Македонија
Партија на Турците: Полициски службеници нѐ држеа еден час, МВР итно да преземе мерки
 
																								
												
												
											Изборниот караван, предводен од претседателот на Партијата за движење на Турците – ТХП, Енес Ибрахим, вчера, од страна на полициски службеници бил спречен да ги реализира своите изборни активности во село Корешница, општина Демир Капија,
„Нашиот караван беше пресретнат од полициско возило без функционална сигнализација и соодветна ноќна безбедносна опрема. Полициските службеници постапија на крајно непрофесионален, недоличен и агресивен начин, задржувајќи нè цел час во центарот на селото, при што предизвикаа вознемиреност и кај локалното население“, велат од партијата.
Според партијата, ваквиот пристап е неприфатлив за едно демократско општество, особено што станува збор за инцидент кој се случува во екот на изборната кампања. Наместо да внесе чувство на сигурност и доверба кај граѓаните, велат од ТХП, полицијата демонстрира однесување кое создава страв и притисок.
Од Партијата на Турците велат дека за овој немил настан се информирани сите релевантни меѓународни организации кои го следат изборниот процес, а ќе бидат поднесени и соодветни пријави до Министерството за внатрешни работи.
„Апелираме до МВР итно да преземе мерки за целосно расчистување на случајот и да стави крај на полициската агресија врз граѓаните. Партијата за движење на Турците – ТХП и турската заедница нема да подлегнат на вакви провокации и притисоци. Напротив, продолжуваме со уште поголема решителност и мотивација да ги реализираме нашите изборни активности, со единствена цел – демократски, транспарентни и фер избори“, велат од партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Македонија
(Видео) Трајановски: Аеродром заслужува промени, време е за единство и верба во подобра иднина
 
														Кандидатот за градоначалник на Општина Аеродром од СДСМ, Александар Трајановски, во изјава за медиумите порача дека резултатите од првиот изборен круг покажале јасно опозициско расположение меѓу граѓаните и желба за промени.
„Граѓаните испратија порака дека се уморни од застојот, ароганцијата и самоволието на локалната власт предводена од ВМРО-ДПМНЕ“, изјави Трајановски, повикувајќи на масовно гласање во вториот круг на 2 ноември.
Тој нагласи дека сега е моментот незадоволството да се претвори во одлучна волја за промена и ги повика сите граѓани, без оглед на партиска припадност, да се обединат за подобра иднина.
„Да го покажеме нашето единство, нашата решеност и нашата верба во подобра иднина. Аеродром заслужува општина која ќе се развива транспарентно, со вистински проекти и грижа за секој жител“, порача Трајановски, додавајќи дека резултатите од првиот круг веќе покажале дека промените се возможни.
Македонија
Условна казна за едниот од напаѓачите на градоначалничката Арсовска
 
														Реџеп Нуредини доби условна казна од две години затвор, која нема да се изврши доколку во наредните пет години не стори ново кривично дело.
Тој беше обвинет дека заедно со Сулејман Љамалари, кој веќе е осуден, во јули ја нападнал и навредувал градоначалничката на Град Скопје, Данела Арсовска за време на инцидент во Чаир, каде било постапувано во однос на дивограба.
Нуредини денеска пред судот признал вина и изразил искрено каење.
Адвокатот на обвинетиот, Насер Рауфи, изјави дека Арсовска покажала доблест и простила, што придонело судот да изрече алтернативна, условна казна.
Сулејман Љамалари беше осуден на две години затвор за физички напад врз Арсовска за време на увид на терен.
Македонија
Филипче го повика членството да гласа по сопствено убедување во општините кадешто СДСМ нема кандидати за градоначалници
 
														Претседателот на Социјалдемократскиот сојуз на Македонија, Венко Филипче, на денешната прес-конференција, порача дека во општините каде што СДСМ нема кандидат за градоначалник во вториот круг, нема да има калкулации, членовите да гласаат според сопственото убедување и за вредности кои се блиски до социјалдемократијата.
„Ние нема да навлегуваме, ниту навлеговме, во калкулации или во некакви задкулисни договори. Секој граѓанин, секој член, секој симпатизер има целосно право да одлучи согласно сопственото убедување според тоа кој кандидат носи вредности блиски до социјалдемократската идеја и до социјалдемократските вредности за чесно владеење, за почит, за еднаквост и за развој“, рече Филипче.
На прес-конференцијата Филипче посочи дека на втори ноември, во недела секој глас може да направи разлика и ги повика граѓаните да гласаат за локална власт која ќе биде секогаш отворена за нив и нивните потреби.
„Гласајте и изберете локална власт која е вистински сервис за граѓаните, за кандидати што нема да ја затворат вратата. После изборите таа врата ќе биде отворена за секој, кога било кој граѓанин ќе има потреба и кога некој граѓанин ќе сака да биде слушнат. Тоа е глас за луѓе кои ги исполнуваат ветувањата и кои интензивно и силно и посветено ќе работат да живееме подобри општини и градови во иднина“, порача претседателот на СДСМ.
Филипче повика на масовна излезност, со порака дека граѓаните треба да го продолжат трендот на опаѓање на поддршката за владејачката гарнитура.
„Овие избори се шансата да се покаже дека народот не се купува, не се лаже и не може да се потцени. Сметам дека треба да продолжи трендот на пад на поддршката на оваа владејачка гарнитура. ВМРО-ДПМНЕ изгуби над 140.000 гласа за само една година, тоа е јасен сигнал дека опозициското расположение расте“, рече Филипче.
Тој истакна дека власта не понудила решенија за проблемите на граѓаните и покажала „невиден степен на ароганција“.
„Гласањето е нашиот најмоќен протест против неспособноста и најсилен отпор на апатијата. Во недела сигурен глас може и ќе направи разлика“, порача Филипче.
Тој ги повика граѓаните да излезат масовно и да гласаат за кандидатите на СДСМ и коалицијата.
„Гласајте за чесни и отчетни луѓе кои ќе работат исклучиво во интерес на граѓаните, за локална власт што ќе биде вистински сервис на народот.“ рече претседателот на СДСМ, Венко Филипче.


 
									 
																	 
									 
																	 
									 
																	 
									 
																	 
									 
																	 
									 
																	 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											