Македонија
Фондот за иновации ја креира првата национална стратегија за вештачка интелигенција
Како резултат на глобалните трендови во дигитализацијата, по иницијатива на Фондот за иноваци и технолошки развој (ФИТР), денес почна со работа работната група чија цел е креирање на првата мационална стратегија за вештачка интелигенција во државата.
Во работната група се вклучени домашни експерти, но и успешни Македонци, кои се глобално признаени професионалци од оваа област и работат во светски познати компании и универзитети.
На стратегијата ќе работат: Татјана Митевска (Аспиегел СЕ), Бисерка Шемовска (менаџер за развој на бизнис и раководител на Академијата за вештачка интелигенција, Семос едукација), Илија Лалковски (Веб-фактори), Јасмина Мајстороска (Министерство за економија), Никица Кусиникова и Виктор Мирчевски (здружение „Конект“), Ѓoрѓи Маџаров (МАСИТ), Бардил Јашари (Фондација „Метаморфозис“), Ангел Џеков и Петар Фидановски (MИОА), Светлана Кордумова (Пиксајл), Христијан Ѓорески (ФЕИТ), Петре Ламески (ФИНКИ), Андреј Дамески и Филип Петровски (Дата мастерс).

„Вештачката интелигенција ќе биде во фокусот на работењето на Фондот во следниот период. Неодамна заврши и првиот јавен повик на ФИТР за дигитален асистент базиран на вештачка интелигенција, а за в година веќе е во план и креирање посебен инструмент за поддршка на стартап-компаниите што работат со вештачка интелигенција во земјата. Во целиот процес на креирање нови иницијативи на оваа тема ќе биде вклучен и словенечкиот Институт ‘Јожеф Стефан’ со кого ФИТР набргу ќе потпише меморандум за соработка“, посочи Коста Петров, директор на ФИТР.
Со креирањето на стратегијата ќе им се даде шанса на многу домашни иновативни стартап-компании да ги реализираат своите идеи и проекти, соодветно образование, како и современа опрема.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево со мала до умерена облачност, ќе дува повремено засилен северен ветер
Сончево со мала до умерена облачност. Ќе дува слаб до умерен, а долж Повардарието повремено засилен ветер од северен правец (локално до 50 km/h). Минималната температура ќе биде во интервал од -2 до 6, а максималната ќе достигне од 9 до 16 степени.
Во Скопје, сончево со мала до умерена облачност. Ќе дува слаб до умерен, а во делови од котлината повремено засилен ветер од северен правец. Минималната температура ќе се спушти до 1, а максималната ќе достигне до 13 степени.
Времето во наредните денови
Под влијание на поле на висок воздушен притисок, следува период на стабилно и сончево време со мала до умерена облачност и со пониски утрински температури. Во четврток ќе дува умерен, повремено засилен ветер од северен правец, поизразен долж Повардарието.
Македонија
Дел од Автокоманда денеска без вода
Од ЈП Водовод и Канализација известуваат дека за денеска имаат планирано неколку интервенции и тоа:
· поради промена на вентил од 2.5“ на улицата Јани Лукровски 12, прекинато водоснабдување ќе имаат корисниците од истата улица.
Водоснабдувањето ќе биде прекинато од 09:00 часот до завршување со работните активности.
Македонија
Угинат балкански рис најден на патот Ресен – Охрид, постојат само 50-тина единки од овој вид
Угинат рис денеска е пронајден на патот Ресен – Охрид. Од Македонското еколошко друштво (МЕД) велат дека ваквиот случај не треба да нè остави рамнодушни, особено ако се земе предвид дека постојат уште само 50-ина единки на балканскиот рис.
„По дојава од Здружението на ловци „Преспа-Ресен“, денеска на терен констатиравме дека е угинат рис на патот Ресен-Охрид. Во тек е координирана акција со Министерството за животна средина и просторно планирање, Државниот инспекторат за животна средина, Агенцијата за храна и ветеринарство и Македонското еколошко друштво со цел земање примероци за анализа и транспортирање на угинатото животно на Факултетот за ветеринарна медицина при УКИМ – Скопје заради обдукција“, велат од МЕД.
Од таму велат дека за зачувување на загрозените видови потребно е да се изградат зелени мостови.
„Ваквите случаи не нè оставаат рамнодушни, особено ако се земе предвид дека постојат уште само 50-на единки на балканскиот рис. Истовремено, се јасен показател дека ако сакаме да ги зачуваме загрозените видови, мора да се планираат и градат зелени мостови преку кои животните ќе можат безбедно да се движат и да ги надминуваат пречките создадени од човекот“, велат од МЕД.
фото/Facebook/Македонско еколошко друштво

