Со огромната победа на 19-ти октомври, граѓаните направија вистински избор, гласаа за работа, перспектива и иднина. Гласаа за нови улици, нови булевари, мостови и клучки, гласаа за нови градинки, училишта, гласаа за нови паркинг места, нови катни гаражи, гласаа за континуираната поддршка од локалните самоуправи кон граѓаните, преку субвенции за инвертер клими, велосипеди, електрични тротинети, полагање на возачки испити и за поддршка на социјално ранливите категории. Едноставно кажано, гласаа за квалитет и докажани луѓе, односно за ВМРО-ДПМНЕ, истакна на прес-конференција Валентин Манасиевски, член на ЦК на ВМРО-ДПМНЕ.

„Граѓаните ја препознаа надежта и работата на кадрите на ВМРО-ДПМНЕ, затоа имаме и раст во гласовите од минатите локални избори од 2021 година. Имаме пораст во делот на советничките места од 17,5% или 82 повеќе советници во советите.

Имаме пораст и во делот на освоени градоначалнички места во првиот круг, ако во 2021 година имавме 22 градоначалнички места, сега имаме 33, што е за 50% повеќе, со што би освоиле околу 80% од вкупниот број на градоначалници на локалните избори 2021 година, кога освоивме 42 општини вкупно. И тоа, само во првиот круг. 10 спрема 1 е разликата по првиот круг во сооднос со СДС.

Затоа на 2 ноември, на гласањето во вториот круг, ве повикуваме повторно масовно да излезете и да го дадете својот глас за бројот 9, за ВМРО-ДПМНЕ, за вистинскиот избор, за нови победи во Аеродром, Брвеница, Валандово, Виница, во Дебрца и во Демир Капија, во Дојран и Долнени, Зрновци, Карпош, Кичево, Конче, Кочани и Крушево, нови победи во Лозово, Македонска Каменица, Македонски Брод, Могила, Неготино, Пробиштип, Ранковце и Росоман, Чешиново Облешево, Чучер Сандево, Шуто Оризари и секако Градот Скопје“.

Во последниов период сведочиме на повторливи, систематски и сурови случаи на дислоцирање на цели легла и чопори кучиња во градот Скопје – животни кои не се познати на локалните заедници, кои се појавуваат преплашени, дезориентирани и во очигледен стрес, велат од Здружението за заштита на животни „Анима Мунди“.

Последниот случај, кај „Аркадија“, како што посочуваат, е само уште еден доказ за оваа варварска и неказнета пракса: осум нови кучиња, оставени на улица, без контрола, без грижа, без шанса.

Ова, според здружението, не се изолирани појави.

„Граѓаните секојдневно сведочат за комбиња што пренесуваат кучиња од една во друга општина , истовари на периферии, депонии, па дури и во срцето на градот, како да станува збор за отпад, а не за живи суштества.
Таквата практика не е само нехумана и противзаконска, туку создава директна јавна опасност и за луѓето и за животните.
Бруталноста оди дотаму што не така одамна беа забележани повеќе легла – очигледно ловџиски мешанци – исфрлени во рамките на заштитени подрачја, како резерватот „Јасен“, каде што немаат никаква шанса за преживување.
Тоа е чин на апсолутно варварство, на негрижа, и на одбивање да се соочи вистината за сопствената одговорност.
„Грижо моја, прејди на друг“ – оваа реченица станува симбол за начинот на кој функционира локалната власт. Зошто поминува неказнето, затоа што никој не одговара“.

Анима Мунди бара итно институционално препознавање и санкционирање на ваквите постапки.
„Бараме: Воспоставување на механизми за следење, превенција, евиденција и санкција на случаи на дислоцирање на кучиња;
Соработка меѓу општините, институциите на централно ниво и граѓанските организации;
Отворање истраги и ефективни казни за сите сторители на овие дела.
Неодамнешните реакции и на ЈП Лајка го потврдија истото: Скопје се соочува со неприроден прилив на бездомни кучиња, што не може да биде дело на поединци. Станува збор за организирана и перманентна злоупотреба која мора да се истражи, докаже, казни.
Ги повикуваме граѓаните – доколку забележат товарење или истовар на кучиња, да го документираат со фотографии или видео и веднаш да пријават до надлежните служби или до нашата организација. Укажуваме, ова е длабоко сурова форма на насилство, но и многу опасно и по граѓаните и по животните“.

Кандидатот за градоначалник на општина Центар, Мирослав Лабудовиќ, ја најави новата мерка за субвенционирање на најголемиот дел од трошоците за годишниот сервис на лифтови и хидранти во сите станбени згради – чекор што има за цел да ја зголеми безбедноста на граѓаните и да ја поттикне одговорноста кон редовното одржување на зградите.

„Општината има обврска да се грижи за своите граѓани – не само со големи и долгорочни проекти, туку и со конкретни, секојдневни мерки кои го олеснуваат животот и го прават побезбеден. Затоа ја воведуваме мерката за субвенционирање на 70 отсто од редовниот годишен сервис на лифтови и хидранти,“ изјави Лабудовиќ.

Оваа мерка е од особено значење за старите згради и за станбените заедници кои со години се соочуваат со високи трошоци и застарени системи. Често лифтовите не се сервисираат редовно, а противпожарните системи остануваат нефункционални – што го загрозува животот на станарите и нивната безбедност.

Со субвенционирањето, Општината ќе преземе дел од финансиската обврска, со што ќе им помогне на граѓаните навреме да ги направат задолжителните технички прегледи, да избегнат ризици, и да се чувствуваат сигурно во сопствените домови.

„Безбедноста на секој човек, секое семејство и секој дом во Центар е наш приоритет. Оваа мерка е пример за тоа како локалната самоуправа може практично да помогне – со превенција, грижа и навремена реакција,“ истакна Лабудовиќ. Тој додаде дека преку оваа мерка Центар ќе стане пример за модерна и одговорна општина која навистина се грижи за својот народ.

Според планираниот модел, Општината ќе ги покрива дел од трошоците за редовен годишен сервис на лифтовите и хидрантите, а средствата ќе се обезбедат преку јавен повик на кој ќе можат да аплицираат сите станбени заедници на територијата на општината. Субвенциите ќе бидат достапни под еднакви услови за сите жители, со приоритет на зградите со повисока фреквенција на користење на лифтови и оние што немаат редовен сервис повеќе години.

„Со вакви политики, ја градиме довербата меѓу Општината и граѓаните. Затоа што Центар не треба да биде само административна единица – треба да биде заедница која се грижи, превенира и создава услови за сигурен и достоинствен живот,“ додаде Лабудовиќ.

„Мерката за субвенционирање на лифтови и хидранти е дел од поширокиот план за безбедна, уредна и функционална општина – Центар што се грижи за своите жители, од најмладите до најстарите, во секој сегмент од секојдневието.

Со ова, Центар под водство на Мирослав Лабудовиќ ќе се позиционира како општина со јасна визија, конкретни решенија и искрена грижа за граѓаните“, се додава во соопштението на ЗНАМ.