РКЕ да ја преземе во целост надлежноста во формирање на конечна цена на водата – е пораката од тркалезна маса „Иницијатива за промена на постапката за утврдување на тарифите за водни услуги и влијанието на соодветните тарифи врз најгорливите проблеми со кои се соочуваат комуналните претпријатија“ во организација на Здружение на даватели на комунални услуги – АДКОМ.

Податоците покажуваат дека актуелниот начин на определување на цената е сложен, финансиски неодржлив, а услугата несоодветна поради што загубите на вода на национално ниво се искачија на 64%. Анализите на РКЕ покажуваат дека од 79 претпријатија што обезбедуваат водни услуги, за 20 од нив се донесени регулаторни одлуки, при што за 11 од нив советите на општините не дале согласност, а додека девет Јавни комунални претпријатија воопшто не ни поднеле барање за нова цена.

„Целта на ова иницијатива е преку интервенции во законските решенија да се создаде поедноставен, транспарентен и стабилен систем за утврдување на тарифите за водни услуги. Нудиме јасен и едноставен процес во формирање на конечната цена. Предлагаме кратење на бирократскиот процес, од шест во два чекори, со доставување на барање и утврдување на конечна цена . РКЕ подолго време алармира дека сегашниот начин на утврдување на цена е неефикасен: се доведува во прашање квалитетот на услугата, дефектите се зголемуваат, а јавните комунални претпријатија се борат за ликвидност“, изјави Лирим Сулејмани, заменик претседател на РКЕ.

Анализите покажуваат дека од година во година трошиме поголеми количини на вода, а наплата се намалува и бројот на вработени се зголемува.

„Актуелните тарифи за вода не ги покриваат реалните трошоци и затоа јавните комунални претпријатија работат со загуба, па општините се приморани да ги субвенционираат. Последиците се мултидимензионални, а она што е најзагрижувачки е дека поради недостаток на средства, инвестиции нема и процентот на загуба на вода од година во година расте и сето тоа е резултат на старата водоводна мрежа. Со реализација на оваа иницијатива – ќе се создадат предуслови РКЕ да спроведе регулаторни одлуки и мерки со што ќе се обезбеди самоодржливост на ЈКП на долг рок. Ние дефинираме конечна цена, но предвидуваме и задолжителни средства за инвестиции и го ограничуваме бројот на вработени“, посочи Фатон Амбари член на РКЕ.

Општина Аеродром изрече парична глоба од 1 000 евра за правно лице и 300 евра за управителот на истата фирма поради прекршување на Законот за јавна чистота.

„Санкциите следат по извршена контрола, при што инспекциските служби утврдија дека од градилиште во непосредна близина на ПС Аеродром во Ново Лисиче во сообраќај се вклучувале возила со валкани гуми, со што директно се нарушува чистотата на животната средина и се прекршуваат законските одредби.

Општина Аеродром потсетува дека ваквите прекршоци се недозволиви и дека ќе се санкционираат строго и без исклучок“, велат од Општината.

„Во наредниот период, Општина Аеродром, покрај редовните, најавува и засилени контроли на сите активни градилишта. Контролите ќе бидат насочени кон тоа дали се почитуваат сите мерки за заштита на животната средина, дали се преземаат обврските за спречување на загадување, дали се одржува јавната чистота на градилиштата и дали се избегнува узурпација на јавните површини при градежните активности.

Општина Аеродром упатува апел до сите правни и физички лица да ги почитуваат законите и прописите, затоа што само така можеме заеднички да обезбедиме чиста, здрава и безбедна средина за сите жители.

Општина Аеродром останува посветена на редот, хигиената и квалитетот на живот во урбаната заедница“, се наведува во соопштението од Општината.

„Секое дете има право да учи, да биде во средина каде го прифаќаат и да може, без оглед на пречките, да се развива. Министерство за образование и наука континуирано работи на унапредување на инклузивноста на националниот образовен систем. Одговоривме на барањата на многу родители кои сакаа да имаат право на избор во какво училиште ќе оди нивното дете. Ги послушавме и стручните лица кои забележуваа дека тоталната инклузија направи големи проблеми кај децата со поголеми потешкотии или мултихендикеп. Сега, со измени во регулативата, избор е на родителите заедно со Службата за функционална проценка на деца и млади, дали детето ќе оди во редовно училиште или во ресурсен центар, каде што има на располагање многу повеќе стручни лица и кадешто може да му се обрне повеќе внимание. Не е целта овие деца само формално да бидат вклучени во редовно образование, туку да имаат суштински напредок“, велат од МОН.

„Ја јакнеме поддршката. За децата со посебни образовни потреби вклучени во редовно школување, значајно го зголемивме бројот на образовни асистенти. Во основното образование веќе имаме над 1.300 образовни асистенти. За прв пат од оваа учебна година, како системска мерка, воведовме 130 образовни асистенти и во средното образование. Дополнително, во секое училиште има инклузивен тим, кој им дава подршка секогаш кога треба. А наставниците и асистентите добиваат помош од државните основни и средни училишта со ресурсни центри.

Ги унапредуваме капацитетите на воспитно-образовниот кадар. Континуирано се организираат обуки за инклузија и пристапи во поучувањето на ученици со посебни образовни потреби. Наставниците учат да препознаваат различни потреби кај учениците и да применуваат соодветни методи на работа.

Развиваме култура на вклучување. На посебни советувања родителите учат да не ги маргинализираат овие деца, како да ги поддржат и да им помогнат.

Одвојуваме повеќе буџетски средства за инклузија. Дополнително, и со новите формули за пресметка на блок дотации, предвидовме еден од елементите за зголемени дотации да биде инклузијата, односно средствата до општините се префрлаат и во зависност од бројот на дечиња со попреченост.

Пораката што ја испраќаме на 3 Декември – Денот на лицата со попреченост е: квалитетно инклузивно образование не е можно без развиено инклузивно општество. Секој од нас, во својата средина треба да придонесе кон градење заедница каде лицата со попреченост не се спомнуваат само еден ден, туку се вклучени во секојдневните активности и живеат, учат, работат и се дружат со луѓе кои ги поддржуваат, разбираат и не ги отфрлаат“, соопштуваат од МОН.