Во просториите на Министерството за европски прашања, првиот заменик-претседател на Владата и министер за европски прашања, Беким Сали, оствари средба со амбасадорот на Република Кипар, Андреас Фотиу.

Во фокусот на разговорите беше процесот на евроинтеграциите, дипломатските односи меѓу двете држави, како и реформската агенда која се реализира со предвидената динамика.

Министерот Сали лично му упати честитки на амбасадорот Фотиу за претседавањето со Европската унија од страна на Република Кипар, нагласувајќи ја важноста на оваа улога за унапредување на европските политики и зајакнување на регионалната соработка. Тој изрази благодарност за континуираната поддршка од страна на Кипар во процесот на европска интеграција на земјата.

Од своја страна, амбасадорот Фотиу го оцени институционалниот ангажман во спроведувањето на реформите и ја потврди подготвеноста на Република Кипар да продолжи со поддршката на патот кон Европската унија.

Лидерот на едното крило на Алијанса за Албанците, Зијадин Села, соопшти дека е поднесена иницијатива до Уставен суд за оценување на уставноста на Законот за прекршоци, донесен за имплементација на проектот „Безбеден град“.

Села изјави дека со законот, кој се однесува на целото население, остануваат отворени прашања зошто измените не биле предложени од Владата, туку од пратеници во Собранието. Според него, со тоа се отвора дилема што сака да се сокрие и зошто Владата не застанала формално зад законските измени.

Тој оцени дека законот отвора сериозни прашања за рамноправноста на граѓаните, посочувајќи дека сите функционери, вклучително и премиерот и претседателот, се должни да ги почитуваат законите, меѓу кои и Закон за употреба на јазиците. Според Села, во законот мора јасно да стои дека пораките за казни и одлуки треба да бидат двојазични.

Тој истакна дека е несериозно казни и одлуки да се доставуваат преку пораки, бидејќи граѓаните не се законски обврзани да поседуваат телефон или имејл адреса, за разлика од обврската да имаат адреса на живеење. Според него, тоа отвора и дополнителни проблеми, бидејќи промена на телефонски број или имејл би значела потреба од пријавување кај надлежните институции.

Села нагласи дека многу од прашањата требало да бидат предмет на јавна расправа пред донесувањето на законот и дека граѓаните мора да бидат еднакви пред Уставот. Тој реагираше и на фактот што проектот се имплементира само во три града, посочувајќи дека ваквиот пристап создава нерамноправност.

Како пример, тој ја наведе општината Чаир, каде, според него, има густо поставени камери, за разлика од други општини, додека истовремено инфраструктурата е слаба, со недоволно паркинзи, нерешени булеварски решенија и недоволна хоризонтална и вертикална сигнализација.

Според Села, пред воведување на вакви решенија требало да се анализираат искуствата од други држави, да се консултираат експерти и да се прилагоди инфраструктурата. Тој оцени дека во сегашната форма, законот удира врз начелата на слободата и основните права на граѓаните.

Граѓанската иницијатива „Зелен хуман град“ испрати барање до Град Скопје како подносител на кривичната пријава против Цементарница Усје АД Скопје, поднесена во 2023 година, да достави ургенција до Јавно обвинителство со цел да се добие информација за статусот и фазата на постапката.

Од иницијативата бараат Обвинителството да одговори дали постапката е во тек, дали е привремено запрена и кога се очекува да продолжи, како и причините за таква одлука, односно дали е трајно запрена и со кое образложение.

„Зелен хуман град“ оценува дека усвојувањето на заклучокот со кој Советот на Град Скопје ја издвоил Цементарница Усје како најголем загадувач и препорачал нејзина дислокација до органите на централната власт е позитивен почетен чекор, но, според нив, тој не е доволен сам по себе.

Од иницијативата посочуваат дека Градот Скопје, како подносител на кривичната пријава, има обврска активно да се залага постапката да не запре и да биде изречена соодветна казна.

Во барањето се наведува и потребата од воведување 24-часовен мониторинг на индустриското загадување, кој, како што посочуваат, веќе е достапен за јавноста во реално време, како и третирање на условите од Најдобрите достапни техники на Европската Унија од 2013 година за цементната индустрија како минимални стандарди во Македонија.

Иницијативата повторно побара дислокација на Цементарница Усје надвор од Скопје.