Ексградоначалникот на Град Скопје, Коце Трајановски и уште три други лица нема кривично да одговараат за злоупотреба на службената положба и овластување во врска со изборот на директор на ЈП „Водовод и канализација“ Скопје, потврдија од Скопското обвинителство за „Макфакс“.

Кривичната пријава на полицијата била отфрлена бидејќи изминало времето кога Трајановски и останатите можеле кривично да одговараат, односно застарело делото за кривичен прогон.

„Одлуката за избор на директор на Јавното претпријатие „Водовод и канализација“ Скопје е донесена и потпишана на 11.02.2015 година, па согласно тоа застареноста на кривичното гонење за Коце Трајановски кој, извршувајќи ја функцијата градоначалник лично ја донел и потпишал одлуката, настапила на 11.02.2018 година. Застареноста за претседателот и двајца членови на комисијата за спроведување на постапката за избор настапила на 22.01.2018 година, кога изминале три години од дејствијата на пријавените кои го исполнуваат битието на делото“, велат од Обвинителството за „Макфакс“.

Кривичната пријава од СВР-Скопје до Основното јавно обвинителство Скопје беше доставена на во март 2019 година, односно повеќе од една година по истекот на рокот за застареност. Решението за отфрлање било доставено до оштетеното Јавно претпријатие „Водовод и канализација“ Скопје, кое не се жалело на одлуката. До Скопското обвинителство, СВР-Скопје, преку Бирото за јавна безбедност, Единица за економски и компјутерски криминал поднесе кривична пријава против четири лица за кривично дело – Злоупотреба на службена положба и овластување од чл.353 ст.1 од Кривичниот законик, за конкурсот за избор на директор на Јавното претпријатие „Водовод и канализација“ Скопје.

За наведеното кривично дело законодавецот предвидел казна затвор од шест месеци до три години, а според Кривичниот законик, кривичното гонење не може да се преземе ако поминат три години од извршувањето на кривичното дело за кое е предвидена казна затвор над една година.

Денешната акција за чистење во која учество ќе земат вработените од државните институции, нека ни биде поттик за да ја подигнеме нашата еко свест и заеднички да ја чуваме животната средина, напиша премиерот Зоран Заев на својот профил на „Фејсбук“.

„Околу 40.000 луѓе ќе чистат на 20 локации во Скопје и на уште многу локации низ целата држава. Чистата животна средина е важна за секој од нас, ако сме заедно и ангажирани, можеме да ја зачуваме“, додава премиерот.

Со почеток во 12 часот, денеска ќе почне еколошката акција „Администрацијата чисти со ‘Не биди ѓубре’“, и на тој начин ќе се одработи неработниот ден – 2 јануари.

Како што информираа пред неколку дена министерот за информатичко општество и администрација, Дамјан Манчевски, и претставничката на граѓанското здружение „Не биди ѓубре“, Ирена Ристиќ, во акцијата ќе учествуваат 40.000 луѓе кои ќе чистат на 20 локации во градот.

Локациите се следни: Сарај – Треска, акведукт – каналот, СЦ „Борис Трајковски“, Калето, Музејот на современата уметност, касарната „Илинден“, Јужен булевар, „Бихаќска“, Државното училиште за физичка култура „М. М. – Брицо“, железничката и автобуската станица, улицата Џон Кенеди, Собранието, улицата Македонија, МКЦ и МРТ, касарната „Гоце Делчев“, улицата Ферид Бајрам, улицата Александар Урдаревски, Европската очна болница „Јурија“, улицата Индустриска и кејот на реката Вардар.

Секаде каде што е потребно, обезбедена е и соодветна механизација од претпријатијата на Град Скопје.

До локациите каде што е потребен превоз, тој е обезбеден од ЈСП, а за сите вклучени во акцијата обезбедена е и соодветна опрема, како ракавици, кеси (за отпад и пластика), како и маски за одредени локации.