Пред Владата на протестот „Оставка на Заев, слобода на народот“ на граѓаните им се обрати Гордана Силјановска-Давкова, пратеник од редовите на ВМРО-ДПМНЕ и коалицијата „За обнова на Македонија“. Таа им се заблагодари на граѓаните што излегоа на протест и во време на Ковид-19.

„Граѓаните денес излегоа на протест бидејќи сега во моментот ѝ се заканува смртоносен вирус на Република Македонија. Вирус што се заканува дека ќе ги загрози идентитетот, јазикот и историјата на Република Македонија. Тој вирус се нарекува Зоран Заев. Ви благодарам за храброста, знам дека се грижите за здравјето, како и јас. А денес сме овде бидејќи во прашање е здравјето на Македонија. Покрај почитувањето на мерките за заштита од Ковид-19, нè штити и правото, правдата, ама се чини и севишниот. Што сакам да кажам? Забележувате дека ако сакате да ве почитуваат, мора да имате самопочит. Јас за тоа им благодарам на сите оние, не само оние што се овде, туку и на оние што се охрабрија гласно да ја изразат самопочитта кон себе, кон својот народ, кон своите граѓани, кон својата држава. И тоа не е случајно. Горда сум на Универзитетот на кој многу генерации сум учела на право, правда и морал, исто така што се огласија Универзитетот „Кирил и Методиј“, Институтот за национална историја, МАНУ, Машинскиот факултет, Европското движење, чиј еден од основачите сум и јас, и уште многу други институции, но и интелектуалци, но и луѓе што се основачи на многу партии“, истакна Силјановска-Давкова.

Таа посочи дека Македонците не се без корен. „Република Македонија има длабоки корени во минатото. Името Македонија се споменува и во Библијата. Оваа држава не може никој да ја уништи, нејзината историја е длабока што не може ниту еден договор да ја избрише. Македонците, како и сите народи, имаат право на своја историја, свој јазик и свој идентитет. Не сме ние без корен. Името Македонија ќе го најдете не само во Библијата туку во многу, многу книги. Името ќе го најдете во многу, многу анализи, на многу карти“, рече Силјаноска-Давкова.