Денес на првиот наставен ден од второто полугодие јасно е дека сѐ останува по старо. Учениците, професорите и родителите повторно ќе се соочуваат со истите проблеми, ќе се жалат меѓу себе, ќе си бараат помош, ќе се мачат, а времето ќе врви како и во претходното полугодие, обвини Комисијата на образование и наука на ВМРО-ДПМНЕ.

„ Наставниците повторно ќе се снаоѓаат со сопствени лаптопи, со прекините на интернетот, со притисокот да пишуваат оценки, директорите со пишување нереални извештаи за текот на наставата, а и за заразените од КОВИД-19, родителите со сѐ ова и со трошење на огромен дел од своето време за напредок на сопственото дете.

Учебници нема да има ниту во второто полугодие, особено за средните стручни училишта. Националната платформа за далечинско учење воопшто не профункционира, а наставниците повторно нема да добијат навремена професионална обука. Над 10.000 ученици повторно ќе следат опциона настава, односно настава на телевизија и со печатени материјали и притоа за нивниот напредок не е можна реална контрола на постигнувањата.

Министерката Мила Царовска наместо да направи анализа на проблемите и евалуација на постигнувањата цел распуст се бави со нешто, наречено Концепција за реформа на образованието искритикувана и отфрлена од сите релевантни институции.

Додека министерката се бави и на мускули ја турка концепцијата, наставниците и децата остануваат да се снаоѓаат како умеат и знаат, а таа продолжува да се фали со 90% успешна онлајн настава.
Жално и срамно! Не ви веруваме! Кому му се потребни лаги и невистини? Потребно е децата успешно да ја завршат годината!“ се наведува во соопштението.

Во однос на реформата на основното образование кое се најавува од страна на Министерството за образование и наука, НСДП цени дека повеќе од потребни се квалитативни промени кои ќе не поместат од дното на светските рангирања за писменост. Според НСДП, потребен е инклузивен процес на дијалог и дебата, во кој ќе бидат вклучени сите чинители од кои зависи испорачувањето на квалитетни резултати во оваа сфера.

„ Освен институциите на системот, како неизоставен дел од напорите за подобрување на состојбите со образованието потребно е активно да бидат вклучени сите засегнати страни, како што се наставниците, професорите, учениците и родителите. Квалитетното образование да се постави како врвен национален приоритет, со јасно формулирани цели и методи на развивање на способностите, знаењата и вештините на учениците. Само на тој начин може да го направиме првиот исчекор кон воспоставување на модерен и динамичен образовен систем од кои ќе излегуваат оформени и слободоумни млади генерации, оспособени за предизвиците кои ги носи иднината“ наведуваат од партијата.

НСДП смета дека најнапред е потребно е да се води сметка целокупниот образовен процес да биде ослободен од стереотипите и предрасудите, од идеолошките и политичките митови, образованието да прерасне во мост на разбирање помеѓу младите генерации со различна етничка припадност и различни погледни на определени општествени процеси.

„ Унапредувањето на материјалните аспекти и реалното профункционирање на вистинско бесплатно образование, цениме дека претставуваат цели кои заслужуваат внимание во дебатата која се отвора за реформа на основното образование. Ослободувањето на родителите од трошоците кои ги имаат за своите деца за оброк, посети на музеи, училишни екскурзии, како и за различни наставни помагала кои се неопходен дел од образовниот процес, се прашања кои заслужуваат одговор од институциите на системот. Приоритет треба да добие и надминувањето на лошите материјално-технички и санитарни услови кои постојат во еден дел од училиштата во руралните средини, каде учениците немаат ниту пристојни хигиенски услови.

Состојбите со основното образование директно влијаат на високиот степен на неписменост кај млади генерации, со акумулиран потенцијал да наштети на севкупниот општествен и економски развој на државата. Ова е системски проблем кој бара ургентно надминување, но истовремено е потребно фокусот да биде проширен и на унапредување на состојбите во средното и високото образование. Затоа НСДП смета дека е потребно да се постави јасна цел во наредните 10 години како држава да дојдеме на ниво на писменост од 98%, а трошоците за образованието кои државата ги издвојува да достигнат 5% од вредноста на БДП на земјава.

Со зајакнувањето на финансиските основи на образованието ќе се унапреди материјалниот и општествен статус на наставниците и професорите, нивната професионална мотивираност за усовршување и самообразование. Преку програми за интензивна дополнителна обука, квалификација, доквалификација или преквалификација да добиеме наставници кои ќе бидат воспитувачи, а не строги судии. Издвојувањето на поголеми финансиски средства за образованието ќе значи квалитетна и компетентна настава во сите степени на образовниот процес“ порачуваат од НСДП.

ЈП „Водовод и канализација“ – Скопје известува дека тендецијата за масовно крадење на капаците на шахтите и решетките од сливниците продолжува и денес.

Од компанијата додаваат дека заради спречување на ваквиот вандализам и санкционирање на сторителите, ќе се засилат контролите на комуналните служби во општините, но и на откупните центри за старо железо, каде што, доколку се пронајдат вакви предмети, ќе бидат изречени казни во согласност со законот.

„Во општина Карпош денес повторно е потврдена кражба на капаци на шахти на следните локации: булевар Партизански одреди, на велосипедската патека кај Поликлиниката „Букурешт“, кај ГУЦ и на булеварот 8 Септември. Ваквиот вандализам негативно се одразува и ја загрозува безбедноста на граѓаните и на учесниците во сообраќајот. И овој случај е документиран и пријавен во полициска станица, во комуналните служби на Град Скопје и во комуналните служби на Општината“, соопштија од „Водовод“.

Оттаму додаваат деќа ќе бидат поставени нови капаци на посочените локации, но апелираат до јавноста и граѓаните да не се крадат капаци и решетки од улиците бидејќи, како што велат, на тој начин не му се нанесува штета само на претпријатието туку се загрозува и безбедноста на граѓаните и на учесниците во сообраќајот.