Грчкиот премиер, Киријакос Мицотакис изјави дека процесот на интеграциите на Северна Македонија во ЕУ и поддршката на брендот „Македонија“ ќе бидат двете алатки што грчката влада ќе ги користи за да ги ублажи негативните последици од преспанскиот договор.

Грчкиот премиер ја спомена критиката на главната опозициска партија СИРИЗА за евентуално прифаќање на договорот за Преспа, но објасни дека тој и претходно предупредил оти штом веќе еднаш е ратификуван договорот, тој не може да се менува еднострано.

Сепак, Моцотакис најави борба за регулирање на грчките трговски марки и етикети со името „Македонија“ во нивните производи и дека тој исто така ќе ги искористи можностите за пристап на Северна Македонија во ЕУ, на начин што Грција ќе може да извлече најголема корист од овие преговори, пренесуваат грчките медиуми.

Министерот без ресор задолжен за странски инвестиции, Елвин Хасан, беше во работна посета на Јалова, Република Турција, каде се сретна со претставници на Стопанската комора на Јалова.

„Фокус на средбата беа новите економски политики и подобрената бизнис-клима која е привлечна и за домашни и за странски инвеститори. Министерот Хасан им ги презентираше новите измени на Законот за Финансиска поддршка на инвестиции кои беа усвоени со цел да се подобрат условите за деловно работење и да се зголемат инвестициите со што ќе се поттикне економскиот раст на македонската економија“, соопштија од неговиот кабинет.

На средбата исто така се дискутирало за актуелни прашања и предизвици во поглед на бизнисот и инвестициите. Министерот Хасан ги поканил претставниците на Стопанската комора да ја посетат нашата земја, да го увидат нејзиниот потенцијал и ги охрабри да инвестираат во Република Северна Македонија.

Во склоп на посетата на Јалова министерот се сретна и со градоначалникот на Јалова, Вефа Салман, и гувернерот на Јалова, Муаммер Ерол. На средбите се разговарало за актуелните регионални случувања, можноста за проширување и продлабочување на соработката помеѓу Република Турција и Република Северна Македонија, а воедно било изразено и задоволство за добрите пријателски односи од двете страни.

„Бугарскиот премиер Бојко Борисов во никој случај не ме повика за македонскиот бизнисмен Орце Камчев“, изјави премиерот, Зоран Заев во интервју за „БГНЕС“.

Запрашан за случајот „Рекет“ и информациите дека Софија наводно побарала Камчев да биде заштитен, Заев рече дека Борисов не би си дозволил такво нешто, бидејќи е европски премиер и го почитува владеењето на правото.

„Ние сме европска земја и сакаме да зборуваме за иднината и да направиме модерна политика. Ова е политиката што ја прават Макрон и Меркел, политика ориентирана кон иднината, која им дава перспективи на младите“, заклучи македонскиот премиер Зоран Заев.

Премиерот во интервјуто говореше и за договорот за добрососедство со Бугарија, оценувајќи дека Комисијата за историски прашања е формирана за да се изгради пријателство меѓу двете нации, а тоа ги охррабрува него и Борисов. Заев ја најави и изградбата на Коридорот 8 и истакна дека Бугарската православна црква одиграла историска улога за Македонската православна црква.