Мизрахи ја загрози македонската европерспектива или преведено – Евреите се опасност за Европа, како изваден цитат од говорите на Гебелс и неговиот фирер Хитлер.

Со ваква објава реагира на социјалните мрежи претставничката на ВМРО-ДПМНЕ кога портпаролката на СДСМ, Богданка Кузеска, денеска оцени дека со изборот на Мизрахи во извршниот комитет, Мицкоски ја потврдил антиевропската матрица на ВМРО-ДПМНЕ.

„Мицкоски ја избра токму Рашела Мизрахи да го брани пред своите, пред членовите на ВМРО-ДПМНЕ, истата  таа што како министерка во техничката Влада ги спроведуваше деструктивните политики на Мицкоски, со што го прекрши Уставот и постоеше опасност да го загрози евроинтегративниот процес на земјата“, рече портпаролката на СДСМ.

Мизрахи, пак, вели дека ова се срамни изјави од страна на владејачката партија.

„Очекувам во следната ваква изјава на СДС да бидам нацртана како карикатура со огромен нос и очила“, напиша Мизрахи алудирајќи на нацистичките стереотипи за Евреите, додавајќи – знам дека нематe срам, но Македонија се срами од вас.

Премиерот Зоран Заев денеска го прими новоименуваниот амбасадор на Република Словенија, Милан Предан, при што беше изразено задоволство од одличните билатерални односи на двете земји.

Како што информираат од владината прес-служба, на средбата било истакнато дека двете земји ги поврзува долгогодишно пријателство и соработка, а Северна Македонија во Словенија има искрен поддржувач во процесот на пристапувањето во ЕУ, како и близок партнер во НАТО.

Разговарајќи за пандемијата на Ковид-19, премиерот и амбасадорот констатирале дека заемната поддршка на двете земји за време на здравствено-економската криза е од исклучително значење за надминување на последиците што ги чувствуваат граѓаните.

Воедно, било констатирано дека Северна Македонија и Словенија остануваат посветени на создавање услови за зголемување на економската и трговската соработка, како и унапредување на развојната соработка.

Министерот за здравство, Венко Филипче, денеска оствари средба со германската амбасадорка Анке Холштајн по повод обезбедената помош од Амбасадата во справувањето со пандемијата на Ковид-19.

Како што информираат од Министерството, станува збор за осум респираторни апарати, тип „дрегер евита В 600“, кои имаат модул и за инванзивна и за неинванзивна нега.

„Со оваа донација се зајакнуваат капацитетите на јавните здравствени установи во земјата. Вкупната вредност на донацијата изнесува над 230 илјади евра, а таа е обезбедена преку сојузната организација за техничка помош THW“, се наведува во соопштението.

Амбасадорката истакна дека медицинските апарати доаѓаат во вистинско време кога е потребна помош.

„Оваа донација е по иницијатива на сојузната влада за време на германското претседателство во советот на Европската Унија за помош на државите од Западен Балкан при пандемијата на Ковид-19. Со оглед на актуелните состојби, главен акцент на нашето претседателство е справување со пандемијата и нејзините последици. Овде, во регионот на Западен Балкан, сакаме да покажеме дека нашите партнери при борбата може да се потпрат на нас. Германија досега го поддржува регионот со 15 милиони евра. Освен тоа, Европската Унија помага со 3,3 милијарди евра, во кои Германија учествува со речиси една третина. Вкупната вредност на донацијата е 233 илјади евра, а се имплементира преку германската сојузна агенција за цивилна заштита THW“, потенцира Холштајн.

Министерот Филипче ѝ се заблагодари на Амбасадата на Германија за континуираната помош и за досегашната успешна соработка во справувањето со коронавирусот.