Македонија
Ѓорчев: Нема првачиња оти над 4.000 деца родени во 2017 се иселиле со родителите
Македонија никогаш во својата историја немала помалку првачиња, никогаш немала помалку ученици, никогаш немала помалку средношколци. На Македонија и се случува и демографска и образовна и човечка катастрофа. Ни се затвораат училиштата, нема доволно првачиња, нема доволно часови за наставниците, има празни училишта, празни клупи и апокалипса која ни се случува пред нашите очи, рече на денешната прес конференција членот на ИК на ВМРО-ДПМНЕ Влатко Ѓорчев.
– Со Димитар Ковачевски и неговите министри Македонија преживува егзодус кој буквално ги десеткува ги колабира училиштата низ Македонија и основните и средните. Маалата и улиците ни остануваат без деца, рече Ѓорчев.
Тој изнесе бројки дека во Општина Велес во однос на минатата година има 49 помалку првачиња што е намалување од 10%, Општина Охрид има 94 помалку првачиња што е намалување од 17% за само една година, а Општина Струга има 52 помалку првачиња штоза само една година е намалување од 9%.
Според податоците што ги изнесе Ѓорчев, Општина Тетово има 200 помалку средношколци и 50 помалку основци кои се запишани во основно образование, додека Општина Гостивар има само 50% пополнети места во основно и средно образование, тоа значи дека има празни училници, празни клупи и недоволно ученици.
– Во Општина Струмица последниве години буквално е преполовен бројот на ученици. Ако во 2019 година се запишувале 750-800 ученици, сега оваа година таа бројка е значително помала. Имаме 4 училишта во 4 села кои немаат ниту едно прваче. Училиштето во Раборци, училиштето во Попчево, училиштето во Мемешли и училиштето во Габрово, тоа се 4 училишта немаат ниту едно единствено прваче, рече Ѓорчев.
Во 2017 година, годината кога се родени денешните првачиња, родени се 21.700 деца, а сега според овие тенденции, според овие бројки коишто се комплетираат, бројот на првачиња ќе биде можеби нешто под 18.000 првачиња. Тоа значи дека само до нивната 6-та година, до наполнети 6 години сме изгубиле 15-20% деца коишто се иселиле и си заминале од Македонија сосе нивните родители. Тоа е пад од фрапантни 4 илјади деца од 0 до 6 години. Поделете го тоа на 20 деца по паралелка, значи дека само од 0 до 6 години од 2017 година и Зоран Заев со неговиот „Живот во Македонија“, сме изгубиле 200 паралелки, објасни Ѓорчев.
Тој оваа појава ја нарече демографското исчезнување и демографски и иселеничкиот егзодус којшто ѝ се случува на Македонија, а за тоа ја посочи економската катастрофа и корупцијата, како и неспособноста на Димитар Ковачевски и неговите министри.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Претседателката за утре го свика Советот за безбедност
По извршените консултации претседателката Гордана Сиљановска – Давкова за утре – 1 март 2026 година, закажа седница на Советот за безбедност.
Како што соопштија од Кабинетот на претседателката Сиљановска – Давкова, седницата ќе започне во 18 часот во Вилата Водно, а на дневен ред ќе биде безбедносната состојба во земјава по најновите случувања на Блискиот Исток.
Македонија
Агресивен карцином кај 10-годишната Ева, се бараат донации
Десетгодишната Ева е девојче кое се бори со агресивна форма на остеосарком (редок малиген рак на коските) кој бара интензивен и долготраен третман.
„Ви се обраќам во име на моето семејство и за најважната личност во нашиот свет, Ева, која е радосно, љубопитно, отворено, храбро десетгодишно дете кое одеднаш се соочува со борбата на својот живот. Нашето мало сонце се бори со агресивна форма на остеосарком (редок малиген рак на коските) кој бара интензивен и долготраен третман.
Овој вид на дијагноза не може да се лекува во Македонија, бидејќи нема центри ниту експертиза за да се обезбеди потребната грижа и третман. Туморот е класифициран како високостепен и брзо се шири, лекарите советуваа итно лекување во странство во специјализирани центри.
Времето и дејствувањето се критични. Во моментов таа е примена во специјализирана клиника во Минхен – Германија, каде што ја завршуваме последната фаза од дијагностиката (закажан термин за ПЕТ/КТ скенирање следната недела, по МРИ, биопсија, рендгенски снимки и крвни проверки).
Од она што го знаеме, третманот ќе следи во три фази:
1. Приближно два месеци интензивна хемотерапија
2. Хируршко отстранување на туморот
3. Дополнителни шест месеци хемотерапија“, стои во објавата.
Средствата се наменети за покривање на трошоците за медицинското лекување во Германија. Донации за помош на малата Ева може да се дадат на следниот линк.
Македонија
Телефонски разговор на Муцунски со Гидеон Саʼар за состојбата со Иран
Министерот за надворешни работи и надворешна трговија Тимчо Муцунски попладнево остварил телефонски разговор со министерот за надворешни работи на Израел, Гидеон Саʼар.
Од Министерството за надворешни работи и надворешна трговија информираат дека била реафирмирана поддршката за координираните напори на Соединетите Американски Држави и Израел во однос на Иран, како и неопходноста од зачувување на регионалната стабилност и безбедност.
– Беше истакнато дека продолжената блиска соработка е од суштинско значење за мирот и одвраќањето. Воедно, беше нагласено дека иранскиот народ, како и сите народи во регионот, заслужуваат мир, стабилност и можност за просперитет, се наведува во соопштението.

