Македонија
Стојаноска: Државата добива нова влада со стари, транзициски и искорумпирани кадри
Македонија добива нова влада со криминални кадри оптоварени со по десетина афери, случаи на непотизам и сомнежи за корупција, смета ВМРО-ДПМНЕ.
Дафина Стојаноска од опозициската партија денеска на прес-конференција оцени дека следува тежок период за Македонија, бидејќи оние кои ја направиле државата рекордер по корупција, криминал и неуспеси во Европа сега повторно ќе раководат со институциите.
„На чело на Владата е Зоран Заев, човек кој најмалку двапати е аболиран за криминал. Човек кој од просечно земјоделско семејство стана олигарх и транизициски профитер. Човек чие семејство поседува капитал во Македонија и Бугарија и со недвижен имот во Грција. Човек чие име нема крупна корупциска афера а да не се врзува директно со неа. Човекот кој е главата на рекетот и кој беше директно прозван дека кај него завршиле парите од рекетот од 8 милиони евра. Заев кој го слушавме како нарачува пресуди, договара судии. Човек кој е заштитник на неправдата и човек чие име и презиме станува синоним за лаги и криминал“, рече Стојановска.
За Радмила Шекеринска, од ВМРО-ДПМНЕ велат дека таа е транзициски и истрошен кадар на Социјалдемократскиот сојуз. Веруваат дека таа ќе остане запаметена по најскапата набавка на грејдери во Министерството за одбрана. За Венко Филипче, кој и натаму ќе биде министер за здравство, Стојановска рече дека тој е директно одговорен за фијаското во справување со корона-кризата и продолжил да тера бизниси и додека пациентите биле заразувани.
За Никола Димитров, кој ќе биде министер за европски интеграции, велат дека тој ги донел сите национални порази и не може да биде европската иднина на земјата. Стојановска на прес-конференција го спомена Спасовски, за кого рече дека е срам за македонската полиција.
Според ВМРО-ДПМНЕ, давањето на секторот финансии и економија на ДУИ и измислувањето на функција заменик-премиер ќе биде само бледо оправдување за неуспесите на новата влада и Зоран Заев.
На крајот, таа додаде дека ова е владин состав со најмала застапеност на жените со што се нарушува и родовата еднаквост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ да се исчисти од сопствените криминали и реформира, па потоа да прифати единство за најважните прашања за државата, велат од ВМРО-ДПМНЕ
Владејачката ВМРО-ДПМНЕ оценува дека СДС има потреба да се реформира и да се откаже од криминалот, а потоа да прифати се она што премиерот Мицкоски го понуди како платформа на обединување.
„Ова се принципите за обединување:
1. Правда и правна држава
2. Стоп за партизацијата на општеството
3. Крај на етничките конфликти и мегаломанските барања зад кој се кријат лукративните интереси
4. Да го заштитиме и подобриме стандардот на граѓаните
5. Праведно општество
6. Силно образование
7. Исполнување на стратешката цел за членство во ЕУ
8. Национално и државно единство
9. Борба против иселувањето
10. Градење на заеднички патриотизам“, подвлекуваат од ВМРО-ДПМНЕ.
Според нив, со лицемерна и дволична политика, со истите и стари и потрошени кадри не се гради единство. СДС, нагласуваат од партијата на власт, да се исчисти од криминалот и да ги прифати овие принципи за заедништво.
Македонија
Антикорупциска и Јавното обвинителство да испитаат зошто Филипче како министер криел имот што го поседува, а како пратеник годинава го пријавил, бара ВМРО-ДПМНЕ
Манипулациите се карактеристика за СДС. Кога ќе се види што Венко Филипче пријавувал како министер, а што како пратеник може да се види дека тој манипулира со голем имот. Или Филипче пријавил поголем имот како пратеник, отколку кога бил министер, велат од ВМРО-ДПМНЕ.
„Последниот анкетен лист доставен до Антикорупциска откако стана пратеник покажуваат дека тој поседува имот во вредност од 850 илјади евра.
Филипче како министер за здравство пријавил прво, куќа од 464 метри квадратни изградена во 2017 година во вредност од 27,8 милиони денари, второ, стан од 130 метри квадратни метри во вредност од 7,8 милиони денари добиен како подарок во 2016 година и како трето, уште еден стан во Скопје од 50 метри квадратни кој е резултат на купопродажба во 2010 година.
Филипче како пратеник во 2024 година го пријавува следниот имот.
Прво, стан во Скопје од 12 милиони денари стекнат со наследство во 2016 година. Станот не го пријавил кога бил министер, а го имал.
Второ, стан во Скопје стекнат со наследство во 2016 година вреден 3 милиони денари. И овој стан не е пријавен кога бил министер, а го имал.
Трето, два стана во Скопје од по 12 милиони денари, стекнати со договор за градба во 2017 година. И овие станови ги нема пријавено додека бил министер, а ги поседувал.
Четврто, стан во Центар од 3 милиони денари стекнат во 2008 година со договор за купопродажба. И овој стан не е пријавен кога бил министер, а бил во негова сопственост“, се истакнува во пишаниот допис од владејачката партија.
Нејасно е, додаваат од оваа партија, како имот што го поседувал кога станал министер или пет стана не ги пријавил во Анкетниот лист до Антикорупциска комисија, а ги пријавил како пратеник.
„Оттука се поставуваат низа на дилеми и прашања.
Криел ли Филипче имот, ако имал навика да крие можеби се уште го прави тоа“, прашуваат од ВМРО-ДПМНЕ.
Апелираат, Државната комисија за спречување на корупција веднаш да ги лоцира податоците за да утврди што се криел Филипче. Апелираат и до јавното обвинителство да испита зошто Флипче не пријавувал имот во анкетниот лист како министер и зошто во анкетниот лист како пратеник се појавува имот кој го имал пред да стане министер, а не го пријавил.
Македонија
Променливо облачно, попладне и во текот на ноќта ќе има локален пороен дожд проследен со грмежи и засилен ветер
Времето денеска ќе биде променливо облачно со слаб до умерен, а долж Повардарието повремено засилен ветер од југоисточен правец. Попладне и во текот на ноќта ќе има локален пороен дожд проследен со грмежи и засилен ветер. Минималната температура ќе биде во интервал од 11 до 20, а максималната ќе достигне од 26 до 33 степени.
Во Скопје променливо облачно, доцна попладне, а особено во текот на ноќта со повремен пороен дожд и грмежи. Ќе дува умерен ветер од југоисточен правец.
Минималната температура ќе се спушти до 19, а максималната ќе достигне до 33степени.
Од утре попладне и потоа преку ноќта, под влијание на нестабилна воздушна маса времето ќе биде променливо облачно и посвежо на повеќе места со пороен дожд, грмежи и засилен ветер. Локално ќе има појава на невреме, со интензивен пороен дожд (над 30 l/m² за кратко време), грмежи, силен ветер (над 70 km/h) и град, aособено во вторник врнежите ќе бидат пообилни, а температурата ќе биде значително пониска.