Министерството за труд и социјална политика последниот месец обезбеди 126 нови вработувања во градинките во Македонија, од кои повеќето се на неопределено време. Со ова последна согласност, од почетокот на годината досега, МТСП преку Министерството за финасии обезбеди средства општините да вработат 1.025 воспитувачки, негувателки и друг персонал во детската заштита. Од нив, 975 се на неопределено, а 68 на определено време, изјави денеска министерката за труд и социјална политика, Мила Царовска, која заедно со градоначалникот на општина Карпош, Стефан Богоев, ја посети градинката „Орце Николов“.

Ова е една од установите каде што има 24 нови вработувања. Од нив, 18 се на неопределено време, а 6 се замена на вработени што користат породилно или подолготрајно боледување и се на определено време, потенцира Царовска за време на својата посета.

„Бројките говорат дека оваа Влада посветено работи на подобрување на условите и на кадарот, каде што се згрижуваат најмалите. Драстично ги намаливме договорите на дело и трајно го вработуваме персоналот што ги чува децата затоа што секое дете ни е важно, но важен ни е и кадарот на кој сакаме да му го вратиме достоинството. Со ваквиот чекор ја прекинуваме праксата од минатото кога, изигрувајќи ги позитивните прописи, илјадници лица беа ангажирани со договори на определено време, договори за дело или ангажирани заради итни и неодложни работи, држени во неизвесност за да се користат за политички цели“, изјави министерката Мила Царовска.

Во соопштението на МТСП испратено по средбата се посочува дека исто така Министерството интензивно работи на градење систем на вработени преку кој би се постигнал професионален и кариерен развој на вработените.

„Со овој систем перманентно ќе работиме на подобрување на квалитетот на услугата на вработените во областа на детска заштита. Системот на работни места на вработените е поврзан и со зголемување на нивните плати и соодветно вреднување за секое постигнато ниво на професионален развој на секој вработен. Обезбедено и е зголемување на платите, односно сите 4.338 вработени со септемвриската плата исплатена во октомври добија и покачување од 5 отсто“, наведуваат од Министерството за транспорт и врски.