Ние во Скопје немаме видено француски предлог, изјави претседателот Стево Пендаровски во рамки на заедничката конференција со претседателот на Европскиот совет Шарл Мишел во Охрид.

Претседателот рече дека разговори меѓу Софија и Скопје на ниво на Министерствата за надворешни работи се случуваат со месеци.

„Дали има или не францускиот предлог е интерна работа на ЕУ бидејќи во овој момент станува збор за преговори што тие ги прават меѓу себе, во функција на подготовки за заклучоците за 23 јуни на самитот што Франција како претседавач е должна да ги поднесе на усогласување до сите земји членки. Ние во Скопје тука немаме видено француски предлог“, рече Пендаровски одговарајќи на новинарско прашање.

Тој не сакаше да ги коментира случувањата на политичката сцена во Бугарија, бидејќи тоа, како што рече, е внатрешна работа на Софија.

Утрово, бугарската новинска агенција БГНЕС објави дека бугарскиот премиер Кирил Петков до Народното собрание ќе го испрати францускиот предлог за укинување на ветото на Северна Македонија за почеток на преговорите за членство во Европската Унија. Ова го споделил самиот Петков пред своите најблиски соработници.

Како што пренесува бугарската новинска агенција, Петков се пофалил дека „детално е запознаен со шемата како ќе се случи сето ова“.

„В четврток, на 16 јуни, официјално ќе биде испратен до сите земји членки на ЕУ, а јас лично утре го испраќам до парламентот“. Ова биле токму зборовите со кои се пофалил и дека „Лично Емануел Макрон и Олаф Шолц стојат цврсто зад мене“, напиша БГНЕС.