Од ЈП „Водовод и канализација“ информираат дека поради систематска промена на водомери во населбата Жданец, денеска без водоснабдување ќе останат корисниците од населбата Жданец од 9:00 до 14:00 часот (општина Карпош).

Хрватска го поддржува писмото кое во врска со Северна Македонија и Албанија на Европската комисија ѝ го испратија министрите за надворешни работи на шест земји членки на Европската Унија, но не го потпиша, изјави државната секретарка во хрватското Министерство за надворешни и европски работи, Андреја Метелко-Згомбиќ.

Таа објаснила дека Хрватска не го потпишала писмото затоа што не е примерно како земја што набргу ќе претседава со ЕУ формално да се сместува во тие предлози.

„Нашите ставови остануваат исти, тие се доследни. Ја поддржуваме содржината на писмото, но како држава што набргу ќе го преземе претседавањето не е вообичаено формално да застанеме зад некој предлог“, рекла Згомбиќ, пренесува „Танјуг“.

Агенцијата „Хина“ пренесува дека таа навела оти Хрватска во текот на своето претседавање ќе се залага за да се донесе соодветна одлука во врска со отворањето преговори со Албанија и Северна Македонија.

„Сакаме да создадеме услови со цел во текот на нашето претседавање навистина да можеме да направиме позитивни чекори во таа насока. Секако дека постојат одредени забелешки за неефикасноста на самиот процес на проширување. Многу земји констатираа дека нема соодветен напредок во процесот на проширување“, рекла таа.

Австрија, Италија, Словенија, Словачка, Чешка и Полска до ЕК доставија писмо во кое изразуваат подготвеност да се ангажираат за подобрување на процесот за пристапување на земјите од Западен Балкан.

„Ќе работиме на тоа доколку се обезбеди ефикасна работа и доколку се обезбеди консензус внатре во ЕУ за отворање пристапни преговори за Албанија и Северна Македонија во март 2020 година“, се наведува во писмото.

Премиерот Зоран Заев се сретна со шефот на Мисијата на ОБСЕ во Скопје, амбасадорот Клеменс Која.

На состанокот се разговараше за актуелната политичка ситуација во нашата држава во пресрет на изборите.

„Поздравени се политиките на едно општество за сите во државата како интегративен концепт со кој Република Северна Македонија обезбедува еднакви шанси за сите и придонесува во домашната стабилност, а со тоа и во стабилноста во регионот. Изразена е и поддршка за напредокот на државата во реформите, во добрососедските односи и за евро-атлантската определба на нашата држава“, соопштија од Владата.

Заев рекол дека земјата работи на реформскиот процес, на интеретничката кохезија и на искрени, пријателски односи со соседите и во регионот.

„Фокусирани сме проевропски затоа што тоа е стратешка цел за земјата, заедно со членството на НАТО. Ваквата определеност веќе ги дава првите развојни економски резултати со директно влијание врз подобрување на животот на граѓаните. Свесни сме дека има уште многу да се сработи, но токму поради тоа и сметаме дека интеграциите на Република Северна Македонија и на регионот немаат алтернатива. Ние сме одговорна Влада и работиме во насока на зајакнување на стабилноста во државата и регионот“, рекол Заев.