Македонија
Општина Ѓорче Петров: Улицата кај училиштето „Мирче Ацев“ е критично место на кое во иднина ќе има семафор
Општина Ѓорче Петров се огласи со соопштение во врска со сообраќајната незгода на улицата Борис Сарафов, поточно кај училиштето „Мирче Ацев“, во која вчера беше повредено 10-годишно дете. Како што информираат оттаму, во координација со Град Скопје договорено е на критичното место да биде поставен семафор.
„Со ваквата постапка очекуваме целосно да се реши проблемот со сообраќајот, брзото возење и непочитување на пешаците што минуваат на пешачкиот премин кај училиштето ‘Мирче Ацев’“, се наведува во соопштението од Општината.
Градоначалникот на Ѓорче Петров, Александар Наумоски, денеска даде изјава во врска со немилиот настан, при што вети дека додека е тој градоначалник, никогаш повеќе нема да се случи таков инцидент на тоа место.
„Како градоначалник, жител на општината и родител изразувам големо жалење за незгодата, при што повредено е дете што е наш сограѓанин. Посакувам што побргу да закрепне и се надевам дека по решавање на сообраќајниот проблем, никогаш повеќе во мојата општина, на тоа место, нема да се повтори ваков немил настан, кој, за жал, се повторува. Во повеќе наврати, заедно со релевантните засегнати страни, но и невладини организации што работат на проблематиката, како Општина инициравме средби на оваа тема, а дебатиравме за можни решенија токму пред неколку дена во мојот кабинет“, рече градоначалникот.
Тој воедно повика на свесност и совесност кај возачите што сообраќаат по таа улица, на која, поради училиштето, во најголем број се движат деца. Покрај тоа, Наумоски апелира до родителите за разумност и смирување на тензиите поврзани со настанот.
„Исто како и тие, и јас очекувам преку конкретен проект конечно решавање на проблемот“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сообраќајот се одвива во зимски услови, по наместа влажни коловози
Сообраќајот на државните патишта се одвива во зимски услови, по наместа влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар и Чаир денеска без вода
Од ЈП Водовод и Канализација известуваат дека денеска имаат планирани два зафати во водоводната мрежа и тоа:
· поради уличен дефект на ул.Адам Мицкиевиќ бб (пред ОУ „Киро Глигоров“), прекинато водоснабдување ќе имаат корисниците од следниве улици: Адам Мицкиевиќ-вклучително и основното училиште, дел од Козара и дел од Васил Ѓорѓов, општина Центар. Водоснабдувањето ќе биде прекинато од 08:30 часот до завршување со санација на дефектот.
· поради уличен дефект ф-225м на ул.Отокар Кершовани бб , прекинато водоснабдување ќе имаат корисниците од следниве улици: Отокар Кершовани,вклучително Амбуланта „Бит Пазар“, Петре Георгиев и Чаирска, општина Чаир.
Водоснабдувањето ќе биде прекинато од 08:00 часот до завршување со санација на дефектот.
Македонија
Променливо облачно со умерен до засилен ветер од југоисточен правец
Променливо облачно со умерен до засилен ветер од југоисточен правец. Попладне и во текот на ноќта ќе има локални врнежи од дожд, кои ќе бидат пообилни во југоисточните делови. На повисоките планини врнежите ќе бидат од снег.
Минималната температура ќе биде во интервал од 2 до 7, а максималната ќе достигне од 7 до 11 степени.
Во Скопје, променливо облачно со умерен, повремено засилен ветер од југоисточен правец. Кон крајот на денот, а особено во текот на ноќта ќе има повремени врнежи од дожд. Минималната температура ќе се спушти до 4, а максималната ќе достигне до 10 степени.
Времето во наредните денови
Од денеска следува период на променливо облачно време со повремени локални врнежи од дожд со променлив интензитет. На повисоките планини врнежите ќе бидат од снег. Ќе дува слаб до умерен, а во текот на денешниот ден засилен ветер од југоисточен правец. Температурите ќе бидат во пораст.

