиот несомнено е свесен за доказите против него и за извесноста да се соочи со санкции само по себе не треба да претставува цел на привилегирање на сторителот, особено кога се работи за кривично дело со несомнено тешки последици“, велат од Обвинителството.
Од таму велат дека како олеснителна околност судот ги ценел и семејните услови и возраста на сторителот, но јавниот обвинител истакнува дека токму возраста од 63 години не треба да ја намалува тежината на околностите бидејќи станува збор за возач со долгогодишно искуство од кого се очекува да ги знае сообраќајните правила и прописи.
Како олеснителна околност од судот е ценет и фактот дека обвинетиот и самиот претрпел трауми за време на сообраќајната несреќа, но во жалбата јавниот обвинител истакнува дека во пресудата овие трауми не се сразмерно одразени наспроти физичката болка и траумите што ги доживеала оштетената, која се соочила со загуба на сопругот и на плодот, а и самата добила тешки телесни повреди.
Изразеното сочувство и каење на обвинетиот по несреќата, изразени на главната расправа и преку писма до оштетената, за судот претставуваат исто така олеснителна околност, но, според јавниот обвинител, тие претставуваат нужен морален чин и граѓанска одговорност.
Истовремено, велат од Обвинителството, отежителните околности во пресудата се наведени без соодветна елаборација на правните аргументи, што довело до благ казнено-правен третман и објективно неосновано изречена кривична санкција, се наведува во жалбата.
Од тие причини јавниот обвинител предложи Апелациониот суд да изрече построга казна, односно казна затвор на обвинетиот, и да му се изрече забрана за управување со моторно возило.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Им побарал 10.000 евра за да им среди во постапки во Кривичен и Апелационен суд во Скопје

Јавен обвинител од Основното јавно обвинителство за гонење на организиран криминал и корупција донел Наредба за спроведување истражна постапка против едно лице осомничено за кривично дело – Примање награда за противзаконито влијание.
Како што соопшти денеска Јавното обвинителство, од април до август годинава осомничениот примил награда од 10.000 евра за да со искористување на своето претпоставено влијание интервенира да се изврши службено дејствие што не би смеело да се изврши, односно наводно да влијае врз одлуки во граѓански судски постапки пред Основниот граѓански суд Скопје и пред Апелациониот суд Скопје.
-Сведок-пријавител кој во граѓанската постапка е управител на правно лице, како што велат од Обвинителството, почнал да добива информации дека спротивната страна во судскиот спор врши сериозно влијание врз судиите кои одлучувале во првостепените и второстепените постапки давајќи поткупи за да се донесат одлуки во нивна полза. Сакајќи да ги провери таквите информации, од свој познаник-пензиониран судија добил контакт од осомничениот, кој му бил претставен како „лице кое ги познава состојбите во судовите и е близок со судии од Апелациониот суд Скопје“, се наведува во соопштението.
Сведокот и неговиот брат, како што велат од Обвинителството, се сретнале со осомничениот кој директно им побарал 16.000 евра за да се заврши спорот во корист на правното лице – семејната фирма на сведокот.
– Осомничениот ги уверувал дека другата страна давала многу повисоки износи, но судиите не сакале да се нафатат за да пресудат нешто што не било правно основано. Бидејќи сведокот му кажал дека не може да обезбеди толку пари наеднаш, се договориле за исплата на три рати. На 30 април, чувствувајќи дека нема друг избор, сведокот му дал на осомничениот 5.000 евра, по што осомничениот го уверувал да не се грижи за исходот и целиот период биле во комуникација во врска со постапката. Во тој период сведокот решил да ја пријави трговијата со влијание и при следната исплата на 5.000 евра, осомничениот е лишен од слобода веднаш по приемот на парите, се наведува во соопштението.
Јавниот обвинител до судијата на претходна постапка од Основниот кривичен суд Скопје денеска доставил предлог за определување мерка притвор за осомничениот, ценејќи дека се исполнети законските основи.
Македонија
Левица: Штрајкот во пералната на Клинички центар е аларм за распад на јавното здравство

Штрајкот на вработените во пералната на Клиничкиот центар „Мајка Тереза“ е аларм за целосен распад на јавното здравство, предупредуваат од партијата Левица. Според нив, болниците се во хаос, операциите доцнат, недостасува чиста облека, а пациентите се изложени на ризик од зарази, додека министерот за здравство Азир Алиу останува пасивен и без конкретни одговори.
„Клучното прашање е кој управува со пералната – приватната фирма ‘Скопстер’, позната по енормно високите цени и протуркана од поранешниот министер Арбен Таравари, или пак Службата за општи и заеднички работи? Додека институциите си ја префрлаат одговорноста, вработените остануваат без плати, без здравствено осигурување и со неизвесна иднина,“ велат од Левица.
Тие додаваат дека постои сомнеж за финансиско „перење раце“ меѓу институциите, кои си фактурираат високи суми за услуги, додека интересите на пациентите и вработените се оставаат на страна.
Од Левица потсетуваат и дека, во исто време кога здравството е во хаос, Владата предводена од Христијан Мицкоски најавува ново задолжување од една милијарда евра. „Резултатите во здравството се поразителни – нема нови инвестиции, нема капитални проекти и нема реформи,“ посочуваат од партијата.
Како решение, тие предлагаат инвестирање во современа перална и стерилизација по примерот на Клиниката за гинекологија и акушерство, што, според нив, би значело намалување на трошоците, помалку инфекции и побрз третман на пациентите.
„Очигледно е дека партиите на олигархијата свесно го рушат јавното здравство за да создадат простор за профит во приватниот сектор, каде цените се енормни. На крајот, најголемата штета ја плаќаат граѓаните, кои цел живот издвојувале средства за здравствениот фонд, а сега се приморани да плаќаат скапи услуги во приватни болници,“ велат од Левица.
Македонија
Помалку од еден час се чека на граничните премини Богородица и Табановце

Поради летните одмори, се бележи зголемена фреквенција на возила на граничните премини. На ГП „Табановце“ утрово времето на чекање за излез од државава е околу 30 минути, додека на ГП „Богородица“ се чека околу 40 минути, соопшти Авто мото сојузот на Македонија.
На останатите гранични премини од македонска страна, нема подолги задржувања за влез или излез од државата.
Од АМСМ информираат дека поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила.
Интензитетот на сообраќајот на патиштата надвор од градските средини е зголемен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.