Во сабота, на 31.01.2026 година, во 12:00 часот, „Стоп за Усје“ излегува на протестен марш кој ќе почне пред Владата, ќе продолжи кон Собранието, а ќе заврши пред Министерството за животна средина и просторно планирање.

„Ги повикуваме сите граѓани, кои сакаат да се изборат за правото на чист воздух, да се приклучат на овој марш. Меѓу другото ги повикуваме институциите будно да ја следат состојбата и бурно да реагираат, бидејќи ниту еден профит не е поважен од животот на граѓаните! „Стоп за Усје“ веќе ги испрати своите барања до низа институции, но никој од нив не се одважи да даде било каков одговор. Затоа, одговорите ќе ги бараме повторно на улица“, се вели во најавата.

Од „Стоп за Усје“ потсетуваат дека на протестите се забранети партиска промоција и симболи, а истовремено апелираат на мирен протест, без насилство и говор на омраза.

„Повикуваме на масовност за сите заедно да кажеме СТОП за труењето од УСЈЕ кое нè засега сите. Сакаме да нагласиме дека ниту една лага и манипулација од Усје и надлежните, кои со сите сили се обидуваат да го одбранат неодбранливото, нема да помине и дека сè додека нè уверуваат во бројки од мерењата кои ги прави самата фабрика, отпорот нема да се смири! Се гледаме во сабота, за да покажеме дека гласот на граѓаните е поважен и посилен отколку нечии бизнис интереси!“, пишува во најавата.

Во пресрет на утрешниот протест за минималната плата да се зголеми на 600 евра организиран од Сојузот на синдикати на Македонија (ССМ) премиерот Христијан Мицкоски останува на ставот што имаше цела измината година, дека Владата ќе поддржи договор меѓу работниците и работодавачите.

„Секој има право да си протестира. Ние минималната плата, согласно Закон, ќе ја зголемиме во март месец односно согласно платите што ќе ги добијат работниците во април, платата ќе биде зголемена. Ние рековме секое решение што ќе го постигнат во тој бипартитен дијалог синдикатите со работодавачите, ќе го поддржиме“, рече премиерот Мицкоски одговарајќи на новинарски прашања по поставувањето на камен-темелник за изградба на нова спортска сала во ООУ „Григор Прличев“ во Железара.

По повеќе од една година неуспешни обиди за договор со работодавачите и Владата за зголемување на минималната плата, ССМ за утре најави голем работнички протест преку кој бара зголемување на минималната плата на 600 евра и линеарно зголемување од 100 евра на сите останати плати оти со законското зголемување во март минималната плата ќе се зголеми само за околу 25 евра.

Општината нема донесено урбанистички планови за 20 населени места, нема преземено мерки за отстранување на бесправно изградените објекти, особено во заштитените подрачја, поставувањето урбана опрема е без дозволи и платени комунални такси, а субвенционирањето на јавните претпријатија во вкупен износ од 36.505 илјади денари е без Програма и претходно обезбедена согласност од Советот

Државниот завод за ревизија изврши ревизија на финансиските извештаи и ревизија на усогласеност на Општина Охрид за 2024 година, при што се констатирани состојби, неправилности и неусогласености во работењето.

Ревизијата утврди дека општината нема донесено урбанистички планови за 20 населени места, а во дел од населените места се изведени градби и градежни активности за индивидуално домување и хотелски комплекс без платен надоместок за уредување на градежно земјиште и без издадени одобренија за градење.

Констатирано е дека не се преземени мерки за отстранување на бесправно изградените објекти, иако за периодот од 2019 до 2024 година се издадени 456 правосилни управни акти за нелегални градби. За објекти кои не ги исполнуваат условите за легализација донесени се 4.847 решенија за одбивање, но истите не се отстранети, вклучително и во заштитени подрачја, меѓу кои и Национален парк Галичица.

Ревизијата утврди и дека не е донесен урбанистички план за крајбрежјето на Охридското Езеро, а за Годишната програма за поставување урбана опрема за 2024 година не е обезбедено позитивно мислење од Управата за заштита на културното наследство. Во текот на 2024 година, 23 угостителски објекти користеле јавна површина без одобрение и без платена комунална такса, а одобренија издадени за три месеци се користеле цела година.

Во делот на финансиското работење, ревизијата утврди дека општината не искажала побарувања за надоместок за одржување на јавна чистота, додека ЈП „Охридски Комуналец“ со години не ги уплатува овие средства во општинскиот буџет. За 2024 година претпријатието прикажало обврски од 22,9 милиони денари, а општината има поднесено тужби за претходни години во износ од 53,8 милиони денари. Не се искажани ниту побарувања за комунална такса за паркирање, која, според евиденцијата на ЈП „Билјанини извори“, изнесува 3,9 милиони денари.

Без одлука на Советот е извршен отпис на побарувања во износ од 534 илјади денари за комунални трошоци и отпис на 4,8 милиони денари претплатни салда без соодветна документација. Даночните обврзници кои стекнале нов или дополнителен имот не се задолжени со данок на имот, а за ненавремено платениот данок не се пресметува и наплатува камата.

Ревизијата утврди дека субвенции за јавните претпријатија во износ од 36,5 милиони денари се исплатени без донесена Програма и без претходна согласност од Советот. Дополнително, во 2024 година се исплатени 49,4 милиони денари за инфраструктурни проекти од втора категорија без обезбедено одобрение за градење и без проектна документација.

Во областа на културата и спортот, средствата се доделувани без објавен јавен повик и без утврдени критериуми, при што на спортски клубови и здруженија кои не аплицирале на јавен повик им се доделени 37,4 милиони денари, што претставува 59 проценти од средствата на програмата.

Државниот завод за ревизија наведува дека за надминување на утврдените состојби се дадени препораки до надлежните институции и одговорни лица.