Двајца анестезиолози од Клиниката за анестезија, реанимација и интензивно лекување ќе ги заменат анестезиолозите кои во петокот си дале отказ во Градската општа болница „8 Септември“.

Министерот за здравство Венко Филипче смета дека со ротации нема да се почувствува недостиг не само од анестезиолози туку и од останатите здравствени работници кои учествуваат во лекувањето на заболените од коронавирус.

„ Нема да има недостаток од вкупниот број анестезиолози. Минатата недела разговаравме за замена и помош на анестезиолозите во „8 Септември“. Двајца колеги од Клиниката за анестезија, реанимација и интензивно лекување ќе одат на помош во „8 Септември“. Се направи распоред за да не трпи програмот на хируршките клиники. Имаме интензивна комуникација околу системот на ротација. Има ентузијазам и кај други колеги да дојдат кај овие пациенти и нема ризик за недостаток на лекари иако мора да се каже дека се веќе преморени по речиси пет месеци работа без одмор. Имаме и повеќе од потребниот број пријавени анестезиолози за помош, се пријавија четворица, но засега има потреба само од двајца“, рече министерот Филипче.

Тој нагласи дека уште на почетокот на пандемијата е донесена Уредба со која на услуга на јавното здравство е ставен и медицинскиот персонал од приватните клиники, но засега нема потреба од нивно вклучување со оглед на тоа што има меѓу тројца и десетмина пациенти на респираторни машини.

Министерот потврди дека една од анестезиолозите што си дала отказ и претходно работела во приватна клиника. Изминатиот период кога се појавил интерес за враќање во јавното здравство таа дошла да работи во „8 Септември“, но сега сака да замине, а другиот анестезиолог, министерот Филипче кажа дека е со долгогодишно искуство во јавното здравство.

Во просек, 13 отсто од тестираните за Ковид-19 се позитивни, а неделно се прават 8.000 тестови, истакна министерот за здравство, Венко Филипче, кој на денешната прес-конференција во Владата се осврна на бројките и статистиката за Ковид-19 во Македонија.

„Во земјата досега се направени 68.059 тестирања. Стратегијата на широко интензивно тестирање, вклучително и тестирање на контакти на позитивните по индикација дава резултати. Овој пристап на дава да имаме еден широк увид на состојбата на ширењето на вирусот и овој систем помага да ја стабилизираме ситуацијата во двете жаришта пред се, во скопскиот и тетовскиот регион“, рече минисерот Филипче.

Според него, како резултат на оваа стратегија имаме рана детекција на асимптоматски случаи и нивно изолирање.

„Анализата во однос на процентот на позитивни од тестирани случаи покажува дека имаме просек од 13 проценти од вкупниот број на направени тестови и во изминатиот период оваа бројка не се менува значително“, додаде Филипче.

Тој потенцираше дека светот е далеку од крајот на пандемијата, бидејќи земјите кои веќе имаа прогласено крај на пандемијата, според најновите информации повторно имаат нови случаи на Ковид-19.

Новиот бран на коронавирус кај нас дојде порано, граѓаните мора да прифатат дека ова ќе трае подолго од што се очекуваше, изјави министерот за здравство, Венко Филипче.

Тој на денешната прес – конференција сподели и информации и анализи од Институтот за јавно здравје за последните две недели.

„Од последниот извештај од 20 до 28 јуни, споредено со претходната недела, регистрирани се 303 помалку нови случаи, 8 помалку смртни случаи, 216 повеќе оздравени пациенти.
Изминатата недела има 860, што е значајно помалку од 1000 случаи во просек во минатите три недели“, рече Филипче.

Тој појасни дека Р-нула факторот на преносливост во изминатите 10 дена, само два до три дена бил над 1,1, а целиот останат перод бил околу 0,9.

„Најзастапени се возрасните лица над 60 години со 26 проценти. 44 проценти од нив биле лица со претходни хронични заболувања. Апелирам возрасните и хронично болните да бидат исклучително внимателни. Смртноста во оваа група е и највисока“, рече Филипче.

Најголем дел од регистрираните случаи се од Скопје, кое е најголемо жариште на вирусот.

Тој го истакна растот на новите случаи на Ковид-19 во земјите од регионот.

„СЗО извести дека 60 проценти од слуаите, на 10 милиони пациенти од светот се регистрирани во месец јуни. Тоа значи секаде има нов бран, а кај нас дојде нешто порано. Состојбата во светот исто така пoкажува дека вирусот во текот на летото ќе исчезне не се остварија. Светската статистика говори дека има пикови на новозаразени и починати, вирусот е тука и ќе остане подолго време, а ние треба да бидеме подготвени“, рече министерот Филипче.

Тој додаде дека граѓаните мора да прифатат дека ваквата реалност ќе трае подолго од она што сите земји во светот го очекуваа.