Македонија
СДСМ: На протестите на ВМРО-ДПМНЕ се кршат мерките за коронавирусот

Блокадите на ВМРО-ДПМНЕ продолжуваат во законодавниот дом и надвор од него, велат од владејачкиот СДСМ преку соопштение.
Партијата нагласува дека опозицијата со поснедувањето на илјадниците амандмани ја блокира работата во Собранието, а протестите што ги организира ги кршат мерките за коронавирусот.
„Опозициската ВМРО-ДПМНЕ се однесува неодговорно и штетно и во Собранието и надвор од него, нанесувајќи штета на интересите на граѓаните и на државата, и тоа во време на сериозна здравствена и економска криза, предизвикана со пандемијата од коронавирусот.
Со поднесувањето на стотици, илјадници амандмани опозицијата се обидува да ја блокира работата на законодавниот дом, за да не може да им се помогне на најранливите преку реализација на четвртиот пакет економски мерки, за да не можат пензионерите, невработените, компаниите да добијат помош.
3.000 амандмани, најмногу од нив апсурдни и нелогични, поднесе ВМРО-ДПМНЕ заедно со другите опозициски пратеници за измените на Деловникот за работа на Собранието, со единствена цел да спречат пратениците кои се изолација да можат да работат од далечина.
Во време на пандемија, ВМРО-ДПМНЕ со над 500 амандмани се обидува да ги блокира измените во Законот за здравствена заштита, кои предвидуваат лекарите што ја исполниле старосната граница за пензионирање да можат да го продолжат работниот век до возраст од 67 години.
Деструктивното дејствување на ВМРО-ДПМНЕ продолжува и надвор од законодавниот дом, со групирање, организирање на протести за спас на фотелјата на Мицкоски, на кои се кршат мерките за заштита од коронавирусот.
Мицкоски и ВМРО-ДПМНЕ наместо да работат за доброто на граѓаните, прават се за да биде полошо, глумат загриженост за здравјето, а не ги почитуваат мерките.
Ако се барем малку одговорни ВМРО-ДПМНЕ и Мицкоски треба да прекинат со блокади на крстосници, наместо да бројат мртви, да повикаат да се почитуваат мерките, да се откажат од блокадата на собранието.
Нема да успее антидржавното, антинародното дејствување на ВМРО-ДПМНЕ и Мицкоски, тие нема да успеат да ги блокираат реформите, нема да успеат да го блокираат напредокот на државата“, наведува СДСМ во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Собранието го избра Насер Зибери за народен правобранител

Иако Насер Зибери не успеа да стане првиот премиер Албанец, се избори за функцијата народен правобранител. Го предложи ДУИ, а Собранието го изгласа со 61 глас „за“, без против и воздржани, при што беше запазен принципот на Бадентерово мнозинство. Пратениците од Алијансата за Албанците и од ВМРО-ДПМНЕ не беа присутни во салата и не го поддржаа изборот Зибери да стане бранител на правата на граѓаните пред државните институции.
Зибери во јуни за време на парламентарните избори ДУИ го промовира како кандидат за прв премиер Албанец, но подоцна во преговорите со коалицискиот партнер СДСМ оваа идеја пропадна. Заев и Ахмети се договорија да има само Албанец вицепремиер и оваа функција ДУИ му ја довери на Артан Груби.
На денешната расправа на собраниската седница албанската опозиција остро се противеше на предлогот Зибери да стане омбудсман бидејќи, според нив, зад изборот се крие политички пазар помеѓу коалициските партнери.
„Ако го земеме предвид фактот дека си имаме работа со фигура за која најмалку може да се рече дека не е политичка поради тоа што пред само 6 месеци беше кандидат за премиер на политичка партија, а денеска ни доаѓа како предлог на таа политичка партија во Собранието“, рече Сурија Рашиди, пратеник на Алијансата за Албанците.
И за опозициската ВМРО-ДПМНЕ не беше прифатлива кандидатурата на Зибери. Неговото поврзување со политиките на ДУИ, според нив, фрла сомнеж дека тој ќе биде достоинствен бранител на правата на граѓаните.
„Народен правобранител е аполитична функција од Рим до денес, само кај нас се случуваат вакви преседани. Тука се избираат луѓе со знаење, со професионална кариера, а не бивши политичари, министри, пратеници. Овде се работи за меѓусебен пазар. СДСМ си помислил – да не се обиде ДУИ да го реактивира прашањето за премиер, па ајде да му го дадеме местото народен правобранител“, рече пратеничката од ВМРО-ДПМНЕ, Гордана Силјановска-Давкова.
Зибери пред да стане политичар бил новинар. Во 90-тите како кадар на ПДП влегува во политиката и во периодот од 1996 до 1998 станува министер за труд и социјална политика во владата на Бранко Црвенковски. Бил пратеник во два собраниски состава. Повеќе од 10 години не беше активен во политиката и работеше како нотар до минатата година кога ДУИ го номинира за прв премиер Албанец. За време на кампањата тој ветуваше мултиетничка химна, задолжително учење албански јазик, ветинг (проверка) за сите, флексибилно работно време, консензуално одлучување со врзан потпис, 13 август, денот на потпишувањето на Рамковниот договор, да биде државен празник.
Заедно со Зибери на конкурсот што го распиша Собранието се пријавија уште четворица кандидати, при што Ана Чичаковска веднаш ја повлекла кандидатурата. Така, како противкандидати на Зибери останаа Фехим Стафа, Сашко Костов и Светислав Јовановски. Тој доаѓа на предлог на ДУИ, при што на Комисијата за избори и именувања доби поддршка од мнозинството пратеници, а Собранието на денешната седница го верификува неговиот избор.
Функцијата народен правобранител не е пополнета повеќе од еден месец откога Иџет Мемети, по 16 години на оваа функција, замина да биде член на Советот на јавните обвинители.
Според прописите, народниот правобранител се избира за време од осум години, со право на уште еден избор. Народниот правобранител, како што е пропишано со Уставот, ги штити уставните и законските права на граѓаните кога им се повредени од органите на државната управа и од други органи и организации што имаат јавни овластувања.
Македонија
Царовска: Средношколците имаат право на матура, а МОН има обврска да им ја обезбеди

Министерството за образование и наука има законска обврска да им обезбеди право на полагање државна матура на учениците, особено на оние што сакаат да продолжат во високо образование. Ова го нагласи министерската за образование и наука, Мила Царовска, одговарајќи на новинарско прашање за бојкотот на наставата од дел на средношколците.
„Од првиот ден откако сум во МОН, ние сме во континуирана соработка и разговори со Сојузот на средношколците. Тие имаат разни размислувања и разни барања. Последниот состанок беше пред една недела на кој утврдивме дека матурата оваа година се одвива во согласност со законот. Средното образование е задолжително во државата и токму затоа е важно да го почитуваме правото на учениците што сакаат да полагаат матура“, изјави Царовска.
На утринскиот состанок директорите на средните училишта информирале дека бојкотираат само некои од учениците.
„Важно е учениците да ги прочитаат и концепцијата за матура и законот и да одлучат на кој начин ќе полагаат матура оваа година. Министерство за образование и наука и општините што директно менаџираат со средните училишта имаат обврска да го обезбедат правото на учениците што сакаат да полагаат матура. Учениците што не сакаат да полагаат државна матура имаат можност да полагаат училишна матура. Токму таму има два предмета и проектна задача или оние што се во стручните училишта имаат можност да полагаат стручен испит, исто два дела – еден задолжителен предмет, еден изборен предмет и проектна задача. Затоа велам, државната матура е изборна, а наша обврска како Министерство е да го обезбедиме правото на полагање матура, особено на оние ученици што сакаат да го продолжат своето образование во високообразовни установи во нашата држава и надвор од неа. Минатата година бевме негативен исклучок во регионот и светот и наши ученици не успеаја да се запишат на високорангирани универзитети во светот“, рече Царовска.
Според податоците од училиштата, полагање матура имаат пријавено над 14.000 матуранти, а испитите ќе се одржат според концепцијата утврдена уште на почетокот на оваа учебна година.
Македонија
Спасовски на средба со претставници на Македонскиот полициски синдикат

Министерот за внатрешни работи, Оливер Спасовски, имаше средба со претставници на Македонскиот полициски синдикат предводени од претседателот Марјан Кицев. На средбата се разговараше за можните предизвици и насоки во делот за подобрување на условите за работа на полициските службеници.
Спасовски потенцира дека Министерството за внатрешни работи го заврши својот дел од обврските во врска со почнувањето градба на новиот центар за странци во Стенковец, објект од особено значење со кој земјава ќе ги обезбеди стандардите на ЕУ за третманот на лицата странци до нивното формално регулирање на статусот во државата. Министерот Спасовски ги информира претставниците на Македонскиот полициски синдикат дека досега се реновирани над 50 објекти во МВР, а во моментот се работи на СВР Куманово, Ресен и на Ростуше и ова динамика ќе продолжи и понатаму сè со цел подобрување на условите за работа на вработените. На средбата, меѓу другото, министерот Спаосовски информира дека многу бргу ќе се почне со испорака на новите униформи за полициските службеници.
Од Македонскиот полициски синдикат изразија благодарност до министерот Спасовски за досегашната поддршка и посветеност во реализацијата на голем дел успешно завршени проекти, како и за заложбите на министерот за значително подобрените услови за работа на полицијата и полициските службеници.
- Книги1 месец
Македонски лекар ја објави последната исповед на Јосип Броз Тито
- Македонија3 месеци
Излезе од затвор Панче Ангелов, напаѓачот на Шекеринска од 27 април
- Црна хроника2 месеци
Млада девојка од Штип пронајдена мртва во нејзиниот дом
- Македонија2 месеци
МЖСПП: Мечкиното грозје важен ресурс, кој треба грижливо да го собираме
- Економија3 месеци
(Видео) Младите од Струмичко порачуваат – ако не проработи рударскиот комплекс, ќе се иселиме сите
- Македонија2 месеци
(Видео) Отстранети два нелегално изградени објекта во општина Центар
- Спорт3 месеци
Гетџи: По мечот со Хабиб, мојата мајка конечно ќе може да се пензионира
- Македонија1 месец
Возачот на „бентлито“ што „влета“ на плоштад казнет со 45 евра, објавена фотографија од записникот