Вакцинацијата се одвива непречено на сите пунктови низ државата. Интересот за вакцинација секојдневно се зголемува, а досега бројот на лица кои изразиле желба за вакцинација преку веб платформата vakcinacija.mk е 303.574 граѓани, известува министерството за здравство.

Од таму додаваат дека прва доза на вакцина вчера примиле 13.076 граѓани, а се вакцинирале вкупно 14.033 граѓани во текот на вчерашниот ден.

„Во државата вкупно се аплицирани 145.043 дози вакцини, од нив 121.181 граѓани се вакцинирани со прва доза, а ревакцинирани се 23.862 граѓани. Со последните бројки 35% од населението над 70 години имаат примено барем една доза вакцина“, велат од министерството за здравство.

Вакцинацијата се спроведува согласно Националниот план за имунизација. Се вакцинираат возрасни лица, граѓани кои искажале интерес за вакцинација на веб страницата vakcinacija.mk а се вакцинираат и лица вработени во критична инфраструктура. Масовна вакцинација се одвива во неколку градови во државата и тоа во А1 Арена – СЦ Борис Трајковски во Скопје, во спортските сали во Кавадарци, Куманово, Тетово, Штип, Битола и Охрид, објаснуваат од ресорното министерство.

Министерството за здравство апелира до граѓаните масовно да се пријавуваат на vakcinacija.mk бидејќи како што велат од таму, тоа е најлесниот и најбрз пат да се вакцинираат.

Владата денеска ќе ја одржи редовната 69-та седница, со повеќе точки на дневниот ред , информираат владините служби.

На седницата, која ќе започне во 12:00 часот, ќе биде разгледан Записникот од триесет и шестиот состанок на Главниот координативен кризен штаб за обезбедување целосна координација во врска со спречување на внесување и ширење на Ковид-19, одржан на 10.5.2021 година, со Записникот од состанокот на Комисијата за заразни болести, одржан истиот ден.

Тогаш Главниот координативен штаб и препорача на Владата нови мерки кои според нив би требало да важат од 12 до 18 мај.

Скратен полициски час, работа на угостителските објекти во отворените делови до 23:30 часот и отпочнување со работа на вежбалните, фитнес центрите и теретаните, се дел од олабавените рестриктивни мерки што Главниот координативен кризен штаб и ги препорачува на Владата, а таа треба да ги разгледа и да ги усвои на денешната седница.

Според новите мерки што се предлагаат, полицискиот час ќе трае од 24:00 часот до 05:00 часот и се дозволува користење на годишен одмор за здравствените работници. Ивентите и настаните ќе се одржуваат согласно наменските протоколи, со исполнетост до 30 проценти од капацитетот на затворениот простор, а се зголемува и бројот на деца кои може да се згрижат во една група во градинките, односно од 15 на 20 деца.

Вчера министерот за здравство Венко Филипче истакна дека се уште е рано за да се даде општа препорака заштитните маски да не се носат на отворено.

Синдикатот на АД ЕСМ (Електрани на Северна Македонија) донираше прехрамбени производи за вработените во ковид-центрите во неколку градови во државата.

Како што информираат од компанијата, 600 пакети млечни производи биле доставени до медицинскиот персонал во ковид-центрите во Битола, Струга, Кичево, Гостивар и во Кавадарци.

„Ова претставува помош и поддршка за вработените и нивните семејства во текот на верските празници Велигден и Рамазан Бајрам, кои голем број медицински лица и технички персонал ги поминаа на работните места во ковид-центрите грижејќи се за тешко болните пациенти“, се наведува во соопштението од ЕСМ.

Синдикалната организација на АД ЕСМ неколкупати досега обезбедила донации за ковид-центрите низ државата, согласно локалните потреби, додека за ковид-центрите во Битола и во Кичево дала наменска донација за обезбедување систем за довод на кислород во болничките простории.