Вицепремиерот задолжен за европски прашања, Бујар Османи, денеска телефонски разговораше со новоизбраниот премиер на Република Косово, Авдула Хоти, при што упати честитки за изборот на новата влада, соопштија од Кабинетот на Османи.

„Во овие сложени времиња на заканата од пандемијата на Ковид-19 ова се добри вести, кои навестуваат политичка стабилност не само за Косово туку и за целиот регион. Дозволете, во името на Владата на Република Северна Македонија да ви честитам на изборот со надеж дека заедно, како непосредни соседи, ќе продолжиме во изградбата на пријателски односи, во насока на исполнување на нашата заедничка цел – европската интеграција на двете земји и воопшто на целиот регион“, рекол Османи, пишува во соопштението.

Времето утре ќе биде сончево и потопло со мала до умерена облачност. Ќе дува слаб до умерен, а повремено и засилен ветер од јужен правец.

Попладне во северните делови ќе има услови за изолирана појава на пороен дожд и грмежи. Минималната температура ќе биде во интервал од 3 до 12, а максималната од 22 до 28 степени.

Во Скопје претпладне сончево, во попладневните часови со зголемена облачност и со услови за краткотраен пороен дожд и ретки грмежи.

Минималната температура ќе се спушти до 7, а максималната ќе достигне до 26 степени.

Следува период на потопло време. Претпладне ќе биде сончево, а попладне ќе има изолирана појава на нестабилна облачност со пороен дожд, грмежи и засилен ветер.

В петок на повеќе места ќе дува засилен јужен ветер. Под влијание на влажен бран повеќе врнежи се очекуваат помеѓу петок и сабота.

Комисијата за заразни болести до Владата ќе достави предлог за повторно враќање на полицискиот час за време на претстојниот продолжен викенд поради празникот Задушница и зголемениот број нови случаи на коронавирус во изминатите денови.

Комисијата предлага полициски час од четврток (4 јуни) од 21 часот до понеделник (8 јуни) до 5 часот наутро во Скопје – сите скопски општини, општина Куманово, општина Липково, општина Штип, општина Тетово, како и Боговиње, Брвеница, Теарце, Желино и Јегуновце.

Во сите други градови Комисијата предлага полицискиот час да трае од четврток (4 јуни) од 21 часот до петок (5 јуни) до 5 часот наутро. Другите денови полицискиот час да почнува од 16 часот и да трае до следниот ден до 5 часот наутро.

Поради зголемениот број на новодијагностицирани случаи со Ковид-19 во земјата, денеска, министерот за здравство, Венко Филипче, одржа координативен состанок со членовите на Комисијата за заразни болести, претставници на локални центри за јавно здравје и претставници на Министерството за внатрешни работи, на кој се разговараше за понатамошното дејствување во насока на спречување на ширењето на заразата.

„Дополнително, на состанокот, на претставниците на Министерството за внатрешни работи им беа укажани тешкотиите со кои се соочуваат екипите на терен во однос на пристап до луѓе за тестирање и прекршувања на мерката за самоизолација. Од службите на МВР беше побарана поголема ажурност, ефективно дејствување на терен, контрола и санкционирање на прекршувањата на мерките“, соопшти МЗ.

Во последните 24 часа направени се 974 тестирања, а регистрирани се 101 нов случај на Ковид-19, информираат од Минитерството за здравство, од кои најголемиот број во Скопје – 59. Другите се од Куманово – 12, Штип – 7, Прилеп – 1, Тетово – 5, Струга – 6, Велес – 1, Охрид – 1, Кавадарци – 1, Гостивар – 3, Кочани – 3, Пробиштип – 2.

Во изминато деноноќие регистрирани се и четири смртни случаи.