Партијата на обединети демократи на Македонија – ПОДЕМ изразува голема загриженост по однос на продолжувањето на преговорите и договорите за името, а истовремено, велат од партијата, и загриженост за веќе недозволениот однос на нашите преговарачи кога станува збор за името Република Македонија.

„Несериозноста на преговарачите оди до таму што Заев им ги одзеде гордоста и достоинството на Македонија и македонскиот народ, ова е веќе уништување на македонскиот идентитет и изигрување на македонската историја, си дозволивме името Македонија денес да стане потсмев и неверување кај граѓаните, дека до толку несериозни можат да бидат премиерот и сите околу него, кои си дозволија како од ракав да ги извлекуваат предлозите и прифаќањето на сè и сешто, само и само да се задоволат барањата на соседна Грција“, велат од ПОДЕМ.

Од таму велат дека сите досегашни информации за името ги добиваме само од грчките медиуми, а дека Заев конечно се огласил по одржувањето на лидерската средба.

„ПОДЕМ недвосмислено повикува да не си играат со нашата држава, да не ја доведуваат до разнебитување и потсмев во светот и колку е возможно најбрзо да си се повлечат од т.н. преговори и конечно да разберат дека граѓаните не сакаат менување на уставното име. Мора да сфатат дека името на Република Македонија не е за потсмев, за со него соседите да си ја тераат водата на својата воденица.  Повикуваме граѓаните на Република Македонија заедно со опозицијата, МАНУ и сите здруженија и загрижени граѓани на Р Македонија да не дозволиме и понатаму да си поигруваат со нашето уставно име и јасно да ка кажеме ‘не’за менување на уставното име Република Македонија“, се вели во соопштението.