За сè што не е регулирано во Законот за Централен регистар и колективниот договор на ЦР се применуваат одредбите од Законот за дминистративни службеници и Законот за работни односи и воедно демантираме дека вработените во оваа институција се државни службеници, односно информираме дека вработените во Централниот регистар се административни службеници, велат од Централниот регистар како реакција на изјавата на пратеничката Невенка Стаменковска од ВМРО-ДПМНЕ.

Оттаму појаснуваат дека согласно со став 2 и 4 од член 4 од Законот за административните службеници за потребите на Централниот регистар се потврдени и регулирани со самиот Закон за Централен регистар, а воедно е дадена и утврдена можноста во самиот закон со колективен договор да се уредат прашањата за и од работен однос.

„Во врска со наводите од страна на пратеничката, упатени до Централниот регистар, поврзани со колективниот договор и постапката за вработување во институцијата, ја информираме дека целосно транспарентната постапка за вработување во Централниот регистар беше спроведена согласно со Законот за Централен регистар, сите позитивни законски норми и општи акти на Централен регистар, како и согласно со колективниот договор склучен помеѓу директор на Централен регистар и претседателот на Синдикалната организација на ЦР. Согласно со Законот за ЦР и Законот за работни односи, директорот на ЦР има потпишано нови договори за вработување со сите вработени за коишто нема ниту жалби ниту приговори од ниту еден вработен“, се наведува во соопштението на Централниот регистар.

Воедено ја известуваат претставничката на Законодавниот дом дека во иднина стојат на располагање да ја информираат за сите позитивни законски норми, одредби и прашања кои се однесуваат на работата и процесите што се одвиваат во институцијата.