Македонија
Четири недвижнини на Мијалков одат на лицитација: Становите во Охрид и земјиштето во Скопје и Кожуф огласени за наддавање

Дел од запленетиот имот на ексдиректорот на УБК, Сашо Мијалков, кој државата го одзеде со негово признавање на вина за случајот „Империја“ е ставен на лицитација. Станува збор за четири недвижности. Станува збор за земјиште лоцирано во Џибарица (Кожуф), два стана во Охрид на плажата „Горица“ и земјиште во скопско Морани (Студеничани).
Земјиштето на површина од 321 квадрат на Кожуф ќе се наддава со почетна цена од 483 евра. Првиот стан во Охрид со површина од 65 квадрати доби почетна цена од 93.906 евра. Вториот стан со површина од 114 квадрати ќе се продава по почетна цена од 146.870 евра. Земјиштето во Студеничани со површина од 56.818 квадрати доби почетна цена од 277.161 евро.
За недвижнините ќе можат да се наддаваат сите физички и правни лица кои ќе се пријават. Сите имоти можат да се разгледаат, во одреден термин кој е даден од Агенцијата за одземен имот.
„Јавното надавање нема да се одржи доколку се јави само еден понудувач“, велат од Агенцијата за одземен имот.
Шуми, апартмани, станови, земјоделски и градежни парцели се само дел од имотот кој Мијалков го даде за да добие помала затворска казна за „Империја“ со признавањето на вина. Запленети му се и акции. Сите ќе се најдат на лицитација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
МВР со детали: Поткопан е темелот на куќата на Владо Малески, против сторителот ќе биде поднесена кривична пријава

Се огласи полицијата по случајот со уривањето на дел од спомен-куќата на Владо Малески, авторот на текстот на македонската химна.
„На 15.10.2025 во 11:00 часот во ОВР Струга е пријавено дека Н.К. од струшкото село Велешта, при изведување градежни работи на улицата „Браќа Миладиновци “ во Струга со работна машина го поткопал темелот од јужниот ѕид на спомен куќата-музеј на Владо Малески, која претставува споменик заштитен како значајно културно наследство“, велат од МВР.
На местото извршиле увид претставници на Завод и музеј – Охрид, заедно со полициски екипи. По целосното расчистување на случајот, против сторителот ќе биде поднесена кривична пријава за „оштетување или уништување на добра под привремена заштита или културно наследство“, согласно член 264 од Кривичниот законик.
Македонија
За 30 дена ќе ставам крај на депониите во Гази Баба, рече кандидатот на СДСМ за градоначалник, Митовски

Кандидатот за градоначалник на Гази Баба од СДСМ, Влатко Митовски, најави дека во првите 30 дена од преземањето на функцијата ќе го реши проблемот со сметот и дивите депонии во општината.
„Нема повеќе да има диви депонии зад контејнерите, ниту општината ќе создава сопствени депонии. Отпадот ќе биде одложуван на пропишани и контролирани локации, а комуналното претпријатие повторно ќе стане функционално,“ порача Митовски.
Тој го обвини актуелното раководство дека четири години не успеало да воспостави систем за редовно собирање на отпадот, поради што комуналните служби се во целосен колапс.
Македонија
(Видео) Коњановски: Хотелот „Битола“ ќе се адаптира во Дом за стари лица – проект по иницијатива на граѓаните

Кандидатот за градоначалник на општина Битола, Тони Коњановски, порача дека секој голем проект започнува од гласот на граѓаните и дека заедничкото размислување, пишување и работа се клучот за подобро секојдневие.
„Една од најзначајните иницијативи што ја предложија граѓаните е адаптацијата на хотелот ‘Битола’ во Дом за стари лица – место кое ќе овозможи достоинствен живот, грижа и внимание за највозрасните сограѓани“, изјави Коњановски.
Меѓу останатите приоритетни предлози се: бесплатен оброк за сите ученици од 1 до 3 одделение, обезбедување униформи за децата од 1 до 5 одделение, организација на летни кампови за деца од социјално загрозени семејства, зголемување на капацитетите на градинките, како и продолжување на акцијата за отстранување на дивоградбите и гаражите, особено во Нова Битола.
„Вистински избор се проектите создадени од граѓаните, за граѓаните. Вистински избор е заедничкиот труд – кога гласот на граѓаните станува проект што го менува секојдневието“, нагласи Коњановски.