Претседателот на СДСМ Венко Филипче на денешната седницата за пратенички прашања во Собранието, го праша премиерот Христијан Мицкоски дали кога зборува за „талог на општеството“ мисли на граѓаните. Филипче од говорница јавно рече дека секојдневните поплаки, прашањата и проблемите се реални гласови на граѓани кои живеат тешко и кои заслужуваат почит, а не навреди.

„Да ги изнесам констатациите на граѓаните кои што ги нарекувате дека се „талог на општеството“, прво и заради тоа што поплаките прашањата и се останато доаѓа од нив, не директно од нас“, рече Филипче.

Претседателот на СДСМ Венко Филипче исто така рече дека е свесен дека Владата сака да зборува за „убави работи“, но најверојатно тие работи се за мал круг на луѓе блиски до власта..

„Знам дека сакате да зборите и за убави работи. Веројатно тоа се случува за мала група на луѓе околу власта, меѓутоа не за целата држава и за сите граѓани“, рече Филипче.

Тој на денешната седница на пратенички прашања исто така рече дека за огромното мнозинство граѓани, реалноста е сосема поинаква, а тоа е држава без европска перспектива, држава со изгласана против уставна резолуција, со која што се забранува слобода на изразување, слобода на говор, држава со сива економија и длабока сиромаштија.

„Животниот стандард е битка која што во континуитет треба да ја води една влада, односно како до подобар животен стандард во континуитет треба да се бориме и да работиме, затоа што таа битка не смеете да ја изгубите, затоа што ако ја изгубите логично е дека ќе ја изгубите и довербата кај граѓаните“, вели Христијан Мицкоски, претседател на Владата на Република Северна Македонија одговарајќи на пратеничко прашање.

Мицкоски посочи дека СДСМ како влада спровеле катастрофални политики, како и дека во периодот од 2020 до 2023 година, се годините кои се нанесоа најжестоките удари врз животниот стандард на граѓаните и државата, со задолжување, безмилосно трошење и грабеж.

„Од ова што можеме до сега да посведочиме е дека таа доверба расте и од избори до избори резултатите се зголемуваат. Што се однесува до нападите на опозицијата можам само да кажам дека додека беа влада имаа можност да докажат дека тоа што го работат е правилно и дека политиките кои тие ги спроведуваат се во насока на подобрување на животниот стандард на граѓаните. Но, што направија? Имавме рекордни стапки на инфлација во тие години, 17, 18, 19 проценти и тоа беа години кога се нанесе жесток удар врз животниот стандард на граѓаните, почнувајќи од 2020 до 2023 година, се годините кои се нанесоа најжестоките удари врз животниот стандард на граѓаните и државата, со задолжување, безмилосно трошење, грабеж, со лоши политики. Тоа е пример кој во учебниците ќе се изучува како не треба да функционира една влада“, потенцираше Мицкоски и додаде дека за среќа сето ова е минато.

„Но, среќа е што тоа е сега минато. Нашата задача е тешка, голема, но ние ја прифативме таа задача со големо чувство и секој ден работиме да исправиме по некоја погрешна политика која што е правена во тој период 2020 до 2023 година.

Денес во услови кога имаме јасна надолна линија на инфлацијата, односно една од најниските во Европа и релативно најниска во регионот, под 4 проценти, со тенденција да следната година се стабилизира помеѓу 2 и 3 проценти, во отсуство на креативна идеја, реални политики, опозицијата се занимава со клеветнички навреди кон Владата“, рече Мицкоски и додаде:

„Значи имаме две опции да веруваме на потрошувачката кошничка која ја изработуваат Бранислив Јовановиќ, Тевдовски и Никола Поповски, поранешни министри во владата на СДСМ, и ЕВРОСТАТ. Граѓаните треба да изберат на кој ќе веруваат. Ако му веруваме на ЕВРОСТАТ, излегоа пред некој ден и кажа дека потрошувачката кошничка во Македонија споредена со просек кој што го дефинираат како 100 проценти, е најевтина во Европа, мислам дека е некаде околу на нивно 72, 73 проценти. Сите во регионот, буквално сите во регионот се со поскапа потрошувачка кошничка од нашата“.

Премиерот Мицкоски истакна дека главен приоритет на Владата е борба за подобар животен стандард на граѓаните.

„Дека цените се високи да, дека треба да се бориме за животниот стандард да, и дека тоа е непрекината борба да се сложувам и тоа е еден од приоритетите на оваа влада и со министерот за економија и со министерката за финансии и со буквално сите во Владата, тоа ни претставува главен приоритет“, додаде тој.

Во однос на минималната плата, Мицкоски вели дека истата треба да се зголеми, но мора работодавачите и работниците да се договорат.

„Дали треба повеќе да треба, еве јас сум првиот кој што тоа ќе го поддржи. Треба да биде најмногу. Ако гледаме од себични причина на Владата, ние можеме да прогласиме и да побараме од Законодавниот дом минимална плата од 600, 700 евра, ќе бидеме најголемите политички херои, дури и ние ќе профитираме бидејќи 705.000 вработени ние како влада сме работодавачи на 100.000 што значи дека придонесите на останатите 600.000 ќе доаѓаат на сметка на Владата. Но, дали економијата и бизнисот тоа можат да го издржат е прашање кое што работодавачите и работниците треба да си го одговорат. Затоа ние велиме ве молиме во дијалог вие да си го одговорите тоа прашање, ние можеме само да фасилитираме и да помогнеме во тој процес. Второ, грубо се манипулира со зголемена минимална плата во соседство и кај нас, бидејќи кај нас се збори за нето, а таму за бруто. Има голема разлика. Трето, според ЕВРОСТАТ, куповната моќ со минималната плата во Македонија, оваа моменталната, а не таа која ќе се зголеми со закон, е повисока од сите земји во соседството, минус Грција“, заклучи Мицкоски.

И покрај јасните и јавно достапни податоци кои покажуваат дека инфлацијата во државата се стабилизира и дека мерките на владата директно го ублажуваат ударот врз животниот стандард на граѓаните, опозицијата упорно пласира лажна слика за, наводно, економски распад и Македонија на дното по животен стандард. Наместо факти и аргументи, слушаме политички конструкции, дневна пропаганда и ширење паника меѓу граѓаните, без ниту еден конкретен предлог или одговорност за состојбите коишто тие сами ги оставија зад себе. Инфлацијата во државата се стабилизира, рече пратеничката од ВМРО-ДПМНЕ, Емилија Ангелова поставувајќи пратеничко прашање кон претседателот на Владата, Христијан Мицкоски на денешната собраниска седница за пратенички прашања.

Ангелова се осврна на енергетската состојба во државата и преземените мерки од страна на Владата за стабилизирање на овој сектор за обезбедување ценовна сигурност и со тоа и заштита на домаќинствата, наспроти лагите на опозицијата кои имаат за цел сеат страв кај граѓаните.

„Во услови кога владата презема континуирани и одговорни мерки за стабилизирање на енергетскиот сектор, заштитата на домаќинствата и обезбедување ценовна сигурност во јавноста повторно се пласираат шпекулации од страна на опозицијата за наводно зголемување на цената на електричната енергија од јануари за 5%. Наместо проверени информации, одговорен пристап, опозицијата повторно избира да шири паника меѓу граѓаните со тврдења кои не се поткрепени со одлуки, факти или официјални податоци, игнорирајќи ги вложувањата и мерките што Владата ги презема за ценовна стабилност и енергетска безбедност“, истакна Ангелова.

Таа зборуваше и за состојбите во правосудниот систем и нарушената доверба на граѓани, при што премиерот го праша за мислење и што очекува да се промени во Јавното обвинителство со разрешувањето на досегашниот државен обвинител и изборот на вршителот на должност.

„По подолг период на нарушена доверба во правосудниот систем, особено во јавното обвинителство, Владата презеде конкретни чекори за враќање на институционалната стабилност, одговорноста и владеењето на правото. Изборот на вршител на должност државен јавен обвинител се случува во момент кога граѓаните очекуваат јасен пресврт, а институциите конечно ослободување од политички влијанија и селективна правда. За разлика од ова, опозицијата повторно се обидува да го дискредитира процесот со паушални обвинувања и политички конструкции без да понуди решение или да покаже вистинска грижа за реформите во правосудството иако токму во нивно време довербата во обвинителството беше на најниско ниво. Оттука моето прашање, се избра в.д. државен јавен обвинител, кое е вашето мислење и што очекувате ви да се промени во Јавното обвинителство“, праша Ангелова.