Македонија
„Во Аеродром конечно се гради и инвестира, тоа е причината за нервозата во СДСМ“

„Денешното соопштение на СДСМ е школски пример за тоа како да напишеш нешто, а да не кажеш ништо. Напротив, уште еднаш да ја потврдиш тендерската матрица во која си влезен. СДСМ во денешното соопштение по којзнае кој пат покажа аматерско непознавање за проектите на Општина Аеродром“ информираат од скопската општина.
Оттаму посочуваат дека „денешното соопштение уште еднаш ја потврдува паниката во редовите на оваа партија, за фактот дека Аеродром забрзано се гради и развива, но и за фактот дека е ставен крај на делењето тендери по партиска директива и по желби на партии и партиски функционери“.
„Лесно е да се види што е сработено насекаде околу нас. За тоа говорат проектите, новите училишта, градинки, игралишта, улици и велосипедски патеки. Нема поубава слика од моментот кога ќе ги видиш радосните лица на дечињата кои трчаат на новото игралиште, спортистите што тренираат на спортските терени или велосипедистите кои возат по новите велосипедски патеки. Сработеното за само 365 дена е очигледно за сите аеродромци, а промената и разликата од претходните четири години е далеку повидлива во овој краток период“.
„Токму поради тоа, времето потрошено за пишување бледи нарачани соопштенија со кои се врши обид да се лаже и замајува јавноста, подобро е да се потроши за читање и следење на реализираните проекти. Подобро е да се потроши на давање конструктивни идеи и предлози, а не на неиздржани критики зад кои се крие разочараноста од поразот по само четири години и губењето на можноста за раководење со тендерските постапки кои претходно ги користеа за личен и партиски бенефит. Доволно е да провери секојдневниот отчет на општината на Фејсбук или веб-страницата на Аеродром и сé ќе биде многу појасно“ стои во општинското соопштение.
„Жителите на Аеродром следат, знаат што се случува и повеќе од јасно им е дека Општина Аеродром се води домаќински, а парите наместо на луксузирање и непродуктивни трошоци завршуваат за проекти од кои бенефит имаат сите категории граѓани. Општина Аеродром, денес е општина во која се гради и инвестира, лидер во штедење, локална самоуправа во која се работи одговорно и не се троши на скапи ручеци, превоз и трошоци за репрезентација. Тие пари се вложуваат во нови градинки, училишта, игралишта и спортски центри. И тоа е болката на СДСМ“ велат оттаму и потенцираат:
„Најубава општина во Скопје, и најубав Аеродром – таков каков што сакаат граѓаните“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бежоска: Новата алатка за споредба на надоместоците на банките ќе придонесе за зголемена конкурентност и поповолни цени за платежните услуги

Новата алатка на Народната банка за споредба на надоместоците помеѓу давателите на платежните услуги придонесува кон поголема транспарентност на банките и значително ја подобрува информираноста на јавноста за надоместоците што ги наплатуваат банките за најрепрезентативните услуги поврзани со платежната сметка.
„Преку поголемата транспарентност и олеснетата споредливост на надоместоците ќе се зголеми конкурентноста помеѓу банките што може да придонесе за поповолни цени на платежните услуги за граѓаните“, посочи гувернерката Анита Ангеловска-Бежоска.
„Заради заштитата на потрошувачите, како една од најзначајните цели на новиот закон, првпат се воведе обврската за банките да ги уредат правата и обврските на корисниците со рамковен договор во стандардизирана форма, проследен со информативен документ за надоместоците пред неговото прифаќање, што обезбедува нивна поголема информираност и сигурност при носењето на одлуките. За најчесто користените услуги, Народната банка врз основа на податоците од банките подготви листа од 11 т.н. најрепрезентативни услуги за чии надоместоци почна да прибира податоци и почнувајќи од крајот на минатиот месец овозможи нивна достапност и споредливост по банки, со користење на алатката. На овој начин граѓаните ќе може на едно место, преку веб-страницата на Народната банка, да добијат брза и лесно достапна информација за надоместоците кај секоја од банките и да направат споредба кога одлучуваат кај која банка да користат платежни услуги“, посочи гувернерката.
Таа истакна дека новиот Закон за платежните услуги и платни системи, како и дваесет и шесте подзаконски акти донесени од Народната банка, претставуваат значајно усогласување со европските стандарди и регулативи.
Скопје
Герасимовски: Наставниците и стручните служби ги завршија обуките против меѓуврсничкото насилство

Општина Центар им додели сертификати на наставниците и на стручните соработници од сите училишта во општината, кои ги посетија обуките за рано препознавање, решавање и превенција на врсничко насилство – булинг. Обуките беа одржани во соработка со здружението „Европски соѕвездија“ во КСП „Центар – Јадро“ од страна на еминентни универзитетски професори.
Градоначалникот на општина Центар, Горан Герасимовски, денеска при доделувањето на благодарниците порача дека булингот не е наивен проблем, туку крајно сериозен и како таков треба да се сфати. Тој им порача на наставниците и на стручните лица од училиштата да го применуваат стекнатото знаење од обуките и сериозно да пристапат кон решавање на проблемите со меѓуврсничкото насилство.
„Врсничкото насилство не смее да се игнорира. Тоа може да предизвика сериозни последици врз здравјето на учениците и семејството затоа ние како локални самоуправи имаме одговорност да ги преземеме сите мерки и активности за поголема безбедност во образовните установи. Нашите наставнички и стручниот кадар ги завршија обуките за рано препознавање и решавање на булингот меѓу учениците и искрено верувам дека новите знаења што ги добија од професори стручни во областа ќе ги применат во пракса и ќе преземат соодветни мерки кога ќе препознаат меѓуврсничко насилство меѓу учениците. Во оваа пригода ги повикувам и родителите да се вклучат во целиот процес. За искоренување на оваа појава, сите три алки се исклучително важни: наставници, стручна служба и родители. Воспитувањето доаѓа од дома затоа да разговараме за проблемите, да укажеме на примерното однесување и да зборуваме за последиците од исмевањето“, рече Герасимовски пред присутните.
Општина Центар се грижи за здравјето и иднината на учениците затоа вложува во континуирана едукација на образовниот кадар, во подобро утре за децата и следните генерации.
Македонија
Поведена постапка за делови од Законот за средното образование кои се однесуваат на користење бесплатен јавен превоз

Судот, постапувајќи по иницијативата на Лука Павиќевиќ од Скопје, одлучи да се поведе постапка за оценување на уставноста на членот 41-а став 1 во делот „јавно” од Законот за средното образование, информираат од Уставниот суд.
„Исто така, по сопствена иницијатива, Судот одлучи да се поведе постапка и за оценување на уставноста на став 3 во делот „јавното“ од истиот член.
Причината за постоење основано сомнение во уставноста на овие делови од одредбите од Законот за средното образование, е што според Судот, со истите се повредува уставниот принцип на еднаквост, на начин што се воспоставува различен третман за учениците во јавните, во однос на учениците во приватните средни училишта при користењето на бесплатен превоз до училиштето, односно се предвидува ова право да го користат само редовните ученици во јавните средни училишта.
Судот одлучи да не поведе постапка за оценување на уставноста на член 41-а став 2 од Законот за средното образование“, се додава во соопштението на Уставниот суд.