Македонија
Почина академик Ратко Јанев

Академик Ратко Јанев почина синоќа во 81 година од животот. Беше редовен член на Македонската академија на науките и уметностите.
Посмртните останки на академик Јанев ќе бидат изложени во петок во 13:30 часот во капелата на Новобежаниските гробишта во Белград, а погребот ќе се изврши во 14:15 часот.
Ќе биде одржана комеморативна седница за што јавноста ќе биде дополнително известена, информираат од МАНУ.
Академик Ратко K. Јанев е роден 1939 година во Сандански, Бугарија. Дипломирал на Електротехничкиот факултет во Белград, специјализирал на Државниот универзитет во Ленинград, а докторирал на Природно-математичкиот факултет во Белград. Работел на Институтот за нуклеарни науки „Борис Кидрич“ во Винча, а продолжил со работа на Институтот за физика во Белград. Предавал на ПМФ во Белград и на ПМФ во Скопје (1970 – 1973), а бил професор и на повеќе универзитети во Европа, Америка, Јапонија и во Кина. Соработувал со врвни светски истражувачки институции. Раководел со прогамата на Меѓународната агенција за атомска енергија (Виена) за истражувањата во контролираната термонуклеарна фузија (1988 – 1999). Објавил над 300 научни трудови, а автор или коавтор е на 7 монографии и 27 ревијални статии.
Бил член на Советот за електронски и атомски судири на Европското физичко општество (1993 – 1997), како и на научни комитети на бројни меѓународни конференции. Заедно со проф. А. Далгарно ја иницира Меѓународната конференција за атомски и молекуларни податоци и нивната примена (1998). Добил Homage oд Слободниот универзитет на Брисел (1979). Беше член на Joint Institute for Laboratory Astrophysics, Боулдер, САД (од 1982).
Добитник е на престижната Хумболтова награда за истражувања во контролираната термонуклеарна фузија (2004).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петровска до Николоски: Спроведовте ли надзор над општина Чаир за дивоградбите?

Пратеничката на СДСМ Славјанка Петровска, во рамките на седницата на Парламентот посветена на пратенички прашања, до министерот за транспорт Александар Николоски упати прашање дали наредил или спровел надзор во врска со законитоста на работењето на општина Чаир во областа на урбанистичкото планирање, изведувањето на градби, бесправно изградените објекти, комуналните работи и домувањето.
„На интернет страницата на Министерството, е објавен документ насловен како Нацрт Стратешки план 2025-2027. (…) Во истиот тој документ е наведено дека, во рамките на министерството постои еден сектор за управно – надзорни работи, кој ги врши работите кои се однесуваат на решавање по жалби и поднесоци на физички и правни лица од областа на изведувањето на градби, утврдувањето правен статус на бесправно изградените објекти, градежното земјиште итн, како и врши надзор над законитоста на работата на органите на општините, општините во градот Скопје и градот Скопје при остварување на нивните надлежности, кои се наброени“, рече Петровска.
Таа се осврна на објавите на актуелната градоначалничка на Скопје, Данела Арсовска, за која рече дека презентира обвинувања за епски криминал, кои не се поврзани само со економски криминал, туку веќе имаат и елементи на загрозување на безбедноста и сигурноста на граѓаните и тие, во најгиолемиот дел, се однесуваат на незаконски постапувања од градоначалникот на општина Чаир.
„И бидејќи во ушите ни одѕвонува она: и брат да ми е, ќе одговара и нема веќе од партија се јавија и итн, ве прашувам, дали се помрднавте малку во врска со овие обвинувања? Или не Ви е брат, ама коалиционен партнер ви е. Дали проверивте што се случува во таа општина. Дали ја спроведивте вашата законска должност, надлежност за надзор, она за што сте платен од граѓаните? Она што го претходно прочитав, а го цитирав исклучиво од документот што го споменав се однесува на ваши ветувања, ваши писмени изјави, обраќања во кој самиот кажувате дека детално ќе ја утврдите актуелната состојба и ќе известите за реализираните активности во изминатиот период.
И затоа моето директно прашање до Вас е: Дали наредивте или спроведовте надзор над законитоста на работата на општина Чаир, во врска со урбанистичкото планирање, изведувањето на градби, бесправно изградените објекти, комуналните работи и домување“, праша Петровска.
Македонија
(Видео) Арсовска: Според документите на Ганиу, 11-годишно дете ја изградило 12-катницата во Чаир и поднело барање на нотар, ова е криминал

Документи со 20 случаи за незаконски легализации на дивоградби во Општина Чаир се поднесени до Основното јавно обвинителство за гонење на организиран криминал и корупција, од страна на Град Скопје.
Градоначалничката, Данела Арсовска, рече дека станува збор за згради – дивоградби во оваа општина, со што буџетот на граѓаните е оштетен за 225 милиони евра.
Со оглед на тоа што Законот за легализација се применува за објекти не понови од 2011 година, Арсовска објави сателитски снимки набавени од Агенцијата за катастар во 2017 година, на кои, како што рече, ја нема 12-катницата за која неодамна обелодени дека е дивоградба. Магично, вели Арсовска, во втората половина на 2023 година отпочнува плоча, што станува зграда на 12 ката во 2024 година.
Градоначалникот Висар Ганиу, според зборовите на градоначалничката, се обидел да ги убеди дека сè е легално.
„Оваа зграда, изградена во 2024 година, ја аплицирал со свое барање извесен Беким Аземи, кој што е брат на претходниот 15-годишен иноватор, Бујар Аземи. Иновацијата е што Беким Аземи е најмладиот претприемач во Македонија во изминатото столетие. Тој, според документацијата што ни ја презентира Висар Ганиу, односно лаже Ганиу, ја изградил оваа зграда во 2010 година кога имал само 11 години со 1 милион евра, а на 12 години своерачно поднел барање за легализација. Затоа и не е чудо што сме четврта најјака економија во Европа, затоа што нашите млади уште од 12 години градат згради во Чаир и аплицираат и стануваат милионери“, изјави Арсовска.
„Ова се криминалци“, додаде.
Градоначалничката рече и дека Висар Ганиу во три години има направено повеќе дивоградби од сите општини заедно што имаат предмети. Ако сите скопски општини имаат стотина предмети, Висар Ганиу има 13 илјади предмети, што сам го има лично кажано, рече Арсовска.
За споредба се осврна на информација од полицискиот билтен вчера за лице кон кое е поднесена кривична оти градело во својата куќа на поткровјето натстрешница, а за случаи како Чаир, вели Арсовска, институциите молчат, оти се работи за заштитени мечки.
Македонија
Од 1 јули целосна забрана за движење во шумите

Министерството за земјоделство, шумарство и водостопанство по барање на ЈП Национални шуми – Скопје, согласно член 57, став 3 од Законот за шумите, даде согласност за воведување на целосна забрана за движење во шумите и шумското земјиште во периодот од 6:00 до 20:00 часот, на територијата со која стопанисува јавното претпријатие.
Забраната, како што е појасенот од страна на надлежните, се воведува со оглед на зголемената опасност од појава на шумски пожари на отворен простор.
„Целосната забрана за движење во шума стапува на сила од 01.07.2025 година и ќе трае до 31. 08. 2025 година.
Целосната забрана за движење во шумите и шумското земјиште не важи за:
Министерството за внатрешни работи, Министерство за одбрана, Шумската полиција, Центарот за управување со кризи, Дирекцијата за заштита и спасување, Државниот инспекторат за шумарство и ловство, ЈП Национални шуми, субјектите што вршат шумскостопански активности, сеча, дотур и транспорт на дрво и дрвни сортименти, и лица коишто имаат писмено одобрение за движење во шумите со кои управува ЈП Национални шуми – Скопје.
Движењето ќе биде дозволено единствено со писмено одобрение издадено од подружниците на ЈП Национални шуми – Скопје за подрачјето со кое стопанисуваат/управуваат.
За спроведување на забраната одговорни се вработените од ЈП Национални шуми кои вршат дејност заштита, Шумската полиција и МВР.
За непочитување на оваа забрана на физичките лица кои ќе бидат затекнати дека се движат во шума и шумско земјиште, согласно член 106 од Законот за шумите, ќе им биде изречена парична казна од 1500 до 2000 евра“.