Македонија
„Фајненшл тајмс“: Преспанскиот договор е достигнување за прослава на Балканот

Договорот за решавањето на 27-годишниот спор помеѓу Грција и Македонија, што неделава влезе во процедура за ратификација во грчкиот парламент, претставува достигнување за прослава на Западен Балкан, пишува британскиот весник „Фајненшл тајмс“.
„Македонија беше заглавена во економска и геополитичка ситуција кога стана независна држава по распадот на Југославија во 1991 година“, наведува британскиот весник и додава дека Грците се сомневале во територијални претензии од македонска страна за делови на истоимениот северен грчки регион.
Поттикнати од честите јавни протести, пишува весникот, грчките политичари долго време ги блокираат скопските амбиции за членство во НАТО и ЕУ поради одбивањето на Македонците да го променат уставното име оставајќи два милиона граѓани со мали изгледи за економски просперитет и без гаранции за нивната безбедност.
„Македонскиот националистички лидер Никола Груевски за време на децениското владеење се обидуваше да изврши притисок врз Атина со производство на лажно древно македонско наследство за својата нација, преименување на аеродромот и подигнување споменици на Александар Велики и Филип Втори Македонски“, пишува „Фајненшл тајмс“.
Како што наведува весникот, ова експериментирање во изградба на нацијата дополнително предизвикало без кај Грците, но помогнало целата македонската јавност да го пренасочи вниманието од корупцијата и лошото владеење.
„На новоизбраниот премиер Зоран Заев и неговиот грчки колега, Алексис Ципрас, им припаѓаат заслугите за постигнатиот компромис. Грчкиот премиер ја презеде одговорноста и покрај широко распространетата грчка опозиција“, пишува британскиот весник.
Понатаму, во текстот се додава дека во јуни минатата година премиерите на двете земји го потпишале преспанскиот договор преименувајќи ја земјата во Република Северна Македонија признавајќи ги нејзиниот јазик и култура, а притоа укинувајќи ги сите иредентистички референци во историските учебници.
Како што објаснува „Фајненшл тајмс“, очигледно грчкиот премиер го има на своја страна потребниот број пратеници неопходни за ратификација на договорот.
„Ципрас дојде на власт во Грција како популист ветувајќи им на избирачите дека ќе ги уништи болните мерки за штедење на ЕУ и ММФ, кои потоа продолжи да ги спроведува. Неговата принципиелна поддршка кон договорот со Македонија би можела да го чини скапо на изборите што ќе бидат одржани напролет. Очигледно ни тој ни Заев не воспоставија широко мнозинство во јавната или политичката елита по ова прашање. Но, ова е вистинскиот избор за Грција, Балканот и за Европа“, се заклучува во текстот на „Фајненшл тајмс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.