Од денес љубителите на велосипедизмот може да уживаат во втората велопатека, која е пуштена на Водно, информира преку напис на својата фејсбук-страница градоначалникот на Скопје, Петре Шилегов.

„Новата планинска велосипедска патека е долга 3,64 км и широка 3 метри, со специјално изработени безбедни свиоци и рампи. На патеката нема пресеци и мешање со пешачки патеки, што ја прави многу безбедна. Патеката спаѓа во таканаречената семејна категорија. Таа е истовремено безбедна за употреба од страна на сите генерации, но апелираме таа да се користи исклучиво со соодветна заштитна опрема. Новата велопатека Flow е наменета за надолно движење со која се комплетира трасата Скопје – Средно Водно – Скопје“, напиша Шилегов.

За да можеме да ја доживееме убавината на велопатеките што ги направивме на Водно, ги повикуваме сите љубители на природата, в недела, 24 октомври, да го посетат вториот Фестивал за алтернативен туризам, кој ќе се одржи на Средно Водно. Настанот е со почеток во 10 часот и учество ќе земат сите најголеми дистрибутери на велосипеди и велосипедска опрема, а ќе биде проследен секако со добра забава, дополни Шилегов во информацијата на социјалните мрежи.

Претседателот на ВМРО-ДПМНЕ, Христијан Мицкоски, вечерва на средба со граѓаните на општина Демир Хисар го повика Заев да си поднесе оставка веднаш прашувајќи дека доколку ја разбрал пораката од граѓаните од првиот круг на локалните избори, тогаш зошто не ја потпише оставката на Филипче бидејќи државата, како што рече, е прва по смртност поради ковид-пандемијата, како и на Љупчо Николовски, кој е министер за борба против корупцијата, а Македонија е најкорумпирана во Европа.

„Ако ја разбрал пораката тогаш нема да чека избори и веднаш ќе си замине. Ако ја разбрал пораката, тогаш зошто не ги потпише веднаш оставките на Филипче и Љупчо Путерот. Едниот поради тоа што е министер во земја што е прва по смртност во Европа поради Ковид-19, вториот поради тоа што е министер во Влада за борба против корупцијата, а Владата е најкорумпирана во Европа? Еве јавно го повикувам да потпише оставка ако ја разбрал пораката“, нагласи Мицкоски.

„Вистината е дека не разбрал ништо. Дека и денес продолжуваат списоците за поткуп и чизмата со која го газат народот за да гласа за нив. И затоа ви велам најдобар одговор е одѕивот. Демир Хисар беше особено подложно на таквите притисоци. Отфрлете ги стегите. Масовно да излеземе затоа што нивниот поткуп така ќе стане беспредметен. Ја крадат Македонија, да не дозволиме да ја украдат и заедничката иднина. Затоа да се мобилизира народот и да излезе масовно на овие избори“, порача Мицкоски.

Во еден од урбаните делови од Карпош, каде што до сега се закопуваше нелегален отпад, треба да никне нов парк затоа што, наместо да расте бројот на диви депонии, јас се обврзувам на нивно итно чистење и на што е можно повеќе зелени површини, изјави независната кандидатка за градоначалник на град Скопје, Данела Арсовска, за време на посетата на општина Карпош.

На средбата со карпошани, од населбите Карпош 4, Карпош 1 и Жданец, Арсовска понуди отвореност, транспарентност и заедничка соработка при надминување на проблемите со кои се соочува општината. Според неа, главен предизвик за овие жители е справувањето со урбаната мафија, која сѐ повеќе го зема својот замав со појава на згради на секое ќоше, а потребно е и итно изнаоѓање соодветни паркинг-решенија.

„На неконтролираното градење ќе му дојде крајот со изработката на детаљни урбанистички решенија креирани во соработка со експерти. Сообраќајниот хаос ќе се реши со достапен и ефикасен јавен превоз и брзи сообраќајници што ќе ги поврзуваат сите населби. Кејот на Вардар од двете страни ќе добие комплетно уредување и нов современ изглед, а ќе бидат поставени и спортски содржини – патеки за трчање и за велосипеди. Затворените врати на општинските служби ќе бидат минато затоа што предвидувам отворање канцеларија што ќе биде во служба на граѓаните, 24/7 за итни интервенции и постојано ќе излага во пресрет на нивните барања поврзани со градот. Граѓаните имаат прво да одлучат за тоа каква ќе биде нивната иднина и затоа нивниот глас мора да биде најизразен во работењето на секоја општина“, посочи Арсовска.

За жителите од Жданец, пак, приоритетно е да се реши квалитетното водоснабдување, а Арсовска рече дека тоа ќе се овозможи преку поврзување втора јужна висока зона од Жданец во Карпош.

„Не само во Жданец, на ниво на целата општина ќе има подобрување на инфраструктурата, ќе се замени фекалната канализација и ќе се почне со асфалтирање. Овие проблеми од моја страна се детектирани претходно и веќе имам издржан план и реални проекти со кои ќе ги надминеме овие недостатоци уште во првите денови од мојот мандат“, заклучи Арсовска.