Македонија
Отворена нова градинка во Лозово
Министерката за труд и социјална политика, Јагода Шахпаска, денеска присуствуваше на отворањето на новата детска градинка „Срцко“ во општина Лозово. Таа изрази големо задоволство што токму на Светскиот ден на човековите права, 10 Декември, отворањето на новата градинка е во знак на почитување и вреднување на еднаквоста на сите граѓани во нашата држава, вклучително и децата.
„Денес, на Светскиот ден на човековите права, потврдуваме дека за нас – сите граѓани се еднакви, дека за нас – сите граѓани треба да уживаат исти права, вклучително и децата. Децата во Лозово ќе имаат исти услови како децата во големите градови. Инвестираме во предучилишното образование затоа што тоа ја гради основата на еден млад детски организам, кој понатаму во текот на своето образование треба да прерасне во градител на нашата татковина“, изјави министерката Шахпаска.
Градинката „Срцко“ има капацитет да згрижи 32 деца, поделени во две групи. За нејзина изградба и опремување Министерството за труд и социјална политика инвестира околу 13 милиони денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денес без вода повеќе скопски улици во општините Бутел и Гази Баба
ЈП „Водовод и канализација“ – Скопје информира дека денеска поради два одделни зафати на водоводната мрежа, повеќе скопски улици и населби ќе останат без вода или со намален притисок во снабдувањето.
Од претпријатието соопштуваат дека поради уличен дефект од ф-400 мм на ул. Бутелска б.б, кај сервис „Топал“, во периодот од 11:00 часот па сè до негово отстранување, без вода ќе бидат корисниците на улиците Хо Ши Мин, Марко Крале, Призренска, Петар Манџуков, Александар Бујнов, Краишка, Коле Канински, како и корисниците на Бутелска – од крак 1 до крак 35 и од крак 2 до крак 14, на подрачјето на општина Бутел.
Исто така, денеска, поради технички зафат на бул. Александар Македонски б.б, во периодот од 05:00 часот па до завршување на работите, без вода ќе останат корисниците на бул. Александар Македонски, улиците Палмиро Тољати и Маџари, жителите од населбата Методија Андонов – Ченто и село Сингелиќ, како и дел од корисниците на ул. 808 и бул. Киро Глигоров, на територија на општина Гази Баба.
Намален притисок во водоснабдувањето, како што информира ЈП Водовод и канализација, ќе имаат и корисниците од населбата Автокоманда – ниска зона, како и од населбите Триангла и Хиподром, како и корисниците на ул. Перо Наков во близина на Кванташкиот пазар.
Македонија
Поплавени дворови, подруми и ниви во Општината Чешиново – Облешево, не се чистеле каналите
Во Општината Чешиново – Облешево во повеќето од населени места се поплавени дворови, подруми, ниви со неожнеан ориз и житни култури, што е резултат на обилните дождови што го зафати регионов неделава. Веќе неколку дена се користи градежна механизација, пумпите на Територијална противпожарна единица од Кочани, исто така работат со полна пареа. На ваков начин се прават обиди да се санираа штетите и да не се дозволи водата од каналите и реките да влезе во селата.
Кризничиот штаб на Општината Чешиново-Облешево е на терен, а градоначалникот Јорданчо Костадинов бара помош и од државните институции за да се справат со поплавите.
– Ние, со малите можности што ги имаме со Јавното комунално претпријатие, неколку дена се бориме со овој проблем и бараме најсоодветни решенија. Излезени сме на терен со капацитетите кои ги имаме, но сепак морам да апелирам до целата јавност да пружи помош на нашата општина, бидејќи со тоа што ние го располагаме како капацитет не е доволно да се справиме со овој проблем, алармира градоначалникот на Општината Чешиново – Облешево.
Мештаните на Чешиново и Облешево велат дека причина за поплавите во нивните села се неисчистените канали, појава, што според нив, се повторува повеќе години наназад.
Во понеделник во поплавеното подрачје ќе се формира Комисија, а граѓаните ќе имаат можност да пријавуваат штети.
Македонија
Облачно со сончеви периоди, на некои места слаб снег
Времето денеска ќе биде променливо облачно со сончеви периоди. Во утринските часови наместа ќе провејува слаб снег. Ќе дува слаб до умерен ветер од северозападен правец. Минималната температура ќе биде во интервал од -2 до 3, а максималната ќе биде во интервал од 7 до 13 степени.
Во Скопје, времето ќе биде променливо облачно со сончеви периоди. Ќе дува умерен северен ветер. Минималната температура ќе се спушти до 0, а максималната ќе достигне до 9 степени.
До вторник ќе биде претежно облачно и суво, а во среда ќе има врнежи од дожд кои ќе бидат пообилни во западните делови. На некои од повисоките планини врнежите од дожд ќе преминуваат во врнежи од снег. До крајот на неделата во утринските часови ќе има појава на магла во одделни котлини.

