Македонија
Пендаровски може да придонесе, но комуникацијата околу преспанскиот договор треба да оди преку МНР, велат од неговиот Кабинет

Претседателот Стево Пендаровски е подготвен да придонесе за да се пролонгира рокот за замена на личните документи, но комуникацијата околу преспанскиот договор треба да оди преку МНР, велат од неговиот Кабинет.
„Преспанскиот договор е потпишан од министрите за надворешни работи, во име на владите на двете држави и размената на информации во таа смисла треба да се одвива во тие рамки. Со оглед на тоа што Преспанскиот договор е важен и во контекст на нашите преговори со Европската Унија информирањето кон Брисел треба да се одвива и преку Секретаријатот за европски прашања“, велат од Кабинетот на Претседателот, во изјава за „Макфакс“.
Во рамки на севкупните напори на државата, претседателот Пендаровски, како што се додава, е подготвен да даде свој придонес преку комуникација со претседателката на Хеленската Република.
Дополнително, од тука укажуваат дека ако Владата го смета добар предлогот на претседателот, може веднаш да почне со иницијатива за негова реализација, наспроти премиерот Ковачевски кој претходно денес рече дека Владата ќе почне да постапува откако Пендаровски ќе разговара со својата колешка во Грција.
Според Ковачевски, комуникацијата по ова прашање треба да се одвива на ниво на претседатели на држави, бидејќи Пендаровски бил вклучен во подготовката на преспанскиот договор, при зачленувањето во НАТО.
Предлогот за пролонгирање на вадењето на личните документи прв го даде претседателот Пендаровски во телевизиско интервју на „Сител“. Тогаш тој рече дека законскиот рок 12 февруари за вадење на новите документи, може да се смени со законски измени за еден ден и да се пролонгира до септември поради големиот метеж на пунктовите.
„Прво, тоа е срамно понижување на македонските граѓани. И непотребно. Второ, ова им го предложив на најмалку двајца министри во македонската Влада – со брза интервенција во два закона – Законот за личната карта и Законот за патните исправи и ако е потребно и Законот за безбедност во патниот сообраќај, тоа се прави во едно попладне, знаеме дека може да се направи во едно попладне, не мора со европско знаменце да биде. Ќе ги измениме тие два закона, ќе го пролонгираме рокот, наместо февруари, да биде септември-октомври, претходно ќе ги известиме и Грците дека немаме намера да бегаме од обврските од преспанскиот договор“, рече Пендаровски.
Договорот од Преспа предвидува дека промената на личните документи треба да го следи отворањето на поглавјата со ЕУ и тоа да заврши пет години оттогаш.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Гинов: Во ниту еден момент не е доведено во прашање водоснабдувањето на Битола

Изнесени се опасни лаги и манипулации од партиска говорница на една политичка партија, дека „ќе секнат чешмите во Битола“ и сакам јавно да побарам од советничката од СДСМ Мирјана Захариевска Ралевска да им се извини на битолчани и одговорно тврдам дека во ниту еден момент водоснабдувањето на Битола не е и нема да биде доведено во прашање, кажа денеска на прес-конференција Андреј Гинов, директор на ЈКП Водовод Битола.
„Околу „загубата“ на ЈКП Водовод Битола ќе кажам само неколку работи: -вкупните приходи за 2024 година се околу 284 милиони денари, вкупните расходи се околу 346 милиони денари, што продуцира загуба од околу 61 милион денари. Ако се земат предвид само неколку ставки на расходи и приходи ќе се види јасно зошто е тоа така. Вкупен приход од наплата на вода од правни и физички лица е околу 262 милиони денари, а од останатата реализација е околу 22 милиони денари, а додека расходите по само три основи и тоа : електрична енергија околу 43 милиони денари, сирова вода- кон „Стрежево“(заради сушата минатото лето) околу 50 милиони денари и трошоци за плати за вработените 148 милиони денари – што дава вкупен расход кога се додава и ДДВ по само три ставки е повеќе од 280 милиони денари“, рече Гинов.
Ова, според него, покажува дека целокупниот приход при висока наплата на сметки од околу 95% е близу вкупниот расход за само овие три ставки.
„Само за илустрација би кажал уште две споредби и тоа: во 2021 година во ЈКП Водовод имаше вкупно 227 вработени и трошокот за плата изнесуваше околу 107 милиони денари, а сега во 2024 год. има вкупно 205 вработени (22 вработени помалку) а трошокот за плати изнесува околу 148 милиони денари што е за 41 милион денари повеќе при значително помал број на вработени.
Во текот на 2021 година „Водовод“ влезе во непотребна инвестиција за „нова управна зграда“ за која што се потрошени повеќе од 60 милиони денари колку што изнесува сегашната загуба на ЈКП Водовод Битола“, истакна Гинов.
Македонија
Николоски: Пријателска средба со Мевлут, мој и на Македонија голем пријател

„Пријателски разговор со Мевлут Чавушоглу, пратеник во Турскиот парламент и поранешен министер за надворешни работи на Република Туркије“, напиша на фејсбук профилот, вицепремиерот и министер за транспорт Александар Николоски.
„Разговаравме за долгогодишната соработка помеѓу двете држави како и за можностите за засилена соработка во делот на економијата и потенцијални нови инвестиции.
Соработката и пријателството помеѓу двете држави и во иднина ќе ги зајакнуваме и продлабочуваме“, напиша вицепремиерот Николоски.
Македонија
Мицкоски: Потребен е механизам за спречување блокади на билатерална основа

Да се воведат механизми кои нема да дозволат билатерални спорови да се пречка за остварување на заедничка цел, порача премиерот Мицкоски од состанокот на постојаниот комитет на парламентарното собрание на НАТО чиј домаќин е земјава.
Според него, досега биле направени многу отстапки и одрекувања за остварување на државните цели како што е членството во НАТО, но како што вели, потребен е механизам за спречување блокади на билатерална основа, со кој ќе се одблокира и европската иднина за државата.
„Пријатели си помагаат, но и пријатели искрено си ги кажуваат своите чувства и забелешки. Сметам дека треба да се размисли и за воведување на механизми каде нема да се дозволи билатерални спорови да бидат пречка за остварување на колективната и заедничка цел. Ако ние сите заедно ја чуваме куќата, тогаш и заедно имаме право да си ги кажеме нашите проблеми, разочарувања и очекувања. Ние ќе останеме лојален партнер, и заедно и посветено ќе работиме кон остварувањето на колективните цели“, истакна премиерот.
Пред шефовите на парламентарните делагации од земјите членки на НАТО, Мицкоски се осврна и на трагедијата во Кочани по која сојузниците ја покажале својата солидарност. Помош понудиле десет европски држави, а преку механизмот за цивилна заштита на ЕУ дел од повредените заминаа на лекување во странство.
„Оваа трагедија ни покажа дека солидарноста не е само збор, туку дело што ги поврзува народите. Таа е темелот на нашата Алијанса-принцип што не води во заедничките напори за зачувување на мирот и безбедноста. Солидарноста значи дека кога еден од нас страда, сите страдаме. Кога еден е во неволја, сите притрчуваме на помош. Во изминатите пет години од нашето членство во НАТО, активно придонесувавме кон колективната безбедност и стабилност на Алијансата“, кажа Мицкоски.
Состанокот на Парламентарното собрание на НАТО кој се одржува во Скопје доаѓа на петгодишнината од членството на земјава во северноатланската алијанса, а денеска се одбележуваат и 76 години од основањето на НАТО како камен темелник на европската и северноамериканската безбедност..