Во текот на вчерашниот ден во Стразбур, министерката за правда Рената Дескоска оствари официјална средба со генералниот секретар на Советот на Европа, Марија Пејчиновиќ Буриќ.

На средбата, министерката за правда во име на Владата го потпиша Протоколот за измена на Конвенцијата за заштита на лица во однос на автоматска обработка на лични податоци (CETS бр.223). Потпишувањето е историски момент за Северна Македонија, бидејќи за прв пат се потпишува конвенција во Советот на Европа под новото име, директно, без размена на писма.

Република Северна Македонија е 37 земја потписничка на протоколот со кој се врши модернизација на Конвенцијата за заштита на лица во однос на автоматска обработка на лични податоци (ETS 108) и на Дополнителниот Протокол кон Конвенцијата за заштита на поединците во поглед на автоматска обработка на лични податоци, во врска со надзорните тела и прекуграничниот пренос на податоци (ETS No.181), како и зајакнување на нивната примена.

Со модернизацијата на Конвенцијата 108 од 1981 година, нејзините оригинални принципи беа реафирмирани, некои се зајакнати, но утврдени се и нови заштитни мерки: Тие треба да се применуваат на новaта реалност на он-лајн светот, а новите практики доведоа до признавање на нови принципи во областа. Принципите на транспарентност, пропорционалност, одговорност, минимизирање на податоците, приватност по дизајн, итн., сега се признати како клучни елементи на механизмот за заштита и се интегрирани во модернизираниот инструмент.

Имајќи ги во предвид новите предизвици за заштитата на лицата во однос на обработката на личните податоци, како и фактот дека целта на модернизацијата која се врши со Протоколот е што подобро да се реагира на предизвиците во областа на приватноста кои произлегуваат од зголемената употреба на новите информациско/информатички технологии и глобализацијата во однос на обработката на личните податоци, се оцени дека е целисходно и од интерес за Република Северна Македонија да се пристапи кон потпишувањето на Протоколот за измена на Конвенцијата за заштита на лица во однос на автоматска обработка на лични податоци (CETS 223), соопшти Министерството за правда.

Осомничениот бизнисмен Орце Камчев во сведочењето пред судот рече дека однапред знаел преку Бојан Јовановски кој ќе дојде на распит, кој ќе биде уапсен.

“Ми беше два дена претходно најавено, знаев дека ќе ме викнат на распит, пред да ме извести Обвинителството”, рече Камчев пред судот.

Тој кога дошол со неговите адвокати Драган Малиновски и Антонио Апостолски во СЈО, во собата за сведоци, Катица Јанева лично му рекла: “Катица ми вика, тоа со Бојан што го договорате да го завршиш. Директно ми го кажа”.

Камчев рече дека неговата сметководителка Мими му ги спакувала во банкноти од по 50 евра.

“Му ги спакував намерно во Луј Витон, зашто тоа го сакаше, да не биде адидас… Боки беше навреден зашто сум му ги спакувал од по 50 евра, но ги зеде парите”

“Беше повикан во СЈО, спроведен од затворот, во шест навечер во канцеларија. Она јадеше мекици со сирење со Лиле. Они седеа и рекоа гаранцијата нема да важи зашто е под хипотека. Јас реков дека тоа не така..” кажа сведокот Камчев на прашање од адвокатот на Боки 13, Сашко Дуковски за висината на гаранцијата од 14 милиони евра, која не му била прифатена.

“Гаранцијата беше одбиена за Катица и Лиле да глодаат како хиени”, рече Камчев, а реагираше адвокатот на Јанева, Дељо Кадиев, Камчев да не ја навредува неговата клиентка и останатите.

Сведокот Орце Камчев кој повеќе од 1,5 час дава исказ пред судот за случајот “Рекет”, рече дека 350 илјади евра за рекетирање ги обезбедила неговата сопруга Ана, додека тој бил во притвор, за како што рече “да и’ бидат предадени на госпожата”.

“150 илјади евра позајмила од Зоран Милевски, а јас подоцна му ги вратив”, рече Камчев.

Тој рече дека по излегувањето од притвор сфатил дека треба да биде глумец во приказната.

Камчев кажа дека тоа се случило на средба во Орман меѓу Зоран Милевски, Ана Камчева и Бојан Јовановски.

“Она му вика тоа со Бојан ако не се заврши, ќе отворам уште три, четири постапки, директно обвинителката ги бара парите”, рече сведокот и дополни дека по нив на средбата дошол и Дејан Панделески, кој исто така е осомничен во истрагата “Империја”.