Група од 27 граѓани на Авганистан кои привремено престојуваа во земјава изутрината од Меѓународниот аеродром Скопје, со членови на нивните семејства заминаа за Даблин, Република Ирска, како нивно трајно одредиште.

Станува збор за граѓани кои работеле за демократските институции и меѓународни невладини организации во Авганистан, и беа под закана на новиот талибански режим во земјата. Трошоците во целост се покриени од меѓународните организации.

Во моментов во земјава престојуваат 442 граѓани од Авганистан, жени и деца од семејства на вработени во хуманитарните, демократски и миротворни меѓународни мисии, активисти од организациите за човекови права, преведувачи, студенти и стипендисти.

Институциите, во текот на нивниот престој им ја пружаат целата потребна поддршка додека не се обезбеди трансфер до нивната крајна дестинација.

Полиција утрово го запре актуелниот градоначалник на Куманово, Максим Димитриевски. Тој со вклучување во живо на „Фејсбук“ кажа дека полициско возило го следело неколку улици, по што на улицата Лесковачка го сопреле возилото во кое бил заедно со Дејан Димитриевски.

Градоначалникот се жали дека полицијата не им образложила зошто ги сопрела. Ги задржала петнаесетина минути во кои бил блокиран сообраќајот на улицата Лесковачка.

„Објавувам вака јавно да видат сите како работи полицијата на мојот другар Оливер Спасовски. Не држат без објаснување, не ни кажуваат зошто не сопреле. Тргнав кај мојот матичен лекар. На улицата заглавен стои и автобус, сообраќајот е стопиран. Сакам да порачам дека вакви притисоци нема да успеат“, вели Димитриевски.

Тој објаснува дека му било побарано полномошно за управување со возилото на Дејан Димитриевски, документ кој тврди дека го имале со себе.

Кусо по првото вклучување во живо, Димитриевски се вклучи и вторпат со објаснување дека полицијата ги испратила на технички преглед иако се возеле во ново возило, што им било познато на полицајците.

Во текот на вчерашниот ден аплицирани се вкупно 3.475 дози вакцини, од кои 917 се аплицирани како прва доза, 2.509 се ревакцинирани, а 49 граѓани примиле трета доза вакцина.

Заклучно со 18 октомври вкупно се вакцинирани 799.762 граѓани, ревакцинирани се 763.031, а трета доза примиле 1.197 граѓани, соопшти Министерството за здравство.

54% од граѓаните над 40-годишна возраст се ревакцинирани, а 33% од популацијата од 18 до 39 години примиле барем една доза вакцина.

Опфатот со вакцинација со една доза вакцина, на полнолетната популација е 47% , а со две дози опфатени се 45% од граѓаните над 18 години.

Според бројот на аплицирани вакцини, 38% од целата популација во нашата земја е вакцинирана, а 35% од популацијата во државата примила две дози вакцина.