Македонија
Царовска: Во 600 училишта настава со физичко присуство, во преостанатите на далечина
Утре, и официјално почнува новата учебна година, 600 училишта ќе одржуваат настава со физичко присуство, а за преостанатите достапно е учење на далечина, истакна на прес-конференција министерката за образование и наука, Мила Царовска.
Таа потенцира дека оваа година ќе биде многу поинаква од другите бидејќи, како што рече, пандемијата предзвика тектонски промени во нашите животи, а образовниот процес за многу кратко време мораше да претрпи целосна трансформација. Изрази благодарност до сите што помогнаа во организацијата за успешен почеток и очекува соработката да продолжи и во периодот што следува.
Осврнувајќи се на Националната платформа, министерката рече дека вчерашниот тест на системот „Тимс“ се покажал успешен и учениците ќе почнат да ја следат наставата согласно планот. Часовите ќе се одвиваат онлајн онака како што е планирано, а продолжува оптимизацијата на другите модули од самата платформа, кои сè уште не се активни.
„Со задоволство можам да кажам дека ја завршивме успешно обуката на наставниците за користење на платформата. 1.600 наставници ги поминаа обуките од мастер-тренерите и станаа училишни обучувачи. Тие понатаму ги обучуваа наставниците во сите училишта во државата. Најважно е што во секое училиште имаме училишни обучувачи, кои вештините за работење на платформата им ги пренесуваат на своите колеги и ќе бидат нивна поддршка“, нагласи Царовска додавајќи дека колегите од ФИНКИ во текот на целата учебна година ќе бидат на располагање за наставниците, родителите и учениците, а со цел навремено надминување на евентуалните предизвици од техничка природа.
Царовска се осврна и на, како што рече, едно од најгорливите прашања изминативе денови, а тоа е како децата кои немаат компјутери ќе ги следат предавањата потенцирајќи дека на ниедно дете правото на образование нема да му биде скратено.
„Оние деца што немаат опрема, компјутери или од кои било причини не може да следат настава онлајн, може да ја следат од училница. Доколку, пак, не може или родителите одлучиле да не одат во училница, за сите ќе биде обезбеден потребниот печатен материјал за да учат дома. Овие ученици ќе бидат во постојана комуникација со наставниците, а сите предавања ќе може да ги следат и на телевизија како снимени часови“, рече министерката додавајќи дека можеби ова не е најидеалното решение, но сепак овозможува опфат на сите ученици за редовно следење на наставата. Информира и дека во речиси 600 основни и средни училишта е дозволено да се организира настава со физичко присуство од вкупно пристигнати 864 барања од страна на основачите“, рече Царовска.
Посакувајќи им успех на сите ученици и наставници, Царовска апелира сите да бидат трпеливи, истрајни и почитувајќи ги мерките за заштита од Ковид-19, како што рече, заеднички да придонесеме за успешен почеток и заокружување на новата учебна година.
На прес конференцијата се обрати и заменик-министерот за образование и наука, Арафат Шабани, кој рече дека пандемијата само го забрза процесот на модернизација на националниот образовен систем, во кој прв чекор е дигиталната транзиција преку изработката на Националната платформа за далечинско учење. Шабани рече дека предизвици секако ќе има во новата учебна година бидејќи се соочуваме со целосно нова состојба, но ќе се надминуваат тековно за што, како што рече, очекува соработка и разбирање од наставниците, учениците и од родителите.
Во името на работниот тим задолжен за развој и имплементација на Националната платформа за учење на далечина се обрати Александра Наќева-Ружин, која нагласи дека конципирањето и развојот на решение бил исклучително динамичен и комплексен процес, кој се спроведува во крајно лимитирани временски услови.
„Да се дизајнира и развие онлајн-решение кое ќе биде функционално и стабилно и имплементирано на унифициран начин од страна на 26.000 наставници при одржување настава на над 250.000 ученици, и тоа на разни наставни јазици, е исклучително комплексна задача и неверојатно амбициозна земајќи ги предвид кусите временски рокови. Но, со јасна цел, беспрекорен план и, пред сè, одличен тим, за безмалку еден месец успеавме да развиеме и подготвиме за имплементација интегрирано решение за онлајн-образование во сите над 1.000 јавни основни и средни училишта на територијата на целата држава. Платформата ги зближи академијата и јавниот сектор и е резултат на егземпларна соработка помеѓу Министерството за образование и наука и ФИНКИ, која треба да се развива и негува и понатаму“, рече Наќева-Ружин.
Продеканот на ФИНКИ, проф. д-р Боро Јакимовски, рече дека Факултетот ја презеде одговорноста да ја подготви платформата, при што за неполн месец ја постави инфраструктурата, која е основата за развој на платформата.
„Платформата тековно има околу 270 илјaди корисници, на неа се креирани околу 150 илјади предмети и тековно до сега се имаат најавено речиси 160 илјади корисници. Корисничките лозинки беа креирани и дистрибуирани како за наставниците така и за учениците. ‘Мајкрософт тајмс’ е делот што поактивно ќе се користи во претстојниот период со цел да се одржат онлајн-предавањата, а платформата ќе ја ставиме на располагање преку која ќе бидат достапни материјалите, како и тестовите и други содржини во електронска форма“, рече Јакимовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево со умерена локална облачност: температурата до 14 степени
Сончево со мала до умерена локална облачност. По одделни котлини ќе има услови за појава на утринска магла. Ќе дува слаб до умерен ветер од западен и северозападен правец. Минималната температура ќе биде во интервал од -6 до -1, а максималната ќе достигне од 7 до 14 степени.
Во Скопје, во утринските часови во делови од котлината ќе има услови за појава на магла. Во текот на денот времето ќе биде сончево и тивко со мала облачност. Минималната температура ќе се спушти до -5, а максималната ќе достигне до 9 степени.
Времето во наредните денови
Во петок ќе се задржи стабилно и потопло време со услови за појава на утринска магла по котлините. Во деновите од викендот ќе има зголемена облачност и повремени локални врнежи од дожд, а на планините од снег. Дневната температура повторно ќе биде во опаѓање.
Македонија
Грипот ја однесе првата жртва: почина 75-годишна жена
Вирусот на грипот ја однесе првата жртва оваа зима. Седумдесет и петгодишна жена починала пред три дена на Клиниката за инфективни болести. Пациентката имала повеќе коморбидитети и не била вакцинирана против грип.
Во моментов на Клиниката се хоспитализирани 25 пациенти со компликации од грип, oд кои повеќето се возрасни лица со хронични заболувања и невакцинирани од грип.
Директорката на Институтот за јавно здравје (ИЈЗ), Марија Андоновска, пред неколку дена кажа дека пикот се очекува да биде во втората половина од овој месец и првата половина од февруари.
„Со враќањето на децата во училиште очекуваме дека и бројот на лица коишто ќе бидат заболени од грип или заболувања слични на грип може да биде зголемен“, рече Андоновска.
Институтот за јавно здравје препорачува оние коишто не се заболени да избегнуваат колку што е можно некакви собири или да престојуваат во простории или трговски центри каде што има голем број на луѓе, да избегнуваат контакт со веќе заболени лица или оние што ќе пројават некакви симптоми на кивање и кашлање. Често да се мијат раце со обичен сапун и вода, да се проветруваат просториите, да се почитуваат здрави животни навики – редовна хидратација со течности односно вода, лесна храна, витамини, минерали.
Македонија
Зајкова: Една изборна единица има смисла само со отворени листи
Претседателката на Либерално-демократската партија (ЛДП), Моника Зајкова, реагираше по одржаната лидерска средба во Клубот на пратеници, оценувајќи дека нејзиниот исход е „0 проценти економија и 100 проценти политика“.
„Очекуваниот исход од ‘лидерската’ средба е 0% економија и 100% политика. Една изборна единица има смисла само со отворени листи. Во спротивно, како и денес, само неколку мажи ќе продолжат да ја дефинираат судбината на Македонија, наместо граѓаните. Моќта и финансиите ќе останат кај нив, а за народот — трошки. Со отворени листи ќе има поодговорни народни избраници, а со тоа и повеќе пари за граѓаните“, напиша Зајкова на својот Фејсбук профил.
Од ЛДП посочуваат дека лидерската средба има смисла само доколку отвори суштински прашања што директно го засегаат животот и животниот стандард на граѓаните, а не доколку се сведе исклучиво на дилемата за укинување или задржување на техничката влада.
Во соопштението се наведува и дека, иако Зајкова е пратеничка и единствена жена-лидер на партија во Македонија, таа не добила покана за учество на средбата. Организаторите, како што се посочува, одлучиле да поканат само претставници на партии кои имаат пратенички групи во Собранието.
„Лидерските средби не треба да бидат поле за дневно-политички надмудрувања и покажување мускули, туку простор за носење решенија и одлуки што ќе придонесат за подобра иднина на сите граѓани“, наведуваат од Либерално-демократската партија.

