Македонија
Сончево и топло време со температури до 38 степени
Времето денеска ќе биде сончево и топло. Ќе дува слаб до умерен ветер претежно од североисточен правец.
Минималната температура ќе биде во интервал од 10 до 19 степени, а максималната од 31 до 38 степени. УВ-индексот ќе изнесува 8, информираат од Управата за хидрометеоролошки работи.
Во Скопје времето ќе биде сончево и многу топло со слаб до умерен североисточен ветер. Утринската температура ќе достигне до 16 степени, а дневната до 36 степени.
Во следните денови продолжува периодот на стабилно и топло време, а зголемување на облачноста ќе има од петок. В недела и понеделник претежно во северните делови ќе има услови за појава на краткотарен пороен дожд и појава на грмежи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Европската инвестициска банка отвора претставништво во Скопје
Министерот за надворешни работи и надворешна трговија, Тимчо Муцунски, денеска се сретна и потпиша договор со потпретседателот на Европската инвестициска банка (ЕИБ), Роберт де Гроот, кој е во работна посета на нашата земја.
Според Министерството, договорот претставува важна пресвртница во зајакнувањето на поддршката за економскиот раст и интеграцијата на земјата во Европската унија.
Од независноста до денес, ЕИБ има инвестирано над 1,6 милијарди евра во клучни сектори за стабилен развој на државата – инфраструктура, енергетика, транспорт, поддршка на малите и средните претпријатија, како и подобрување на животниот стандард преку модернизација на јавните услуги. Отворањето на претставништвото на ЕИБ во Скопје ќе овозможи поблиска координација, поефикасна имплементација на проектите и поголем пристап до техничка и финансиска поддршка што ја нудат европските институции.
„Од денес, ЕИБ ќе биде уште поблиску до државните институции, локалната самоуправа и македонските компании – поддржувајќи ги во реализацијата на нивните развојни инвестиции и проекти. Поблиското присуство на ЕИБ претставува јасен сигнал дека нашата држава се движи во насока на модерна, европска и конкурентна економија – отворена за инвестиции и ориентирана кон долгорочен и одржлив раст. Новата фаза на соработка во која влегуваме денес се совпаѓа со стратешките цели на Владата – забрзување на економската трансформација, поддршка на зелената транзиција и усвојување на европските успешни практики и стандарди,“ изјави министерот Муцунски по средбата.
„Овој договор го зајакнува нашето партнерство и ги потврдува заедничките цели – поддршка на патот на Северна Македонија кон интеграција во Европската унија, подобрена регионална поврзаност и зелена транзиција,“ изјави потпретседателот де Гроот на церемонијата на потпишување во Скопје. „Одржливите инвестиции се од витално значење за градење отпорна економија, подготвена за иднината, која може да се натпреварува во рамките на ЕУ и глобално,“ додаде тој.
„Како кредиторски огранок на Европската унија, ЕИБ игра клучна улога во претворањето на европската посветеност кон интеграцијата на Северна Македонија во конкретни проекти,“ изјави амбасадорот на ЕУ во Северна Македонија, Михаил Рокас. „Заедно, во рамките на пристапот „Тим Европа“, инвестираме во трансформацијата на земјата – поддржувајќи одржлив и инклузивен раст, модерна инфраструктура и подобар животен стандард за сите граѓани,“ истакна тој.
Македонија
Манасиевски: Дали познат доктор и поранешен градоначалник одбил функција во СДС затоа што не го смета Филипче за релевантен?
Јадрото во СДС продолжува да се распаѓа по катастрофалниот резултат на локалните избори, на кои освоија 120.000 гласови и само 6 општини. СДС е во тежок политички „нокдаун’’, а процесот на консолидација никако да му појде од рака на Филипче, изјави Валентон Манасиевски од ВМРО-ДПМНЕ.
„Информации кои од Бихачка стигнаа до нас, велат дека познат доктор и поранешен градоначалник, одбил функција во раководството на СДС, само затоа што не го смета Филипче за релевантен политичар? Дека Филипче има проблеми со консолидацијата и зачувување на онака малото членство, говори и фактот што поранешни активисти, но и функционери и поддржувачи на СДС, јавно не се поистоветуваат и со Филипче и СДС, или пак не даваат поддршка на политиките и бараат одговорност во нивната партија“, рече тој.
Манасиевски вели дека од сите страни се бараат реформи во СДС, но и оставка и одговорност од првиот човек на Бихачка, а само нему таа реалност не му одговара.
„Венко Филипче по се изгледа е задоволен од целата ситуација и сака да го донесе СДС до ниво на статистичка грешка. Им порачуваме на СДС да си преземат иницијатива за итни реформи, на Македонија и треба силна опозиција“, рече Манасивески.
Македонија
Учениците во Аеродром учат за даноци преку игри, почна финансиската едукација за најмладите
Од денес, во училиштата во општина Аеродром започнуваат работилниците преку кои најмладите ќе се запознаваат подетално со значењето на даноците, начинот на функционирање на даночниот систем, улогата на УЈП и другите финансиски институции, како и со важноста на одговорното и транспарентно управување со јавните средства. Изразуваме голема благодарност до Управата за јавни приходи што останува силен поддржувач и партнер на Министерството за образование и наука и на воспитно–образовниот систем. Ова го истакна државниот секретар во МОН, Елена Ивановска на денешната прва креативна работилница во ОУ „Блаже Конески“ во Аеродром, појаснувајќи дека активностите почнуваат за помалку од еден месец по потпишувањето на Меморандумот за соработка помеѓу Министерството за образование и наука (МОН) и Управата за јавни приходи (УЈП) за зајакнување на финансиската и даночната едукација на учениците.
„Со нудење на експертизата и стручноста на своите вработени, УЈП значително придонесува во градењето на понапредни, информирани и финансиски едуцирани ученички генерации, кои многу подобро ќе ги разбираат механизмите на современото општество и ќе бидат подготвени да придонесуваат кон неговиот одржлив развој“, рече Ивановска.
Предвидено е едукацијата да ги опфати учениците од сите основни и средни училишта, ќе се одвива интерактивно – преку игри, симулации и креативни работилници, а стекнатото знаење ќе се проверува со даночен квиз, односно натпревар меѓу учениците.
Министерството за образование и наука очекува успешна реализација на оваа сеопфатна мерка и натамошна трансформација во системско решение, преку надградување на наставните програми. Градиме свесни и одговорни граѓани кои разбираат дека даноците се основа за финансирање на јавните добра и за поттикнување на општествениот напредок.

