Закани упатени преку „Фејсбук“ кон кандидат за градоначалник на Прилеп и неговото семејство, беа предмет на истрага на Основното јавно обвинителство Прилеп и МВР. Заканите ги упатил 27-годишник од Прилеп.

Основното јавно обвинителство Прилеп поведе постапка за сторено кривично дело – загрозување на сигурноста од член 144 став 4 од Кривичниот законик.

Пријавеното лице во текот на вчерашниот ден е лишено од слобода на граничниот премин Табановце при влез во државава и приведено на испитување во обвинителството.

Во насока на нешречено одвивање на кривичната постапка, јавниот обвинител до надлежниот суд достави предлог за определување на мерка притвор против осомнуичениот. Судијата на претходна постапка при Основнито суд Прилеп го прифати предлогот на обвинителството и на осомничениот му е определен притвор во траење од 8 дена.​

Доцнел почетокот на гласањето низ затворите во Македонија, поради технички проблеми. Досега е евидентирано дека во затворот „Идризово“ немало паравани поради што почетокот на гласањето бил во 8:20 часот, во истражниот затвор „Скопје“ во Шутка поради местење на избирачкиот материјал имало доцнење од 20 минути.

Поголеми проблеми кои биле надминати имало во затворите во Битола и Штип. Избирачкиот одбор не дозволил затворениците да гласаат со тонски книшки (затворенички легитимации). Овој проблем е отстранет и гласањето продолжило.

За кумановскиот затвор, познато е дека околу триесетина затвореници кои сакале да гласаат, ги немало на избирачкиот список. Ваков проблем имало и во битолскиот затвор, каде затвореници со право на глас, ги немало на избирачкиот список.

Полицијата уапси четири лица кои ги гони за давање изборен поткуп. Станува збор за скопјани, кои како што тврди МВР, биле забележани како давале пари во замена за глас за локалните избори. Во нивните домови биле направени и претреси.

„На место викано Аџево, биле забележани лица кои давале пари во замена за глас на претстојните локални избори односно вршеле кривично дело по член 162 од КЗ „поткуп при избори и гласање“. Од страна на полициски службеници приведени се четири лица. Е.Б. (26), С.М. (27) Н.Б. (50) и Ј.М. (35), а кај нив пронајдени се 121000 денари и 250 евра. Известен е јавен обвинител и по добиени судски наредби извршени се и претреси во домовите на лицата, а тие се задржани во полициска станица за понатамошна постапка“, велат од МВР.

Вчера, имаше апсење и во Лозово, каде се давало од 50 до 100 евра за глас. Уапсен беше 50-годишен жител на Милино кој, според МВР, поткупувал за да се гласа за независен кандидат.