Во тек е повикот за номинации „Медиум-промотор на новинарството како јавно добро – Роберто Беличанец“. Тргнувајќи од премисата дека демократско општество кон кое Македонија се стреми е можно само доколку новинарството се третира како јавно добро, како инструмент преку кој власта е под постојана контрола и преку кој се заштитува јавниот интерес, Самостојниот синдикат на новинарите и медиумските работници во 2018 година ја воспостави годишната награда „Медиум промотор на новинарството како јавно добро“, која го носи името на прерано починатиот борец за слобода на изразување и експерт за медиуми – Роберто Беличанец. Медиумите се платформата преку која новинарите и медиумските работници комуницираат со граѓаните и без слободни медиуми, кои го разбираат концептот на јавно добро и јавен интерес, не е можно остварување на потребното влијание за исполнување на главната функција на новинарството.

Затоа, ССНМ ги повикува сите новинари и медиумски работници да номинираат медиум за кој сметаат дека го заслужува ова признание, кое сметаме дека ќе биде не само поттик за медиумот туку и за новинарите и медиумските работници.

Признанието ќе му се додели на медиумот што ги задоволува следниве критериуми: континуирано чувство за општествена одговорност, третирање на новинарството како јавно добро преку залагање за слобода на изразување, придржување до кодексот на новинари, третирање теми од јавен интерес… како и коректен однос кон вработените – почитување на нивните работнички и професионални права.

Комисијата за избор на добитник на оваа награда номинации ќе прима до 27 октомври, а новинарите и медиумските работници номинациите може да ги испраќаат по електронска пошта на [email protected] или на фејсбук-страницата на ССНМ(https://www.facebook.com/Sindikatnanovinari/).